منصور احمد ,May 29,2026
اسلام آباد (نیوز اینڈ نیوز۔ 29 مئی 2026ء)
انسدادِ منشیات فورس (اے این ایف) نے ملک بھر میں منشیات سمگلنگ کے خلاف بڑے پیمانے پر کارروائیاں کرتے ہوئے 3 خواتین سمیت 10 ملزمان کو گرفتار کر لیا، جبکہ 21 لاکھ روپے سے زائد مالیت کی تقریباً 15 کلوگرام منشیات برآمد کر لی گئی۔
ترجمان اے این ایف کے مطابق تعلیمی اداروں کے قرب و جوار اور مختلف شہروں میں مجموعی طور پر 6 کامیاب کارروائیاں کی گئیں، جن کے دوران 14.845 کلوگرام منشیات قبضے میں لی گئی۔ حکام کا کہنا ہے کہ تعلیمی اداروں کے طلبہ کو منشیات فراہم کرنے والے عناصر کے خلاف زیرو ٹالرنس پالیسی کے تحت آپریشن جاری رکھا جائے گا۔
راولپنڈی میں ایک یونیورسٹی کے قریب کارروائی کے دوران گاڑی سے 745 گرام آئس برآمد کر کے 3 ملزمان کو گرفتار کیا گیا۔ اسی طرح رنگ روڈ پشاور کے قریب ایک خاتون کے قبضے سے 500 گرام آئس برآمد ہوئی، جس کے بعد ملزمہ کو حراست میں لے لیا گیا۔
اسلام آباد ٹول پلازہ کے قریب کارروائی کرتے ہوئے اے این ایف اہلکاروں نے ایک گاڑی سے 6 کلوگرام چرس برآمد کر کے ایک ملزم کو گرفتار کیا۔ ابتدائی تفتیش کے دوران گرفتار ملزمان نے تعلیمی اداروں کے طلبہ کو منشیات فروخت کرنے کا اعتراف بھی کیا ہے۔
دیگر کارروائیوں میں سرنان، ضلع پشین کے ایک ہوٹل کے قریب 2 خواتین کے قبضے سے 4 کلوگرام آئس برآمد کی گئی، جبکہ اٹک کے قریب ایک گاڑی سے 2.4 کلوگرام چرس برآمد کر کے 2 ملزمان کو گرفتار کیا گیا۔
ایک اور کارروائی میں ریلوے لائن روڈ پشاور کے قریب ایک ملزم کے قبضے سے 1.2 کلوگرام چرس برآمد کی گئی۔
ترجمان اے این ایف کے مطابق تمام ملزمان کے خلاف انسدادِ منشیات ایکٹ 1997 کے تحت مقدمات درج کر کے تحقیقات کا آغاز کر دیا گیا ہے، جبکہ منشیات کے نیٹ ورک سے جڑے دیگر عناصر کی گرفتاری کے لیے بھی چھاپے مارے جا رہے ہیں۔