محمود احمد, JULY 16,2026
تل ابیب (نیوز اینڈ نیوز) — 16 جولائی 2026ء
اسرائیلی وزیر اعظم بنجمن نیتن یاہو آئندہ ہفتے شیڈول اپنا دورہِ امریکہ نہیں کریں گے۔ بین الاقوامی میڈیا رپورٹ کے مطابق، اسرائیلی وزیر اعظم کے دفتر نے باضابطہ تصدیق کی ہے کہ امریکی سینیٹر لنزے گراہم کی یاد میں ہونے والی تعزیتی تقریب کے ملتوی ہونے کے باعث بنجمن نیتن یاہو نے اپنا دورہِ امریکہ منسوخ کرنے کا فیصلہ کیا ہے۔ اس سے قبل توقع کی جا رہی تھی کہ اسرائیلی وزیر اعظم ہفتے کے روز امریکہ روانہ ہوں گے اور آخری رسومات و یادگاری تقریب میں شرکت کے لیے منگل تک وہاں قیام کریں گے، تاہم تقریب مؤخر ہونے کے بعد اب وہ تل ابیب میں ہی قیام کریں گے۔
واضح رہے کہ امریکی سینیٹر لنزے گراہم، جو عالمی سطح پر اسرائیل کے کٹر حامی اور ایران کے سخت ترین مخالف سمجھے جاتے تھے، مختصر علالت کے بعد گزشتہ ہفتے انتقال کر گئے تھے۔ سینیٹر لنزے گراہم کی وفات پر تعزیت کرتے ہوئے اسرائیلی وزیر اعظم بنجمن نیتن یاہو نے انہیں اپنا انتہائی قریبی دوست اور امریکہ اسرائیل تزویراتی اتحاد کا زبردست حامی قرار دیا تھا، جبکہ اسرائیل کی سلامتی اور دفاع کے لیے ان کے غیر متزلزل عزم اور خدمات کو زبردست خراجِ تحسین پیش کیا تھا۔ یادگاری تقریب کی نئی تاریخ سامنے نہ آنے کے باعث نیتن یاہو کے دورے کا نیا شیڈول فی الحال جاری نہیں کیا گیا۔