محمود احمد May16,2026
کراچی (نیوز اینڈ نیوز)
کراچی کے صرافہ بازار میں ایف آئی اے کے چھاپے کے دوران پیش آنے والے واقعے کا ڈائریکٹر جنرل ایف آئی اے ڈاکٹر عثمان انور نے نوٹس لے لیا۔
ڈی جی ایف آئی اے نے ڈائریکٹر کراچی زون کو واقعے کی مکمل انکوائری کے احکامات جاری کرتے ہوئے اڑتالیس گھنٹوں میں جامع رپورٹ طلب کر لی ہے۔
تفصیلات کے مطابق کراچی صدر میں ایف آئی اے کی جانب سے جیولرز کی دکانوں پر چھاپے مارے گئے، جس کے بعد صورتحال کشیدہ ہوگئی۔
کارروائی کے دوران ایک جیولر اور دکان میں موجود دیگر افراد کے ساتھ مبینہ تشدد اور ناروا سلوک کے الزامات بھی سامنے آئے، جس پر تاجر برادری نے شدید احتجاج کیا اور سڑک بلاک کر دی۔
واقعے کے بعد صرافہ بازار اور تاجر تنظیموں کی جانب سے ایف آئی اے کی کارروائی کے طریقہ کار پر سخت تحفظات کا اظہار کیا گیا۔
ذرائع کے مطابق ڈی جی ایف آئی اے ڈاکٹر عثمان انور نے معاملے کا فوری نوٹس لیتے ہوئے ہدایت کی ہے کہ چھاپے کے دوران اختیار کیے گئے طریقہ کار اور سامنے آنے والے تمام الزامات کا تفصیلی جائزہ لیا جائے۔
انہوں نے واضح کیا کہ اگر کسی اہلکار کی غفلت، اختیارات سے تجاوز یا بدسلوکی ثابت ہوئی تو متعلقہ افراد کے خلاف قانون کے مطابق سخت کارروائی کی جائے گی۔
.ادھر تاجر برادری نے مطالبہ کیا ہے کہ واقعے کی شفاف تحقیقات کی جائیں اور ذمہ دار اہلکاروں کو انصاف کے کٹہرے میں لایا جائے