محمود احمد, August 01,2026
لاہور (نیوز اینڈ نیوز) — 1 اگست 2026ء
پاکستان انڈر 21 ہاکی ٹیم نے عمان کی سینئر قومی ہاکی ٹیم کے خلاف جاری پانچ ٹیسٹ میچوں کی سیریز کے تیسرے مقابلے میں سنسنی خیز اور دلچسپ مقابلے کے بعد 3-4 سے تاریخی فتح حاصل کرتے ہوئے سیریز میں 0-3 کی ناقابلِ شکست برتری حاصل کر لی ہے۔ مسلسل تیسری کامیابی کے ساتھ ہی پاکستان کی جونیئر ٹیم نے سیریز کے دو میچز باقی رہتے ہوئے سیریز اپنے نام کر لی ہے۔
میچ کے دوران دونوں ٹیموں کے درمیان سخت اور کانٹے دار مقابلہ دیکھنے میں آیا، تاہم پاکستان کے نوجوان کھلاڑیوں نے منظم دفاع اور شاندار جارحانہ حکمتِ عملی کا مظاہرہ کرتے ہوئے عمان کی سینئر اور تجربہ کار ٹیم کو مسلسل دباؤ میں رکھا۔ پاکستان کی جانب سے مصطفیٰ نے بہترین کھیل کا مظاہرہ کرتے ہوئے دو فیلڈ گول اسکور کیے، جبکہ عبداللہ نے ایک پینلٹی اسٹروک اور احمد نے ایک فیلڈ گول کر کے اپنی ٹیم کی فتح یقینی بنائی۔ عمان کی جانب سے البرہان نے دو پینلٹی اسٹروکس اور عمر بن حمد نے ایک فیلڈ گول اسکور کیا۔
پاکستان ہاکی فیڈریشن کے صدر محی الدین احمد وانی نے قومی انڈر 21 ہاکی ٹیم کو سیریز اپنے نام کرنے پر دلی مبارکباد پیش کرتے ہوئے کھلاڑیوں اور تمام ٹیم آفیشلز کی کارکردگی کی بھرپور تعریف کی۔ انہوں نے امید ظاہر کی کہ پاکستان کے یہ باصلاحیت نوجوان کھلاڑی آئندہ آنے والے بین الاقوامی مقابلوں میں بھی اسی جذبے، محنت اور اعتماد کے ساتھ کھیل کر پاکستان کا نام دنیا بھر میں روشن کریں گے۔