منصور احمد ,May 30,2026
راولپنڈی (نیوز اینڈ نیوز۔ 30 مئی 2026ء)
پاکستان اور آسٹریلیا کے درمیان سیریز کے پہلے ایک روزہ بین الاقوامی میچ کے موقع پر راولپنڈی پولیس نے سکیورٹی اور ٹریفک کے خصوصی اور جامع انتظامات مکمل کر لیے ہیں۔ شائقین کرکٹ، کھلاڑیوں اور آفیشلز کی حفاظت کو یقینی بنانے کے لیے شہر بھر میں ہائی الرٹ سکیورٹی پلان نافذ کر دیا گیا ہے۔
سی پی او راولپنڈی سید خالد محمود ہمدانی۔ کی ہدایت پر راولپنڈی کرکٹ اسٹیڈیم اور اس کے اطراف فول پروف سکیورٹی حصار میں تبدیل کر دیے گئے ہیں۔ میچ کے دوران امن و امان برقرار رکھنے کے لیے راولپنڈی پولیس کے 4 ہزار 500 سے زائد افسران اور اہلکار مختلف مقامات پر فرائض انجام دے رہے ہیں۔
پولیس حکام کے مطابق سینئر افسران خود فیلڈ میں موجود رہ کر سکیورٹی انتظامات کی نگرانی کر رہے ہیں اور ڈیوٹی پر تعینات اہلکاروں کو مسلسل بریفنگ دی جا رہی ہے۔ اسٹیڈیم کے اطراف موجود اہم عمارتوں پر روف ٹاپ سنائپرز بھی تعینات کیے گئے ہیں تاکہ کسی بھی ممکنہ خطرے سے بروقت نمٹا جا سکے۔
سکیورٹی صورتحال کی نگرانی کے لیے جدید سیف سٹی کیمروں اور دیگر سی سی ٹی وی نظام کو فعال کر دیا گیا ہے جبکہ ایک خصوصی کنٹرول روم بھی قائم کیا گیا ہے جہاں سے تمام سرگرمیوں پر مسلسل نظر رکھی جا رہی ہے۔
اس کے علاوہ متعلقہ تھانوں کی موبائل گاڑیاں، ایلیٹ فورس اور ڈولفن فورس کے دستے اسٹیڈیم اور گرد و نواح میں مسلسل گشت کر رہے ہیں تاکہ کسی بھی ہنگامی صورتحال میں فوری ردعمل دیا جا سکے۔
شائقین کرکٹ کی سہولت کے لیے خصوصی ٹریفک پلان بھی نافذ کیا گیا ہے جس کے تحت مختلف شاہراہوں پر ٹریفک کی روانی برقرار رکھنے اور پارکنگ کے مناسب انتظامات یقینی بنائے گئے ہیں۔ پولیس نے شہریوں اور شائقین سے اپیل کی ہے کہ وہ ٹریفک پلان اور سکیورٹی ہدایات پر عمل کریں تاکہ میچ کے دوران کسی قسم کی دشواری کا سامنا نہ کرنا پڑے۔
سی پی او سید خالد محمود ہمدانی کا کہنا ہے کہ پاک آسٹریلیا سیریز کے پہلے ون ڈے میچ کے لیے تمام سکیورٹی انتظامات بین الاقوامی معیار کے مطابق کیے گئے ہیں اور کھلاڑیوں، آفیشلز اور شائقین کو محفوظ ماحول فراہم کرنا راولپنڈی پولیس کی اولین ترجیح ہے۔
نیوز اینڈ نیوز کے مطابق راولپنڈی میں کرکٹ کے اس بڑے مقابلے کے لیے سکیورٹی ادارے مکمل طور پر متحرک ہیں جبکہ شائقین کرکٹ ایک محفوظ اور پرجوش ماحول میں میچ سے لطف اندوز ہوں گے۔