محمود احمد May20,2026
نیوز اینڈ نیوز:اسلام آباد
وفاقی وزیرِ قانون اعظم نذیر تارڑ نے انمول عرف پنکی منشیات کیس اور سوشل میڈیا پر گردش کرنے والی خبروں پر سخت ردِعمل دیتے ہوئے کہا ہے کہ ملزمہ کو غیر ضروری میڈیا کوریج دی گئی، جبکہ بعض عناصر دانستہ طور پر مشہور شخصیات کے نام لے کر اصل کیس سے توجہ ہٹانے کی کوشش کر رہے ہیں۔
ایوانِ بالا میں خطاب کرتے ہوئے اعظم نذیر تارڑ نے کہا کہ سوشل میڈیا پر بے بنیاد الزامات اور جھوٹی خبریں پھیلانے والوں کے خلاف سخت قانونی کارروائی کی جائے گی۔ انہوں نے واضح کیا کہ حکومت کسی کو بھی یہ اجازت نہیں دے سکتی کہ وہ سنسنی پھیلانے یا قانون سے بچنے کے لیے معزز شخصیات کی ساکھ کو نقصان پہنچائے۔
وفاقی وزیرِ قانون نے سابق اسپیکر قومی اسمبلی راجہ پرویز اشرف کے خلاف سوشل میڈیا پر چلنے والی خبروں کو مسترد کرتے ہوئے کہا کہ پوری پارلیمنٹ ان کے ساتھ کھڑی ہے اور کوئی بھی باشعور پاکستانی “شوشہ نیوز” پر یقین نہیں رکھتا۔
انہوں نے کہا کہ بعض عناصر تفتیشی عمل کو متنازع بنانے اور عوام کی توجہ اصل مقدمے سے ہٹانے کے لیے جان بوجھ کر معروف شخصیات کے نام استعمال کر رہے ہیں۔ اعظم نذیر تارڑ نے سوال اٹھایا کہ “کیا اس ملک میں کوئی اور مسئلہ باقی نہیں رہ گیا کہ ایک ملزمہ کو مسلسل غیر ضروری کوریج دی جا رہی ہے؟”
انہوں نے ایوان کو یقین دلایا کہ حکومت منشیات فروشی جیسے سنگین جرائم کے خلاف زیرو ٹالرنس پالیسی پر عمل پیرا ہے، تاہم قانون کے نام پر کسی کی کردار کشی یا سیاسی مقاصد کے لیے بے بنیاد مہم برداشت نہیں کی جائے گی۔
اعظم نذیر تارڑ کا کہنا تھا کہ جھوٹے پروپیگنڈے اور افواہوں کے ذریعے قانون کی گرفت سے بچنا ممکن نہیں، ریاست ایسے عناصر کے خلاف مؤثر قانونی اقدامات کرے گی۔