منصور احمد june 23,2026
کوئٹہ ( نیوز اینڈ نیوز) — 23 جون 2026ء
گورنر بلوچستان جعفر خان مندوخیل نے صوبہ سندھ کے دارالحکومت کراچی میں چین کے قائم مقام قونصل جنرل فینگ دہینگ سے ایک اہم اور مقتدر ملاقات کی ہے۔ اس اعلیٰ سطحی ملاقات کے دوران پاک چین اقتصادی راہداری، گوادر پورٹ کی فعالیت، تعلیمی شعبے میں تعاون اور خطے کی مجموعی صورتحال پر تفصیلی تبادلہ خیال کیا گیا۔ ملاقات میں چائنیز پولیٹیکل ڈائریکٹر فینگ دہینگ اور وانگ ژاؤشیانگ بھی موجود تھے۔ گفتگو کرتے ہوئے گورنر بلوچستان نے واضح کیا کہ گوادر پورٹ کی حقیقی ترقی اور فعالیت ایک خاموش معاشی انقلاب بن کر ابھرے گی اور یہ ایک ایسا گیٹ وے ہے جو پاکستان کو عالمی اقتصادی اور تجارتی سرگرمیوں کے مرکز میں بدل دے گا۔
گورنر جعفر خان مندوخیل کا کہنا تھا کہ وسطی ایشیا سے لے کر جنوبی ایشیا تک اور پورے مشرقِ وسطیٰ میں پاکستان ایک تزویراتی پل کا کردار ادا کرنے کی مکمل صلاحیت رکھتا ہے، جو پورے خطے کی معاشی منڈیوں، ثقافتوں اور صنعتوں کو آپس میں مربوط کرے گا۔ انہوں نے یاد دلایا کہ پاکستان اور چین کے سیاسی و سفارتی تعلقات کی پچھترویں سالگرہ منائی جا چکی ہے، جو دونوں ممالک کی پائیدار دوستی اور لازوال طاقت کا منہ بولتا ثبوت ہے۔ گورنر بلوچستان نے چینی حکام پر زور دیا کہ چین چونکہ مصنوعی ذہانت اور جدید ٹیکنالوجی میں وسیع علم و تجربہ رکھتا ہے، اس لیے چین کی یہ مہارت بلوچستان کی نئی نسل کی فکری رہنمائی میں اہم کردار ادا کر سکتی ہے۔ انہوں نے چینی حکومت سے پبلک سیکٹر یونیورسٹیوں کے طلبہ کے لیے اسکالرشپس اور عالمی معیار کی تعلیم کے مواقع فراہم کرنے کی مقتدر اپیل کی۔
ملاقات کے دوران چین کے قائم مقام قونصل جنرل فینگ دہینگ نے پاکستان کی خارجہ پالیسی کو زبردست خراجِ تحسین پیش کرتے ہوئے کہا کہ پاکستان نے عالمی سطح پر اپنی غیر معمولی سفارتی صلاحیت کا مظاہرہ کرتے ہوئے تقریباً نصف صدی کے بعد امریکہ اور ایران دونوں کو مذاکرات کی میز پر لانے میں تاریخی کامیابی حاصل کی ہے۔ اس عظیم سفارتی کارنامے نے نہ صرف عالمی سطح پر پاکستان کا قد بلند کیا ہے بلکہ سفارت کاری کی تاریخ میں ایک نیا باب بھی رقم کیا ہے۔ انہوں نے عزم ظاہر کیا کہ چین پورے بلوچستان میں گوادر سے لے کر ژوب تک کے انفراسٹرکچر کو مضبوط بنانے، معاشی سرگرمیوں میں اضافے اور یہاں کے لوگوں کا معیارِ زندگی بلند کرنے کے لیے سرمایہ کاری میں گہری دلچسپی رکھتا ہے۔ گورنر بلوچستان نے چینی حکومت اور عوام کا شکریہ ادا کیا اور دونوں رہنماؤں نے عوامی سطح پر روابط کو مزید بڑھانے پر مکمل اتفاق کیا۔