محمود احمد, JULY 17,2026
اقوامِ متحدہ (نیوز اینڈ نیوز) — 17 جولائی 2026ء
وزیراعظم یوتھ پروگرام کے چیئرمین رانا مشہود احمد خان نے اقوامِ متحدہ کی جنرل اسمبلی میں نیو اربن ایجنڈا کے وسط مدتی جائزہ اجلاس سے خطاب کرتے ہوئے پائیدار، جامع اور موسمیاتی تبدیلی سے ہم آہنگ شہروں کی تعمیر کے لیے پاکستان کے غیر متزلزل عزم کا اعادہ کیا ہے۔ انہوں نے واضح کیا کہ تیز رفتار شہری آبادی میں اضافے کے باعث رہائش، ٹرانسپورٹ اور ماحولیات پر دباؤ بڑھ رہا ہے، جس سے نمٹنے کے لیے عالمی برادری کو مشترکہ اور پائیدار حل تلاش کرنے ہوں گے۔
چیئرمین وزیراعظم یوتھ پروگرام نے 2025ء میں آنے والے تباہ کن شہری اور دریائی سیلابوں کا تذکرہ کرتے ہوئے بتایا کہ پاکستان اب اقوامِ متحدہ کے ادارے ‘یو این ہیبی ٹیٹ’ کے تعاون سے ایک جامع قومی شہری حکمتِ عملی تشکیل دے رہا ہے تاکہ موسمیاتی لچک کو ابتدا ہی سے شہری منصوبہ بندی کا لازمی حصہ بنایا جا سکے۔ انہوں نے بتایا کہ سیلاب کے بعد بحالی کے قومی پروگرام کے تحت اب تک بے گھر ہونے والے خاندانوں کے لیے 4 لاکھ سے زائد گھر تعمیر کیے جا چکے ہیں، جبکہ حکومت کم لاگت اور کم کاربن اخراج والی پبلک ٹرانسپورٹ، بے نظیر انکم سپورٹ پروگرام کے ذریعے 9 ملین سے زائد خاندانوں کو سماجی تحفظ اور سیف سٹی منصوبوں کے دائرہ کار کو وسعت دینے کے لیے مقتدر اقدامات کر رہی ہے۔
رانا مشہود احمد خان نے اس بات پر خصوصی زور دیا کہ پاکستان کا مستقبل اس کے نوجوانوں سے وابستہ ہے، جو ملک کی تقریباً 67 فیصد آبادی پر مشتمل ہیں۔ انہوں نے کہا کہ نوجوانوں کی شہروں کی جانب منتقلی کے پیشِ نظر انہیں معیاری تعلیم اور روزگار فراہم کرنا ناگزیر ہے، جس کے لیے وزیراعظم محمد شہباز شریف کی قیادت میں “پُرعزم پاکستان” پروگرام کا آغاز کیا گیا ہے تاکہ نوجوانوں کو ہنر مندی اور کاروباری مواقع فراہم کیے جا سکیں۔ اپنے خطاب کے اختتام پر انہوں نے تیز رفتار شہری آبادی سے نمٹنے کے اپنے تجربات دیگر رکن ممالک کے ساتھ شیئر کرنے اور پائیدار شہری ترقی کے لیے عالمی تعاون بڑھانے کے عزم کا اعادہ کیا۔