محمود احمد, August 25,2026
سنگاپور/جکارتہ (نیوز اینڈ نیوز) — 25 اگست 2026ء
انڈونیشیا، ملائیشیا اور سنگاپور نے منگل کے روز آبنائے ملاکا اور سنگاپور کو بین الاقوامی بحری تجارت اور جہاز رانی کے لیے آزاد، کھلی اور محفوظ گزرگاہوں کے طور پر برقرار رکھنے کے اپنے عزم کا دوبارہ اعادہ کیا ہے۔
چینی خبر رساں ادارے ‘شنہوا’ کی رپورٹ کے مطابق سنگاپور میں منعقدہ 17ویں تعاون فورم کے موقع پر تینوں ساحلی ممالک نے ان اہم بحری گزرگاہوں کی بین الاقوامی اہمیت پر تبادلہ خیال کیا۔ اجلاس کے اختتام پر جاری کیے گئے مشترکہ اعلامیے میں اس بات کی تصدیق کی گئی کہ 1982ء کے اقوامِ متحدہ کے کنونشن برائے قانونِ سمندر اور بین الاقوامی قانون کے مطابق تمام بحری جہازوں کو ان حدود سے بلا تعطل گزرنے کا بنیادی حق (حقِ عبوری گزر) حاصل ہے، اور یہ تینوں ممالک ہر سطح پر جہاز رانی کی آزادیوں کا احترام کرتے ہیں۔
انڈونیشیا کے ڈائریکٹوریٹ جنرل آف سی ٹرانسپورٹیشن، ملائیشیا کے میرین ڈیپارٹمنٹ اور سنگاپور کی میری ٹائم اینڈ پورٹ اتھارٹی کی جانب سے جاری کردہ موقف میں واضح کیا گیا کہ ان بحری راستوں سے فائدہ اٹھانے والے ممالک، بین الاقوامی تنظیموں اور سمندری صنعت سے وابستہ تمام فریقین کو بھی آمدورفت کی سلامتی، حفاظت اور ماحولیاتی تحفظ کو یقینی بنانے میں اپنا متحرک اور ذمہ دارانہ کردار ادا کرنا ہو گا۔