منصور احمد, August 25,2026
اسلام آباد (نیوز اینڈ نیوز) — 25 اگست 2026ء
اسلام آباد کے تھانہ بنی گالا پولیس نے کارروائی کرتے ہوئے گھریلو چوری کی واردات میں ملوث ملزم کو گرفتار کر کے اس کے قبضے سے 6 لاکھ روپے سے زائد مالیت کا چوری شدہ سامان برآمد کر لیا ہے۔
ترجمان اسلام آباد پولیس کے مطابق، ملزم ایک گھر میں غیر قانونی طور پر داخل ہو کر لیپ ٹاپ، طلائی زیورات، قیمتی گھڑیاں اور دیگر اشیاء چوری کر کے فرار ہو گیا تھا۔ بنی گالا پولیس ٹیم نے سائنسی و تفتیشی بنیادوں پر کارروائی کرتے ہوئے ملزم کو ٹریس کر کے گرفتار کیا۔ گرفتار ملزم کی شناخت ‘حبیب’ کے نام سے ہوئی ہے۔
ایس ایس پی آپریشنز اسلام آباد، قاضی علی رضا نے بتایا کہ گرفتار ملزم سے برآمد کیے گئے مالِ مسروقہ میں 6 لاکھ روپے سے زائد کی قیمتی گھڑیاں، لیپ ٹاپ اور طلائی زیورات شامل ہیں۔ انہوں نے مزید کہا کہ اسلام آباد پولیس شہریوں کے جان و مال کے تحفظ کو اپنی اولین ترجیح بناتے ہوئے جرائم پیشہ عناصر کے خلاف بلا امتیاز بڑے پیمانے پر کارروائیاں جاری رکھے ہوئے ہے۔