محمود احمد, JULY 21,2026
ابوظہبی/دبئی (نیوز اینڈ نیوز) — 21 جولائی 2026ء
متحدہ عرب امارات کی معروف عالمی فضائی کمپنی ‘فلائی دبئی’ نے شام کے دوسرے بڑے اور تاریخی شہر ‘حلب’ کے لیے روزانہ کی بنیاد پر براہِ راست پروازیں شروع کر دی ہیں۔ دمشق کے بعد حلب، شام کے اندر ایئرلائن کی دوسری مرکزی منزل بن گئی ہے۔
اماراتی نیوز ایجنسی ‘وام’ کے مطابق، فلائی دبئی کے چیف کمرشل آفیسر حمد عبیداللہ نے تفصیلات بتاتے ہوئے بتایا کہ افتتاحی پرواز پیر کے روز دبئی انٹرنیشنل ایئرپورٹ کے ٹرمینل 3 سے باقاعدہ روانہ ہوئی۔ حلب انٹرنیشنل ایئرپورٹ پر طیارے کے اترتے ہی اسے روایتی ‘واٹر کینن’ سے سلامی دی گئی اور مقامی حکام نے مسافروں کا پرُتپاک استقبال کیا۔
ایئرلائن حکام کے مطابق، یہ نئی فلائٹ سروس متحدہ عرب امارات اور شام کے درمیان معاشی و تجارتی رابطوں کو مزید مستحکم کرنے کے ساتھ ساتھ کاروباری شخصیات، سیاحوں اور تارکینِ وطن کو بہترین سہولیات فراہم کرے گی۔ خاص طور پر موسمِ گرما کے دوران خلیجی ممالک (جی سی سی) میں مقیم شامی برادری کو اپنے وطن جانے کے لیے ایک آسان اور بااعتماد ذریعہ میسر آئے گا۔ حلب کے لیے یہ نئی فلائٹ ڈائریکٹ سروس دمشق کے لیے فلائی دبئی کی پہلے سے جاری یومیہ تین پروازوں کے علاوہ ہوگی۔
حمد عبیداللہ نے مزید بتایا کہ حلب کے لیے پروازیں ‘فلائی دبئی’ اور ‘ایمریٹس’ کے مشترکہ کوڈ شیئر معاہدے کے تحت چلائی جا رہی ہیں اور تمام پروازیں روزانہ کی بنیاد پر دبئی کے ٹرمینل 3 سے آپریشنل ہوں گی۔ انہوں نے انکشاف کیا کہ ایئرلائن اپنے عالمی نیٹ ورک کو تیزی سے وسعت دے رہی ہے؛ بنکاک اور لیبیا کے شہر بن غازی کے بعد حلب کا اضافہ اسی سلسلے کی کڑی ہے، جبکہ 23 ستمبر 2026ء سے نیپال کے شہر پوکھرا کے لیے بھی فلائی دبئی کی نئی پروازوں کا باقاعدہ آغاز کر دیا جائے گا۔