روزینہ اسماعیل, JULY 14,2026
اسلام آباد (نیوز اینڈ نیوز) — 14 جولائی 2026ء
وفاقی وزیر برائے قومی صحت سید مصطفیٰ کمال نے واضح کیا ہے کہ پاکستان انسٹی ٹیوٹ آف میڈیکل سائنسز (پمز) ملک کا سب سے بڑا ریفرل ہسپتال ہے جہاں روزانہ 7 سے 9 ہزار مریض علاج کے لیے آتے ہیں، جبکہ مریضوں اور تیمارداروں کی مجموعی آمد و رفت روزانہ 30 سے 40 ہزار تک پہنچ جاتی ہے۔ منگل کے روز جاری کردہ ایک مقتدر بیان میں وفاقی وزیرِ صحت نے بڑے ہسپتالوں پر مریضوں کے بڑھتے ہوئے دباؤ کو کم کرنے کے لیے حکومتی حکمتِ عملی کا اعلان کرتے ہوئے بتایا کہ وفاقی حکومت اسلام آباد میں 28 بنیادی مراکزِ صحت کو فعال اور جدید بنانے پر ہنگامی بنیادوں پر کام کر رہی ہے تاکہ عام بیماریوں کا علاج مقامی سطح پر ہی ممکن بنایا جا سکے اور پمز جیسے بڑے طبی اداروں پر بوجھ کم ہو۔
سید مصطفیٰ کمال نے وفاقی دارالحکومت کے باسیوں اور ملک بھر سے آنے والے مریضوں کے لیے بڑی خوشخبری سناتے ہوئے بتایا کہ پمز میں پاکستان کے پہلے سرکاری شعبے کے مقتدر ‘پلسڈ فیلڈ ایبلیشن پروگرام’ اور پمز کارڈیک سینٹر کی اپ گریڈیشن کے پہلے مرحلے کی تعمیری تکمیل کر دی گئی ہے، جبکہ ایمرجنسی ڈیپارٹمنٹ میں مریضوں کی رہنمائی کے لیے ‘پیشنٹ فیسلیٹیشن اسسٹنٹ سروس’ کا بھی باقاعدہ آغاز کر دیا گیا ہے۔ انہوں نے بتایا کہ پمز کارڈیک سینٹر کی توسیع کے منصوبے پر 7.2 ارب روپے لاگت آئی ہے جبکہ مزید 90 کروڑ روپے کی خطیر سرمایہ کاری سے اسے دنیا کی جدید ترین کارڈیک ٹیکنالوجی سے آراستہ کیا گیا ہے جہاں غریب اور مستحق مریضوں کو بالکل مفت علاج فراہم کیا جائے گا۔
وفاقی وزیرِ صحت نے مزید بتایا کہ اس جدید پروگرام کے تحت دل کے امراض (دل کی دھڑکن کی بے ترتیبی) میں مبتلا 4 مریضوں کا دنیا کی جدید ترین کیتھیٹر ایبلیشن ٹیکنالوجی کے ذریعے کامیاب علاج مکمل کر لیا گیا ہے، جن میں اسلام آباد، آزاد کشمیر اور مردان سے تعلق رکھنے والے مستحق افراد شامل تھے۔ پمز کے طبی ماہرین کے مطابق، پلسڈ فیلڈ ایبلیشن روایتی ریڈیو فریکوئنسی اور کریو ایبلیشن کے مقابلے میں کئی گنا زیادہ محفوظ، موثر اور تیز رفتار طریقہ علاج ہے، جس میں دل کے اردگرد کے صحت مند ٹشوز کو کم سے کم نقصان پہنچتا ہے، پیچیدگیوں کا خطرہ نہ ہونے کے برابر ہوتا ہے اور مریض انتہائی جلد صحت یاب ہو کر اپنے گھر منتقل ہو جاتا ہے۔