محمود احمد May19,2026
نیوز اینڈ نیوز رپورٹ
اسلام آباد: وفاقی دارالحکومت کی مقامی عدالت نے ٹک ٹاکر ثنا یوسف کے قتل کیس کا فیصلہ سناتے ہوئے مجرم عمر حیات کو سزائے موت اور 20 لاکھ روپے جرمانے کی سزا سنا دی۔
یہ فیصلہ اسلام آباد کی ڈسٹرکٹ اینڈ سیشن کورٹ کے ایڈیشنل سیشن جج افضل مجوکہ نے سنایا۔ عدالت نے فریقین کے دلائل مکمل ہونے کے بعد فیصلہ محفوظ کیا تھا، جو آج سنایا گیا۔
عدالتی فیصلے کے مطابق ملزم عمر حیات پر پاکستان پینل کوڈ کی دفعہ 302 کے تحت جرم ثابت ہوا، جس کے بعد عدالت نے اسے پھانسی کی سزا سنائی۔ عدالت نے مجرم پر 20 لاکھ روپے جرمانہ بھی عائد کیا، جبکہ عدم ادائیگی کی صورت میں مزید قید کی سزا بھی بھگتنا ہوگی۔
کیس کی سماعت کے دوران استغاثہ کی جانب سے عدالت میں 25 سے زائد گواہان کے بیانات، تفتیشی رپورٹس اور سائنسی شواہد پیش کیے گئے، جنہیں عدالت نے قابلِ اعتماد قرار دیا۔ پراسیکیوشن کے مطابق ملزم نے منصوبہ بندی کے تحت ثنا یوسف کو نشانہ بنایا تھا۔
سماعت کے دوران تفتیشی افسر، گاڑی کے ڈرائیور اور دیگر چشم دید گواہوں کے بیانات بھی قلمبند کیے گئے، جبکہ فرانزک شواہد نے بھی ملزم کے خلاف مقدمے کو مضبوط بنایا۔
عدالت نے اپنے فیصلے میں قرار دیا کہ پیش کیے گئے شواہد کی بنیاد پر جرم بغیر کسی شک و شبہ کے ثابت ہوتا ہے، جس کے باعث ملزم سخت ترین سزا کا مستحق ہے