محمود احمد, September 18,2026
تہران (نیوز اینڈ نیوز) — 18 ستمبر 2026ء
ایران کے دارالحکومت تہران میں حکومت کی جانب سے ’جان فدا ایران‘ کے عنوان سے ایک عظیم الشان عوامی و عسکری اجتماع کا انعقاد کیا گیا ہے، جس میں شہریوں، منظم رضاکار دستوں اور سکیورٹی و عسکری اداروں سے وابستہ افراد نے بڑی تعداد میں شرکت کی۔ ایرانی ذرائع کے مطابق یہ اہم اجتماع حالیہ امریکا اور اسرائیل کے ساتھ جنگ کے بعد ملک کی دفاعی تیاری، حربی صلاحیت اور قومی یکجہتی کے باضابطہ اظہار کے طور پر منعقد کیا گیا ہے۔
ایرانی میڈیا رپورٹس کے مطابق اس وسیع مشق اور عوامی اجتماع کی براہِ راست نگرانی پاسدارانِ انقلاب اسلامی کی جانب سے کی جا رہی ہے۔ تہران میں پاسدارانِ انقلاب کے محمد رسول اللہ کور کے کمانڈر حسن حسن زادہ کے مطابق مرکزی اجتماع تاریخی انقلاب اسکوائر کے اطراف میں منعقد ہوا، جہاں مختلف عسکری و رضاکار دستوں کو علی الصبح سے مقررہ مقامات پر پہنچنے کی ہدایت کی گئی تھی۔ عسکری ذرائع نے اس کارروائی کو دارالحکومت تہران کی تاریخ میں ہونے والی بڑی ترین دفاعی مشقوں اور عوامی صف بندیوں میں سے ایک قرار دیا ہے۔
اس اجتماع کا براہِ راست تعلق ایران کی جانب سے حالیہ مہینوں میں شروع کی گئی ’جان فدا‘ مہم سے بھی ہے، جس کے تحت عام شہریوں کو ملک کے دفاع کی خاطر رضاکارانہ طور پر رجسٹریشن کروانے اور عسکری سرگرمیوں میں شرکت کی دعوت دی گئی ہے۔ اس سلسے میں 16 ستمبر سے نئے فوجی تربیتی کورسز کا آغاز کیا گیا ہے اور شہری علاقوں میں اشتہارات کے ذریعے عام افراد کو ہتھیار چلانے کی تربیت کی ترغیب دی جا رہی ہے۔ ایرانی صدر مسعود پزشکیان اور عسکری قیادت نے واضح کیا ہے کہ ملکی خودمختاری اور علاقائی سالمیت کا تحفظ مشترکہ قومی ذمہ داری ہے جس کے لیے عوام اور مسلح افواج ایک پیج پر ہیں۔
نیوز اینڈ نیوز کی وضاحت:
یہ خبر ایرانی سرکاری ذرائع، پاسدارانِ انقلاب کے شعبۂ تعلقاتِ عامہ کے بیانات اور بین الاقوامی خبر رساں اداروں کی میدانی رپورٹس کی روشنی میں تدوین کی گئی ہے۔
ماخذ: مڈل ایسٹ ڈیسک، نیوز اینڈ نیوز تہران۔