کاشف عباسی , JULY 18,026
وانا/اسلام آباد (نیوز اینڈ نیوز) — 18 جولائی 2026ء
سکیورٹی فورسز نے دہشت گردی کے خلاف جنگ میں ایک اور بڑی کامیابی حاصل کرتے ہوئے انٹیلیجنس پر مبنی انتہائی حساس آپریشن کے ذریعے وانا اور اس کے گردونواح کی شہری آبادی کو ایک ہولناک اور بڑی ممکنہ تباہی سے بچا لیا ہے۔ سکیورٹی ذرائع کے مطابق، فورسز نے جنوبی وزیرستان لوئر کے اہم علاقے وانا (غواخوا) میں بارودی مواد سے بھری ایک مشکوک گاڑی کو خودکش حملے سے پہلے ہی مؤثر کارروائی کرتے ہوئے تباہ کر دیا۔
سکیورٹی ذرائع کی جانب سے جاری کردہ تفصیلات کے مطابق، دہشت گردوں کی اس گاڑی میں بھاری مقدار میں دھماکا خیز مواد نصب تھا، جسے کسی بڑے شہر یا اہم تزویراتی ہدف پر خودکش حملے کے لیے استعمال کیا جانا تھا۔ سکیورٹی فورسز نے معصوم شہریوں کی جان و مال کے تحفظ کو ہر صورت یقینی بنانے کے لیے انتہائی اعلیٰ پیشہ ورانہ مہارت کا مظاہرہ کیا۔ فورسز نے بارود اور موٹر سائیکل سے لیس اس خودکش گاڑی کی مسلسل تین روز تک انتہائی خفیہ نگرانی کی، اور جیسے ہی یہ گاڑی شہری آبادی اور رہائشی علاقے سے دور ایک الگ تھلگ مقام پر پہنچی، تو فورسز نے اسے نشانہ بنا کر اڑا دیا۔
سکیورٹی فورسز کی اس کامیاب اور بروقت کارروائی کے نتیجے میں بارود سے بھری خودکش گاڑی اور سیکیورٹی میں شامل موٹر سائیکل مکمل طور پر تباہ ہو گئی، جبکہ ایک خارجی موقع پر ہی جہنم واصل ہوا اور 5 دہشت گرد شدید زخمی ہو گئے۔ قبائلی عوام نے سکیورٹی فورسز کے اس دلیرانہ اقدام کو بھرپور انداز میں سراہا ہے جس نے وانا کو ایک خونی حادثے سے محفوظ رکھا۔ سکیورٹی ذرائع کا کہنا ہے کہ دہشت گردی کے نیٹ ورکس کے خلاف یہ کامیاب آپریشن اس بات کا واضح اور ناقابلِ تردید ثبوت ہے کہ ہماری فورسز ملکی امن کے دشمن عناصر کے خلاف سیسہ پلائی ہوئی دیوار ہیں اور وطنِ عزیز سے دہشت گردی کے مکمل خاتمے تک چین سے نہیں بیٹھیں گی۔