کاشف عباسی ,May 29 ,2026
اسلام آباد (نیوز اینڈ نیوز۔ 29 مئی 2026ء)
ملک بھر کے دریاؤں اور آبی ذخائر میں پانی کی آمد و اخراج کے تازہ اعداد و شمار جاری کر دیے گئے ہیں، جن کے مطابق بڑے دریاؤں میں پانی کے بہاؤ میں اضافہ ریکارڈ کیا گیا ہے جبکہ تربیلا اور منگلا ڈیم میں قابلِ استعمال پانی کے ذخائر بھی بہتر سطح پر موجود ہیں۔
واپڈا کی جانب سے جاری کردہ رپورٹ کے مطابق دریائے سندھ میں تربیلا کے مقام پر پانی کی آمد 67 ہزار 500 کیوسک جبکہ اخراج 90 ہزار کیوسک ریکارڈ کیا گیا۔ دریائے کابل میں نوشہرہ کے مقام پر پانی کی آمد و اخراج 39 ہزار 200 کیوسک رہی، جبکہ خیرآباد پل پر پانی کا بہاؤ ایک لاکھ 64 ہزار 800 کیوسک ریکارڈ کیا گیا۔
اسی طرح دریائے جہلم میں منگلا ڈیم کے مقام پر پانی کی آمد 35 ہزار 200 کیوسک اور اخراج 34 ہزار کیوسک رہا، جبکہ دریائے چناب میں مرالہ کے مقام پر پانی کی آمد 18 ہزار 300 کیوسک اور اخراج 7 ہزار کیوسک نوٹ کیا گیا۔
واپڈا کے مطابق تربیلا ڈیم کا کم از کم آپریٹنگ لیول 1402 فٹ ہے جبکہ موجودہ سطح 1449.50 فٹ ریکارڈ کی گئی۔ ڈیم میں پانی ذخیرہ کرنے کی زیادہ سے زیادہ سطح 1550 فٹ مقرر ہے اور اس وقت قابلِ استعمال پانی کا ذخیرہ 0.997 ملین ایکڑ فٹ موجود ہے۔
منگلا ڈیم میں پانی کی موجودہ سطح 1167.85 فٹ ریکارڈ کی گئی، جبکہ کم از کم آپریٹنگ لیول 1050 فٹ اور زیادہ سے زیادہ سطح 1242 فٹ ہے۔ منگلا ڈیم میں قابلِ استعمال پانی کا ذخیرہ 2.474 ملین ایکڑ فٹ تک پہنچ چکا ہے۔
رپورٹ کے مطابق چشمہ ڈیم کا کم از کم آپریٹنگ لیول 638.15 فٹ جبکہ موجودہ سطح 641.30 فٹ ریکارڈ کی گئی۔ چشمہ ڈیم میں قابلِ استعمال پانی کا ذخیرہ 0.049 ملین ایکڑ فٹ موجود ہے۔
ماہرین کے مطابق ملک میں درجہ حرارت میں اضافے اور شمالی علاقوں میں برف پگھلنے کے باعث دریاؤں میں پانی کے بہاؤ میں بتدریج اضافہ ہو رہا ہے، جس سے آئندہ دنوں میں آبی ذخائر مزید بہتر ہونے کی توقع ظاہر کی جا رہی ہے۔