واشنگٹن: امریکی صدر ڈونلڈ ٹرمپ نے سوشل میڈیا پلیٹ فارم “ٹروتھ سوشل” پر آبنائے ہرمز کا ایک نیا نقشہ شیئر کرتے ہوئے اسے غیر رسمی طور پر “آبنائے ٹرمپ” کا نام دے دیا ہے۔
یہ پہلا موقع نہیں ہے کہ صدر ٹرمپ نے اس اصطلاح کا استعمال کیا ہو، اس سے قبل بھی ایک عوامی خطاب میں وہ اس نام کا ذکر کر چکے ہیں۔ اس موقع پر انہوں نے کہا تھا کہ میڈیا اسے ابتدا میں ایک غلطی قرار دے سکتا ہے، تاہم وہ اپنے مؤقف پر قائم ہیں۔
ٹرمپ کے اس اقدام کے بعد سوشل میڈیا پر مختلف ردعمل سامنے آئے ہیں، جہاں بعض صارفین نے اسے مزاحیہ قرار دیا جبکہ کچھ حلقوں نے اسے ایک سیاسی پیغام کے طور پر دیکھا ہے۔
اسی دوران امریکی صدر نے روس، ایران اور یوکرین سے متعلق گفتگو کرتے ہوئے کہا کہ روسی صدر ولادیمیر پیوٹن ایران کے جوہری پروگرام کے حوالے سے تشویش رکھتے ہیں اور وہ بھی نہیں چاہتے کہ ایران جوہری ہتھیار حاصل کرے۔
انہوں نے دعویٰ کیا کہ ایران کو متعدد معاشی اور عسکری چیلنجز کا سامنا ہے، جبکہ ملک کی معیشت اور کرنسی دباؤ کا شکار ہے۔
ٹرمپ کے مطابق امریکہ کی دفاعی صلاحیتیں مضبوط ہیں اور خطے میں جاری صورتحال پر مسلسل نظر رکھی جا رہی ہے۔
انہوں نے مزید کہا کہ ایران کو جوہری ہتھیاروں کے حصول کی اجازت نہیں دی جا سکتی اور عالمی سطح پر بھی یہی مؤقف پایا جاتا ہے۔