محمود احمد, September 16,2026
کراچی (نیوز اینڈ نیوز) — 16 ستمبر 2026ء
پاکستان پیٹرولیم ڈیلرز ایسوسی ایشن (پی پی ڈی اے) نے وزیراعظم شہباز شریف کی جانب سے موٹر سائیکلوں، رکشوں اور 800 سی سی تک کی چھوٹی گاڑیوں کے لیے اعلان کردہ ‘پیٹرول ریلیف اسکیم’ کا خیرمقدم کرتے ہوئے اس کے عملی اور مالیاتی طریقہ کار پر شدید تحفظات کا اظہار کر دیا ہے۔
ایسوسی ایشن کا کہنا ہے کہ کم آمدن عوام کو مہنگائی کے دور میں ریلیف فراہم کرنے کا حکومتی مقصد بلاشبہ قابلِ قدر ہے، تاہم اسکیم پر ملک گیر عملدرآمد سے قبل پیٹرولیم ڈیلرز کو اعتماد میں نہ لیا گیا تو اس کے عملی اور مالی اثرات پمپس مالکان اور ڈیلرز کے لیے شدید مشکلات پیدا کر سکتے ہیں۔
حکومت کی جانب سے جاری کردہ اسکیم کے تحت دو اور تین پہیوں والی گاڑیوں کو 100 روپے فی لیٹر کے حساب سے ماہانہ مقررہ مقدار میں سبسڈی دی جا رہی ہے، جبکہ 800 سی سی تک گاڑیوں کے لیے بھی 100 روپے فی لیٹر رعایت مقرر کی گئی ہے۔ اقتصادی رابطہ کمیٹی (ECC) نے اس سکیم کے لیے 75 ارب روپے کی تکنیکی ضمنی گرانٹ کی منظور ی دے دی ہے۔
پی پی ڈی اے کے چیئرمین ملک خدا بخش نے ایسوسی ایشن کے دیگر عہدیداروں کے ہمراہ پریس کانفرنس سے خطاب کرتے ہوئے کہا کہ حکومت کی جانب سے عوام کو ریلیف دینے کی نیت کا احترام کرتے ہیں، تاہم ڈیلرز پہلے ہی بڑھتی ہوئی کاروباری لاگت، بجلی کے بھاری بلوں اور محدود پرافٹ مارجن کی وجہ سے شدید مالی دباؤ کا شکار ہیں۔ ان کے مطابق اگر ڈیلرز کو پہلے اپنی جیب اور سرمائے سے رعایتی پیٹرول فراہم کرنا پڑا اور بعد میں حکومتی ادائیگیوں کا عمل تاخیر یا بیوروکریٹک طریقہ کار کی نذر ہوا، تو ڈیلرز کا سرمایہ ڈوبنے کا خطرہ ہے۔
پی پی ڈی اے سندھ ریجن کے چیئرمین امیر خان نے اعتراض اٹھاتے ہوئے کہا کہ پیٹرول پمپس پر گاڑیوں کے سی سی اور دستاویزات کی اضافی چیکنگ سے پمپس پر رش، بدنظمی اور گاہکوں کے انتظار کا وقت بڑھے گا۔ ڈیلرز کی تنظیم کا مطالبہ ہے کہ اسکیم پر عملدرآمد سے قبل ڈیلرز کے ساتھ بیٹھ کر باہمی مشاورت کی جائے۔
ایسوسی ایشن کے مطابق ملک بھر میں تقریباً 14 ہزار پیٹرولیم ڈیلرز اس شعبے سے منسلک ہیں اور ان کی ادائیگیوں کا شفاف نظام بنانا لازمی ہے۔ دوسری جانب حکومت نے اسکیم کو شفاف بنانے کے لیے ‘ڈیجیٹل فیول پاس سسٹم’ متعارف کرانے کا فیصلہ کیا ہے تاکہ مستحق صارفین کو براہِ راست اور شفاف انداز میں ریلیف کی منتقلی یقینی بنائی جا سکے۔ پی پی ڈی اے نے مطالبہ کیا ہے کہ حکومت ڈیلرز کے سرمائے کے تحفظ کی ضمانت دے کر ہی اسکیم کا باضابطہ آغاز کرے۔
نیوز اینڈ نیوز کی وضاحت:
یہ خبر پاکستان پیٹرولیم ڈیلرز ایسوسی ایشن (پی پی ڈی اے) کراچی کی پریس کانفرنس، وزارتِ خزانہ اور اقتصادی رابطہ کمیٹی کے باضابطہ فیصلوں کے مطابق مرتب کی گئی ہے۔
ماخذ: پاکستان پیٹرولیم ڈیلرز ایسوسی ایشن میڈیا سیل، کراچی ڈیسک۔