منصور احمد ,May 30,2026
لندن/برلن (نیوز اینڈ نیوز۔ ٣٠ مئی 2026ء)
لندن/برلن: کھیلوں کی دنیا میں ایک بار پھر پاکستان کا نام روشن ہو گیا۔ پاکستانی نژاد برطانوی باکسر حمزہ شیراز نے شاندار کارکردگی کا مظاہرہ کرتے ہوئے عالمی باکسنگ چیمپئن بننے کا اعزاز حاصل کر لیا۔ حمزہ شیراز نے جرمنی کے حریف باکسر ایلم بیگچ کو دوسرے راؤنڈ میں ناک آؤٹ کر کے ڈبلیو بی او سپر مڈل ویٹ عالمی ٹائٹل اپنے نام کر لیا۔
26 سالہ حمزہ شیراز نے فائٹ کے آغاز سے ہی جارحانہ انداز اپنایا اور مسلسل درست و طاقتور پنچز کے ذریعے اپنے جرمن حریف کو دفاعی پوزیشن اختیار کرنے پر مجبور کر دیا۔ مقابلے کے دوسرے راؤنڈ میں حمزہ شیراز کے خطرناک لیفٹ ہک نے ایلم بیگچ کو شدید نقصان پہنچایا، جس کے بعد وہ سنبھل نہ سکے اور ریفری نے مقابلہ فوری طور پر روک کر حمزہ شیراز کو فاتح قرار دے دیا۔
اس تاریخی کامیابی کے ساتھ حمزہ شیراز نے ریٹائر ہونے والے عالمی شہرت یافتہ باکسر ٹیرنس کرافورڈ کی خالی کردہ ڈبلیو بی او سپر مڈل ویٹ چیمپئن شپ بیلٹ جیت لی اور اپنے کیریئر کا سب سے بڑا اعزاز حاصل کیا۔
کامیابی کے بعد جذباتی منظر بھی دیکھنے میں آیا جب حمزہ شیراز نے رنگ میں سجدۂ شکر ادا کیا اور اپنی ٹیم کے ہمراہ تاریخی فتح کا جشن منایا۔ میڈیا سے گفتگو کرتے ہوئے انہوں نے کہا کہ عالمی چیمپئن بننا ان کے کیریئر کا ایک اہم سنگ میل ہے اور اب وہ 168 پاؤنڈ کیٹیگری کے تمام بڑے عالمی باکسرز کا مقابلہ کرنے کے لیے مکمل طور پر تیار ہیں۔
حمزہ شیراز اس سے قبل بھی بین الاقوامی سطح پر نمایاں کامیابیاں حاصل کر چکے ہیں۔ ستمبر 2024 میں انہوں نے ٹائلر ڈینی کو شکست دے کر یورپی مڈل ویٹ ٹائٹل اپنے نام کیا تھا، جبکہ اب عالمی چیمپئن بن کر انہوں نے اپنے کیریئر کو نئی بلندیوں تک پہنچا دیا ہے۔
حمزہ شیراز کی اس شاندار کامیابی پر پاکستان اور برطانیہ سمیت دنیا بھر میں موجود پاکستانی کمیونٹی نے خوشی کا اظہار کیا ہے۔ سوشل میڈیا پر صارفین نے انہیں مبارکباد دیتے ہوئے اس کامیابی کو پاکستان کے لیے باعثِ فخر قرار دیا ہے۔ کھیلوں کے حلقوں کا کہنا ہے کہ حمزہ شیراز کی یہ تاریخی فتح نوجوان کھلاڑیوں کے لیے ایک نئی امید اور تحریک بنے گی۔
نیوز اینڈ نیوز کے مطابق عالمی باکسنگ چیمپئن بننے والے حمزہ شیراز نے نہ صرف اپنے خاندان اور مداحوں کا سر فخر سے بلند کیا بلکہ دنیا بھر میں پاکستانی قوم کا نام بھی روشن کر دیا ہے۔