منصور احمد,September 16,2026
جدہ (نیوز اینڈ نیوز) — 16 ستمبر 2026ء
سعودی فیڈریشن آف چیمبرز کے چیئرمین عبداللہ صالح کامل نے کہا ہے کہ مملکت کا صنعتی شعبہ اب بے مثال اور تیز رفتار وسعت اختیار کر رہا ہے، جس کا ملک کی مجموعی ملکی پیداوار (جی ڈی پی) میں حصہ اب 16 فیصد کی تاریخی سطح تک پہنچ چکا ہے، جبکہ صنعتی اداروں کی تعداد ‘سعودی وژن 2030’ کے آغاز پر تقریباً 7 ہزار سے بڑھ کر اب 15 ہزار سے بھی تجاوز کر گئی ہے۔
عبداللہ صالح کامل نے یہ اہم باتیں جدہ سپر ڈوم میں منعقدہ “سعودی انڈسٹری فورم 2026ء” کی دوسری ایڈیشن کی پروقار افتتاحی تقریب سے خطاب کرتے ہوئے کہیں۔ تین روزہ فورم 14 سے 16 ستمبر تک جاری ہے اور اسے سعودی فیڈریشن آف چیمبرز کی نیشنل انڈسٹریل کمیٹی نے جدہ چیمبر، سعودی وزارتِ صنعت و معدنی وسائل اور دیگر متعلقہ اداروں کی اسٹریٹجک شراکت داری کے ساتھ منعقد کیا ہے۔
اپنے تفصیلی خطاب میں انہوں نے بتایا کہ سعودی عرب نے پیٹروکیمیکلز، مشینری و آلات، دفاعی صنعت، خوراک و ادویات، ٹیکسٹائل اور تعمیراتی سامان سمیت متعدد تنوع پذیر شعبوں میں نمایاں ترین ترقی کی ہے۔ ان کے مطابق سعودی ساختہ مصنوعات عالمی منڈیوں میں مضبوط اور جدید مسابقتی حیثیت حاصل کر رہی ہیں جبکہ غیر تیل برآمدات میں مسلسل اور نمایاں اضافہ بھی صنعتی شعبے کے پھیلاؤ کا بین ثبوت ہے۔
انہوں نے خاص طور پر ذکر کیا کہ سعودی وژن 2030 کے اجرا کے بعد ایسے متعدد نئے اور جدید شعبے قائم کیے گئے ہیں جنہیں ماضی میں لائسنسنگ کی اجازت حاصل نہیں تھی۔ ان میں دفاعی صنعت سرفہرست ہے، جہاں اب تک لائسنس یافتہ دفاعی کمپنیوں کی مجموعی تعداد 347 سے تجاؤز کر چکی ہے۔ انہوں نے بنیادی خام مال کی فراوانی، جدید انفراسٹرکچر، عالمی منڈیوں سے سٹریٹجک قربت اور کاروباری قانون سازی کو اس صنعتی انقلا ب کی بنیاد قرار دیا۔
سعودی فیڈریشن آف چیمبرز کے چیئرمین نے چوتھے صنعتی انقلاب اور مصنوعی ذہانت (AI) کی جدت سے فائدہ اٹھانے پر زور دیا تاکہ سعودی عرب دنیا کے صنعتی نقشے پر ایک ناقابلِ تسخیر مرکز بن سکے۔ اس تین روزہ فورم کے دوران پائیداری، قابلِ تجدید توانائی، لاجسٹکس اور کاروباری جدت جیسے اہم موضوعات پر مختلف سیشنز منعقد کیے جا رہے ہیں۔ آخر میں انہوں نے مکہ ریجن کے نائب گورنر شہزادہ سعود بن مشعل بن عبدالعزیز کی نجی شعبے کی سرپرستی اور سرمایہ کاری دوست ماحول قائم کرنے پر خصوصی تعریف کی।
نیوز اینڈ نیوز کی وضاحت:
یہ تفصیلی رپورٹ سعودی انڈسٹری فورم 2026ء کی کارروائی، سعودی فیڈریشن آف چیمبرز اور خبر رساں اداروں کے باضابطہ جاری کردہ اعداد و شمار کی روشنی میں تیار کی گئی ہے۔
ماخذ: جدہ چیمبر آف کامرس، وزارتِ صنعت و معدنی وسائل ڈیسک، جدہ۔