محمود احمد june 18,2026
لندن (اسپورٹس ڈیسک/نیوز اینڈ نیوز) — 18 جون 2026ء
دنیائے ٹینس کے سب سے معتبر اور رواں سال کے تیسرے بڑے گرینڈ سلام ومبلڈن اوپن ٹینس ٹورنامنٹ کا ۱۳۹ واں ایڈیشن ۲۹ جون سے انگلینڈ کے تاریخی میدانوں میں شروع ہونے جا رہا ہے، لندن سے برطانوی نشریاتی ادارے (بی بی سی) کے حوالے سے حاصل ہونے والی تفصیلات کے مطابق ومبلڈن اوپن کی آرگنائزنگ کمیٹی نے تصدیق کی ہے کہ اس میگا ایونٹ کے کامیاب انعقاد کے لیے تمام تر تیاریاں اپنے عروج پر پہنچ چکی ہیں اور یہ شاندار عالمی ٹورنامنٹ روایتی طور پر آل انگلینڈ لان ٹینس اور کروکٹ کلب ومبلڈن کے مشہورِ زمانہ گراس کورٹ (گھاس کے میدان) پر کھیلا جائے گا جس میں دنیا کے نامور اور مایہ ناز ٹینس اسٹارز ٹائٹل کے حصول کے لیے کورٹ میں آمنے سامنے ہوں گے، انتظامیہ کے مطابق اس بار میگا ایونٹ میں مینز سنگلز، ویمنز سنگلز، مینز ڈبلز، ویمنز ڈبلز اور مکسڈ ڈبلز کے زبردست مقابلے دیکھنے کو ملیں گے، اس بار اٹلی کے نامور ٹینس سٹار جینک سنر مینز سنگلز مقابلوں میں اپنے چیمپیئن ہونے کے اعزاز کا دفاع کریں گے جبکہ خواتین کے سنگلز مقابلوں میں پولینڈ کی مایہ ناز کھلاڑی آئیگا سویٹیک اپنے اعزاز کی بقا کے لیے کورٹ میں اتریں گی جنہوں نے ۲۰۲۵ء کا ویمنز سنگلز ٹائٹل اپنے نام کیا تھا۔
دوسری جانب اگر ڈبلز مقابلوں کی بات کی جائے تو مینز ڈبلز میں جولین کیش اور لائیڈ گلاسپول پر مشتمل برطانوی جوڑی ایک بار پھر ہوم گراؤنڈ پر اپنے اعزاز کے دفاع کے لیے بھرپور کوشش کرے گی جبکہ ویمنز ڈبلز مقابلوں میں روس کی نامور ٹینس کھلاڑی ویرونیکا کدرمیٹووا اور ان کی بیلجیم کی مضبوط جوڑی دار ایلیس مرٹینز اپنے عالمی ٹائٹل کو بچانے کے لیے حریف کھلاڑیوں کے خلاف پنجہ آزمائی کرتی دکھائی دیں گی، شیڈول کے مطابق رواں سال کا یہ تیسرا بڑا گرینڈ سلام میگا ایونٹ ۲۹ جون سے باقاعدہ شروع ہو کر مسلسل ۱۴ دن تک جاری رہنے کے بعد ۱۲ جولائی کو اپنے شاندار اختتام کو پہنچے گا، ومبلڈن ٹورنامنٹ کی انتظامیہ نے دنیا بھر کے کھلاڑیوں کے لیے ایک اور بڑی خوشخبری سناتے ہوئے اعلان کیا ہے کہ اس بار ومبلڈن اوپن ٹینس کے لیے مجموعی طور پر ۶ کروڑ ۴۲ لاکھ پاؤنڈ کی خطیر انعامی رقم مختص کی گئی ہے جو کہ گزشتہ ۲۰۲۵ء کے ایڈیشن کے مقابلے میں پورے ۲۰ فیصد زیادہ ہے اور یہ خطیر رقم ٹورنامنٹ کی طویل تاریخ میں سال بہ سال ہونے والا سب سے بڑا اور تاریخی مالیاتی اضافہ ہے جس نے دنیا بھر کے کھلاڑیوں کا جوش و خروش مزید بڑھا دیا ہے۔