منصور احمد, JULY 22,2026
اسلام آباد (نیوز اینڈ نیوز) — 22 جولائی 2026ء
وفاقی وزیر برائے قومی ورثہ و ثقافت اورنگزیب خان کچھی نے ‘تاریخی اصول پر اُردو لغت’ کے نظرثانی شدہ ایڈیشن کی پہلی تین جلدوں کی باقاعدہ رونمائی کرتے ہوئے اُردو زبان کے فروغ اور پاکستان کے لسانی و ثقافتی ورثے کے تحفظ کے لیے حکومت کے غیر متزلزل عزم کا اعادہ کیا ہے۔
وزارت کی جانب سے جاری کردہ اعلامیے کے مطابق، نیشنل لینگویج پروموشن ڈیپارٹمنٹ (این ایل پی ڈی) کے زیرِ اہتمام منعقدہ تقریب سے خطاب کرتے ہوئے وفاقی وزیر نے کہا کہ خوبصورت نستعلیق رسم الخط میں شائع ہونے والا یہ جدید ایڈیشن اُردو زبان کی ارتقاء کا مظہر اور آنے والی نسلوں کے لیے ایک قیمتی علمی سرمایہ ہے۔ اس موقع پر انہوں نے ممتاز ماہرِ لسانیات اور برکاتی فاؤنڈیشن کے بانی ڈاکٹر حاجی محمد رفیق پردیسی کی مالی و علمی کاوشوں کو سراہتے ہوئے انہیں پاکستان کے اعلیٰ ترین سول اعزاز کے لیے نامزد کرنے کا باضابطہ اعلان کیا۔
تقریب کے دوران لغت کی تمام 22 جلدوں کی مکمل اشاعت کے لیے وفاقی حکومت اور برکاتی فاؤنڈیشن کے درمیان ایک اہم مفاہمتی یادداشت (ایم او یو) پر دستخط بھی کیے گئے۔ وفاقی سیکرٹری برائے قومی ورثہ و ثقافت اسد رحمان گیلانی اور ڈی جی این ایل پی ڈی پروفیسر ڈاکٹر محمد سلیم مظہر نے بریفنگ دیتے ہوئے بتایا کہ تحقیقی معیار کے اعتبار سے یہ تاریخی لغت عالمی سطح کی ممتاز لغات کے ہم پلہ ہے، جس کی باقی ماندہ جلدوں پر کام اب مزید تیز رفتاری سے مکمل کیا جائے گا۔
تقریب کے اختتام پر ڈاکٹر حاجی محمد رفیق پردیسی نے وفاقی وزیر کو لغت کی شائع شدہ جلدیں اور تبرکات پیش کیے، جبکہ وفاقی وزیر نے انہیں گراں قدر لسانی خدمات کے اعتراف میں تعریفی سند سے نوازا۔