کراچی: پاکستان گڈز ٹرانسپورٹ الائنس نے پیٹرولیم مصنوعات کی قیمتوں میں حالیہ اضافے کے بعد ملک بھر میں گڈز ٹرانسپورٹ کے کرایوں میں 5 فیصد اضافے کا اعلان کر دیا ہے۔
الائنس کے صدر ملک شہزاد اعوان نے اپنے بیان میں کہا کہ ایندھن کی قیمتوں میں مسلسل اضافہ ٹرانسپورٹرز کے لیے شدید مشکلات پیدا کر رہا ہے، جس کے باعث کرایوں میں اضافہ ناگزیر ہو گیا ہے۔
انہوں نے وفاقی حکومت سے مطالبہ کیا کہ ٹول ٹیکس، ود ہولڈنگ ٹیکس اور موٹروے و ٹریفک پولیس کے جرمانوں میں ریلیف دیا جائے تاکہ ٹرانسپورٹرز پر بوجھ کم ہو سکے۔
ان کا کہنا تھا کہ موجودہ پالیسیوں کے باعث ہزاروں ٹرانسپورٹرز اپنی گاڑیاں کھڑی کرنے پر مجبور ہو رہے ہیں جبکہ حکومتی سبسڈی ناکافی ہے۔
ملک شہزاد اعوان کے مطابق پیٹرولیم مصنوعات کی قیمتوں میں اضافے سے ایک ٹرالر کے ایک چکر پر اخراجات میں نمایاں اضافہ ہوا ہے، جس سے کاروبار متاثر ہو رہا ہے اور مہنگائی میں بھی اضافہ ہو رہا ہے۔
انہوں نے خبردار کیا کہ اگر حکومت نے اپنی معاشی پالیسیوں پر نظر ثانی نہ کی تو ملک میں گڈز ٹرانسپورٹ کا نظام متاثر ہو سکتا ہے۔