محمود احمد june 19,2026
ڈیلاس، امریکہ (انٹرنیشنل اسپورٹس ڈیسک/نیوز اینڈ نیوز) — 19 جون 2026ء
امریکہ، کینیڈا اور میکسیکو میں جاری فیفا فٹبال ورلڈکپ ۲۰۲۶ء کے دوران سیکیورٹی کے حوالے سے ایک انتہائی سنگین اور حیران کن ناکامی سامنے آئی ہے جہاں ڈیلاس کے اسٹیڈیم میں کھیلے گئے ایک بڑے میچ کے دوران متعدد شائقین بغیر ٹکٹ اور بغیر کسی سیکیورٹی چیکنگ کے اسٹیڈیم کے اندر داخل ہونے میں کامیاب ہو گئے، برطانوی میڈیا کی جانب سے جاری کردہ ایک تہلکہ خیز رپورٹ کے مطابق ڈیلاس میں انگلینڈ اور کروشیا کے مابین کھیلے گئے ہائی وولٹیج میچ کے دوران سیکیورٹی انتظامات کے اس وقت پرخچے اڑ گئے جب بڑی تعداد میں انگلش شائقین (فینز) انتظامیہ کو چکمہ دیتے ہوئے اسٹیڈیم کی حدود میں داخل ہو گئے، عینی شاہدین اور اسٹیڈیم میں موجود پُرامن شہریوں نے میڈیا کو بتایا کہ متعدد افراد باقاعدہ سیکیورٹی چیکس اور ٹکٹ اسکیننگ بیریئرز سے بچتے ہوئے باآسانی اسٹینڈز تک پہنچ گئے جس نے امریکہ کے بڑے سیکیورٹی دعووں کی قلعی کھول کر رکھ دی ہے۔
میچ دیکھنے کے لیے خطیر رقم خرچ کر کے باقاعدہ قانونی ٹکٹ خریدنے والے ایک برطانوی مداح نے اسٹیڈیم کے باہر کی صورتحال کو انتہائی مضحکہ خیز اور غیر ذمہ دارانہ قرار دیتے ہوئے سنسنی خیز انکشاف کیا کہ اسٹیڈیم کی ٹکٹ چیکنگ بیریئرز کے اطراف میں بڑے بڑے خلا (گیپس) موجود تھے جہاں سے بغیر ٹکٹ والے لوگ آرام سے پیدل اندر داخل ہو رہے تھے، عینی شاہد کا مزید کہنا تھا کہ وہاں چیکنگ پر موجود زیادہ تر رضاکار معمر خواتین تھیں جو رش کے باعث کسی کو بھی اندر جانے سے نہیں روک پا رہی تھیں، اس نے غصے کا اظہار کرتے ہوئے بتایا کہ ”میں نے لائن میں لگ کر اپنا ٹکٹ تو اسکین کروایا لیکن حیرت انگیز طور پر کسی بھی اہلکار نے میرے جھنڈے یا ہاتھ میں موجود ورلڈکپ ٹرافی کی نقل (ریپلیکا) تک کو چیک کرنا گوارا نہیں کیا جس سے واضح ہوتا ہے کہ تلاشی کا نظام کتنا کمزور تھا،“ عینی شاہدین کے مطابق کچھ افراد تو بغیر ٹکٹ اسکین کیے ہی سیدھے راستے سے اندر داخل ہو گئے جبکہ بعض منچلوں نے لوہے کی رکاوٹیں پھلانگ کر اندر جانے کی کوشش کی۔
واضح رہے کہ اس ہائی پروفائل میچ کے لیے امریکی انتظامیہ کی جانب سے انتہائی سخت عسکری سیکیورٹی انتظامات کا دعویٰ کیا گیا تھا جس کے تحت اسٹیڈیم کی چھتوں اور اہم مقامات پر ماہر اسنائپرز (نشانہ باز) بھی تعینات کیے گئے تھے، جبکہ ڈیلاس پولیس حکام نے بھی فخر سے کہا تھا کہ کسی بھی ہنگامی صورتحال سے نمٹنے کے لیے خصوصی تربیت یافتہ کمانڈوز اور جدید ترین اہلکار گراؤنڈ میں موجود ہیں تاہم اس کے باوجود اتنی بڑی تعداد میں لوگوں کا بغیر تلاشی کے وی آئی پی زون میں داخل ہو جانا ورلڈکپ کے بقیہ میچز کے لیے ایک تشویشناک اور سنگین سوالیہ نشان بن گیا ہے، دوسری جانب اس بڑے اسکینڈل پر پوزیشن واضح کرتے ہوئے فیفا کے مرکزی ترجمان نے روایتی دفاعی انداز اپنایا ہے اور کہا ہے کہ فی الحال انہیں کسی بھی شخص کے بغیر ٹکٹ داخل ہونے کے کوئی ٹھوس شواہد نہیں ملے جبکہ مقامی پولیس نے بھی اس پورے واقعے سے یکسر لاعلمی کا اظہار کیا ہے، تاہم سوشل میڈیا پر ویڈیوز وائرل ہونے اور برطانوی میڈیا کی رپورٹ کے بعد مہنگے ترین ٹکٹ خرید کر میچ دیکھنے والے دنیا بھر کے شائقین میں امریکی انتظامیہ کے خلاف شدید غم و غصہ پایا جا رہا ہے۔