محمود احمد, JULY 16,2026
الجزائر (نیوز اینڈ نیوز) — 16 جولائی 2026ء
الجیریا کے دارالحکومت الجزائر میں واقع ایک یتیم خانے میں اچانک ہولناک آگ بھڑک اٹھے کے نتیجے میں 11 معصوم بچے جھلس کر جاں بحق جبکہ 19 دیگر افراد شدید زخمی ہو گئے ہیں۔ چینی خبر رساں ادارے شنہوا کے مطابق، مقامی امدادی حکام نے سانحے کی تصدیق کرتے ہوئے بتایا کہ آگ اس قدر تیزی سے پھیلی کہ عمارت میں موجود بچوں کو باہر نکلنے کا موقع نہ مل سکا۔
ابتدائی رپورٹ کے مطابق، حادثے میں زخمی ہونے والے 19 افراد میں سے 10 افراد شدید طور پر جھلس گئے ہیں، 2 افراد کو دھویں کی وجہ سے سانس لینے میں سخت دشواری کا سامنا کرنا پڑا جبکہ 7 افراد اس اچانک آفت کے باعث شدید صدمے (شاک) کی حالت میں مبتلا ہو گئے۔ فائر فائٹرز اور ریسکیو ٹیموں نے فوری طور پر موقع پر پہنچ کر آگ پر قابو پایا اور لاشوں و زخمیوں کو عمارت سے باہر نکالا۔
امدادی اداروں نے شدید زخمی ہونے والے 10 افراد کو جائے وقوعہ پر ہی ہنگامی ابتدائی طبی امداد فراہم کرنے کے بعد فوری طور پر قریبی اسپتال منتقل کر دیا ہے، جہاں ڈاکٹروں کے مطابق بعض زخمیوں کی حالت تشویشناک بتائی جاتی ہے۔ انتظامیہ کا کہنا ہے کہ یتیم خانے میں آگ لگنے کی حتمی وجہ تاحال معلوم نہیں ہو سکی ہے، تاہم پولیس اور متعلقہ سیکیورٹی اداروں نے واقعے کی وجوہات کا تعین کرنے کے لیے باقاعدہ تحقیقات کا آغاز کر دیا ہے۔