محمود احمد May29,2026
نیویارک/ اقوامِ متحدہ(نیوز اینڈ نیوز۔ 29 مئی 2026ء)
اقوامِ متحدہ کے امن کاروں کے عالمی دن کے موقع پر اقوامِ متحدہ میں پاکستان کے مستقل مندوب سفیر عاصم افتخار احمد نے کہا ہے کہ پاکستان عالمی امن، سلامتی اور استحکام کے قیام کے لیے اقوامِ متحدہ کے امن مشنز میں اپنی تاریخی اور نمایاں خدمات جاری رکھنے کے عزم پر قائم ہے۔
29 مئی کو جاری اپنے خصوصی پیغام میں سفیر عاصم افتخار احمد نے کہا کہ پاکستان اقوامِ متحدہ اور عالمی برادری کے ساتھ مل کر نیلے پرچم تلے خدمات انجام دینے والے تمام امن کاروں کی جرات، پیشہ ورانہ مہارت، لگن اور قربانیوں کو خراجِ تحسین پیش کرتا ہے۔ انہوں نے کہا کہ دنیا کے مختلف تنازعات زدہ اور غیر مستحکم خطوں میں امن کے قیام کے لیے خدمات انجام دینے والے امن کار انسانیت کے حقیقی سفیر ہیں۔
انہوں نے کہا کہ پاکستان کے لیے اقوامِ متحدہ کے امن مشنز میں شرکت صرف ایک ذمہ داری نہیں بلکہ بین الاقوامی امن و سلامتی کے فروغ اور کثیرالجہتی تعاون سے وابستگی کا عملی اظہار ہے۔ پاکستان سن 1960 سے اب تک دنیا بھر میں اقوامِ متحدہ کے مختلف امن مشنز میں 2 لاکھ 70 ہزار سے زائد فوجی اور سویلین امن کار بھیج چکا ہے، جنہوں نے انتہائی مشکل اور خطرناک حالات میں اپنے فرائض انجام دیے۔
سفیر عاصم افتخار احمد نے ان 183 پاکستانی امن کاروں کو بھی زبردست خراجِ عقیدت پیش کیا جنہوں نے اقوامِ متحدہ کے امن مشنز کے دوران اپنی جانوں کا نذرانہ پیش کیا۔ انہوں نے کہا کہ یہ عظیم قربانیاں پاکستان کے عالمی امن کے لیے غیر متزلزل عزم کی روشن مثال ہیں اور پوری قوم اپنے شہداء پر فخر کرتی ہے۔
انہوں نے کہا کہ اقوامِ متحدہ کے امن مشنز دنیا میں امن قائم رکھنے کے لیے عالمی برادری کے پاس موجود سب سے مؤثر، عملی اور نسبتاً کم لاگت ذرائع میں شمار ہوتے ہیں۔ یہ مشنز شہریوں کے تحفظ، جنگ بندی کی نگرانی، تشدد کی روک تھام، سیاسی عمل کی معاونت، انسانی امداد کی فراہمی اور مذاکرات کے لیے سازگار ماحول پیدا کرنے میں کلیدی کردار ادا کرتے ہیں۔
پاکستانی مندوب نے اس بات پر بھی تشویش کا اظہار کیا کہ دنیا کے مختلف حصوں میں امن کاروں کو بڑھتے ہوئے خطرات کا سامنا ہے۔ انہوں نے واضح کیا کہ اقوامِ متحدہ کے امن کاروں پر حملے ناقابلِ قبول ہیں اور بین الاقوامی قانون کے مطابق ایسے اقدامات جنگی جرائم کے زمرے میں آ سکتے ہیں۔ انہوں نے زور دیا کہ امن کاروں کے خلاف جرائم میں ملوث عناصر کا احتساب یقینی بنایا جانا چاہیے تاکہ مستقبل میں ایسے واقعات کی روک تھام ممکن ہو سکے۔
سفیر عاصم افتخار احمد نے کہا کہ اقوامِ متحدہ کی سلامتی کونسل کے غیر مستقل رکن اور امن مشنز کے لیے بڑے فوجی دستے فراہم کرنے والے ملک کی حیثیت سے پاکستان امن کارروائیوں کو مزید مؤثر، محفوظ اور مستحکم بنانے کے لیے اپنے شراکت داروں کے ساتھ قریبی تعاون جاری رکھے ہوئے ہے۔ پاکستان امن کاروں کی حفاظت، احتساب، بہتر کارکردگی اور پائیدار مالی معاونت کے حوالے سے جاری عالمی کوششوں کی بھرپور حمایت کرتا ہے۔
انہوں نے اقوامِ متحدہ کے سیکریٹری جنرل کی جانب سے امن مشنز کے مستقبل اور ان کی افادیت کے جائزے کے عمل کا خیرمقدم کرتے ہوئے کہا کہ بدلتے ہوئے عالمی حالات کے تناظر میں امن کارروائیوں کو مزید مضبوط اور مؤثر بنانے کی ضرورت ہے۔
اپنے پیغام کے اختتام پر سفیر عاصم افتخار احمد نے دنیا بھر میں خدمات انجام دینے والے تمام امن کاروں کو سلام پیش کرتے ہوئے اس عزم کا اعادہ کیا کہ پاکستان عالمی امن، استحکام اور اقوامِ متحدہ کے امن مشنز کے فروغ کے لیے اپنی تاریخی ذمہ داریاں مستقبل میں بھی پوری کرتا رہے گا۔