محمود احمد, JULY 21,2026
ڈھاکہ (نیوز اینڈ نیوز) — 21 جولائی 2026ء
بنگلہ دیش کی وزارتِ داخلہ نے باضابطہ اعلان کیا ہے کہ رواں ماہ سے ایسے نئے پاسپورٹس کی چھپائی شروع کی جا رہی ہے جن پر ماضی کی طرح یہ عبارت دوبارہ درج ہوگی کہ “یہ پاسپورٹ سوائے اسرائیل کے دنیا کے تمام ممالک کے لیے مؤثر ہے”۔
‘عرب نیوز’ کے مطابق، بنگلہ دیشی وزارتِ داخلہ کے ایڈیشنل سیکرٹری ڈاکٹر ضیاء الدین احمد نے بتایا کہ اس فیصلے کے اطلاق کے لیے سرکاری حکم نامہ جاری کر دیا گیا ہے۔ انہوں نے تفصیلات بتاتے ہوئے کہا کہ نئے پاسپورٹس کی چھپائی رواں جولائی کے مہینے سے شروع کر دی جائے گی اور شہریوں کو ان کا باضابطہ اجرا رواں سال اکتوبر سے متوقع ہے۔
وزارتِ داخلہ کے ترجمان نے واضح کیا کہ پاسپورٹ پر کی جانے والی یہ بنیادی تبدیلی حکومتِ بنگلہ دیش کے سیاسی موقف کی عکاسی کرتی ہے، جو دنیا بھر کو یہ واضح پیغام دیتی ہے کہ بنگلہ دیشی قوم اپنے مظلوم فلسطینی بہن بھائیوں کے ساتھ مکمل یکجہتی کے ساتھ کھڑی ہے۔ انہوں نے مزید کہا کہ یہ اقدام عوامی جذبات اور خواہشات کی حقیقی ترجمانی ہے۔
واضح رہے کہ سال 2021ء تک بنگلہ دیشی پاسپورٹ پر یہ تاریخی عبارت درج تھی، تاہم سابق وزیرِ اعظم شیخ حسینہ واجد کی حکومت نے ای-پاسپورٹ متعارف کراتے وقت اس شق کو خاموشی سے حذف کر دیا تھا۔ اکتوبر 2023ء میں غزہ میں شروع ہونے والی جنگ کے بعد سے بنگلہ دیشی عوام کی جانب سے اس شق کی فوری بحالی کے مطالبات میں شدید اضافہ دیکھنے میں آیا تھا، جس پر موجودہ حکومت نے عملدرآمد یقینی بنایا ہے۔