کاشف عباسی ,May 20 ,2026
نیوز اینڈ نیوز
اسلام آباد: ممکنہ اٹھائیسویں آئینی ترمیم سے متعلق سیاسی حلقوں میں جاری بحث کے دوران پاکستان پیپلز پارٹی نے واضح کیا ہے کہ پارٹی کو تاحال کسی مجوزہ آئینی ترمیم کا باضابطہ مسودہ موصول نہیں ہوا، اس لیے اس معاملے پر رائے دینا قبل از وقت ہوگا۔
صدر آصف علی زرداری کے دورۂ چین کی تفصیلات سے متعلق پریس کانفرنس کرتے ہوئے سینیٹر سلیم مانڈوی والا نے کہا کہ میڈیا میں مختلف قیاس آرائیاں سامنے آرہی ہیں، تاہم پیپلز پارٹی کو کسی مجوزہ ترمیم یا آئینی تبدیلی کے حوالے سے ابھی تک کوئی دستاویز فراہم نہیں کی گئی۔ انہوں نے کہا کہ جب تک باقاعدہ مسودہ سامنے نہیں آتا، اس معاملے پر تبصرہ کرنا مناسب نہیں۔
انہوں نے اس بات کا اعادہ کیا کہ پارٹی قیادت کو بھی اس حوالے سے کوئی باضابطہ پیش رفت نہیں بتائی گئی۔ اس موقع پر صدر مملکت کے ترجمان مرتضیٰ سولنگی اور پریس سیکریٹری دانیال گیلانی بھی موجود تھے۔
پریس کانفرنس کے دوران صدر آصف علی زرداری کے حالیہ دورۂ چین پر گفتگو کرتے ہوئے بتایا گیا کہ پاکستان اور چین کے درمیان دفاع، زراعت، صحت، صنعتی تعاون اور ٹیکنالوجی سمیت مختلف شعبوں میں پانچ مفاہمتی یادداشتوں اور ایک معاہدے پر دستخط کیے گئے۔
مرتضیٰ سولنگی نے پاکستان بحریہ کی پہلی ہنگور کلاس آبدوز کی تقریبِ شمولیت کو پاک چین دفاعی تعاون میں اہم سنگ میل قرار دیتے ہوئے کہا کہ اس منصوبے کی تزویراتی اہمیت جے ایف سترہ تھنڈر طیارہ منصوبے کے برابر ہے۔
سینیٹر سلیم مانڈوی والا نے بتایا کہ پاکستانی فلموں اور ڈراموں کو چین میں متعارف کرانے کے لیے بھی نئی ثقافتی حکمت عملی پر کام جاری ہے، جبکہ پاکستانی فلم ’’دی لیجنڈ آف مولا جٹ‘‘ کی چین میں تجارتی نمائش اکیس اور بائیس مئی کو متوقع ہے۔
انہوں نے مزید کہا کہ کراچی میں پانی کی قلت پر قابو پانے کے لیے سمندری پانی کو قابلِ استعمال بنانے کے منصوبے پر بھی مفاہمتی یادداشت طے پائی ہے، جس کے تحت روزانہ پچاس لاکھ گیلن پانی صاف کرنے کی صلاحیت رکھنے والا پلانٹ قائم کیا جائے گا۔ اس کے علاوہ زرعی ٹیکنالوجی کے شعبے میں بھی چین کی بڑی چائے کمپنی کے ساتھ تعاون کا معاہدہ کیا گیا ہے۔