منصور احمد june 21,2026
اسلام آباد (انیوز اینڈ نیوز) — 21 جون 2026ء
آل پاکستان انجمن تاجران کے مرکزی صدر اشرف بھٹی نے وفاقی حکومت کو چاروں صوبوں کی جانب سے 1,035 ارب روپے کی خطیر گرانٹ فراہم کرنے کے مقتدر فیصلے کا خیر مقدم کرتے ہوئے کہا ہے کہ موجودہ قومی مالیاتی و معاشی چیلنجز، ملکی سکیورٹی صورتحال، قومی اہمیت کے بڑے ترقیاتی منصوبوں اور بیرونی قرضوں کی بروقت ادائیگی جیسے حساس معاملات میں وفاق کو مالی طور پر مستحکم اور مضبوط بنانا ناگزیر ہو چکا ہے۔ اتوار کو جاری کردہ اپنے ایک مقتدر اخباری بیان میں تجارتی رہنما اشرف بھٹی نے واضح کیا کہ وفاق اور صوبوں کے درمیان یہ مالی تعاون قومی یکجہتی، معاشی بقا اور جیو پولیٹیکل استحکام کے لیے ایک انتہائی خوش آئند اور تزویراتی پیشرفت ہے۔
مرکزی صدر آل پاکستان انجمن تاجران نے کہا کہ مریم نواز شریف کی قیادت میں پنجاب حکومت نے آئندہ مالی سال کے لیے ایک بہترین، متوازن اور عوام دوست بجٹ پیش کیا ہے، جس میں خدمات (سروسز)، پراپرٹی اور موٹر وہیکل ٹیکس جیسے مروجہ ذرائع سے صوبائی ریونیو بڑھانے کی کوششیں قابلِ تحسین ہیں۔ انہوں نے حکومت پر زور دیا کہ ٹیکس نیٹ کو وسیع کرنا اور انتظامی بہتری لانا وقت کی اہم ضرورت ہے تاکہ پہلے سے موجود کاروباری اور تاجر طبقے پر مزید کوئی اضافی بوجھ نہ پڑے۔ اشرف بھٹی کا مزید کہنا تھا کہ ملکی معیشت کی پائیدار ترقی کے لیے طویل المدتی مالی اصلاحات ناگزیر ہیں اور صوبائی آمدنی بڑھا کر خود کفالت حاصل کرنا ہوگی، جبکہ ٹیکس نظام میں ڈیجیٹلائزیشن، شفافیت اور بہتر گورننس سے تاجر برادری کا نظام پر اعتماد بڑھے گا اور ملک میں سرمایہ کاری کے نئے مواقع پیدا ہوں گے۔