روزینہ اسماعیل, JULY 23,2026
ملتان (نیوز اینڈ نیوز) — 23 جولائی 2026ء
ہائر ایجوکیشن کمیشن کے ایک اعلیٰ سطحی ریویو پینل نے ویمن یونیورسٹی ملتان کا تفصیلی دورہ مکمل کرتے ہوئے انسٹی ٹیوٹ آف کمپیوٹر سائنس اینڈ انفارمیشن ٹیکنالوجی کے تدریسی، تحقیقی اور انتظامی معیار کا جامع معائنہ کیا ہے۔
اس دورے کا بنیادی مقصد کمپیوٹنگ پروگرامز میں نئے داخلوں پر عائد عارضی پابندی سے متعلق تحفظات کا جائزہ لینا، یونیورسٹی کی جانب سے کیے گئے اصلاحی اقدامات کا معائنہ کرنا اور ایچ ای سی کے مقررہ معیارات کی روشنی میں تفصیلی رپورٹ مرتب کرنا تھا۔
ریویو پینل کی قیادت وائس چانسلر تھل یونیورسٹی بھکر، پروفیسر ڈاکٹر سعید احمد بزدار نے بطور کنوینر کی، جبکہ پینل کے دیگر ارکان میں ڈاکٹر عدیل انجم، ڈاکٹر مریم اکبر، ڈاکٹر محمد ارشد اعوان اور سید محمد علی عباس شامل تھے۔ یونیورسٹی آمد پر وفد کا استقبال رجسٹرار ڈاکٹر سارہ مصدق اور ڈائریکٹر آئی ٹی ڈاکٹر خدیجہ کنول نے کیا۔
رجسٹرار ڈاکٹر سارہ مصدق اور ڈاکٹر خدیجہ کنول نے پینل کو بتایا کہ ویمن یونیورسٹی ملتان اعلیٰ تعلیم، جدید لیبارٹریز، فیکلٹی ڈویلپمنٹ اور آؤٹ کم بیسڈ ایجوکیشن کے فروغ کے لیے ایچ ای سی کی پالیسیوں پر مکمل عمل پیرا ہے اور طالبات کو ڈیجیٹل دور کے تقاضوں کے مطابق تعلیم فراہم کی جا رہی ہے۔
ریویو پینل نے دورے کے دوران کمپیوٹر لیبارٹریز، کلاس رومز، فیکلٹی پروفائلز، جدید نصاب، امتحانی نظام، کیریئر کونسلنگ اور گزشتہ تین سالہ تعلیمی و انتظامی ریکارڈ کا باریک بینی سے جائزہ لیا۔ وفد نے یونیورسٹی کے تعاون کو سراہتے ہوئے کہا کہ حاصل شدہ مشاہدات کی بنیاد پر جامع سفارشات ایچ ای سی کو ارسال کی جائیں گی، جس کی روشنی میں آئندہ داخلوں سے متعلق حتمی فیصلہ کیا جائے گا۔