کاشف عباسی , September 03,2026
اسلام آباد (نیوز اینڈ نیوز) — 3 ستمبر 2026ء
پاکستان کے نوجوانوں کو جدید ترین ڈیجیٹل مہارتوں، پیشہ ورانہ تربیت اور روزگار کے بہترین مواقع سے آراستہ کرنے کے لیے ایک اہم پیشرفت کے تحت وزیراعظم یوتھ پروگرام اور معروف اداروں ایزمر و کاروٹ سسٹمز کے کنسورشیم کے درمیان ‘لیٹر آف انٹینٹ’ پر باضابطہ دستخط کر دیے گئے ہیں۔
وزیراعظم یوتھ پروگرام کی جانب سے جاری کردہ باضابطہ بیان کے مطابق، اس شراکت داری کا باضابطہ معاہدہ وزیراعظم آفس میں منعقدہ ایک خصوصی تقریب کے دوران ہوا، جس میں وزیراعظم یوتھ پروگرام کے چیئرمین رانا مشہود احمد خان اور کنسورشیم کے سینئر نمائندگان نے شرکت کی۔
اس سٹریٹجک شراکت داری کا بنیادی مقصد ملک بھر کے نوجوانوں کے لیے تعلیمی ترقی، آئی ٹی لٹریسی، تکنیکی ہنرمندی، کاروباری صلاحیتوں ، اور اخلاقی و کردار سازی کے جدید اور وسیع تر مواقع پیدا کرنا ہے تاکہ انہیں مستقبل کے عالمی و قومی تقاضوں کے مطابق تیار کیا جا سکے۔
معاہدے میں شامل ادارہ ‘ایزمر’ تنظیمی اخلاقیات، کیپیسٹی بلڈنگ، ہنرمندی کی ترقی اور اینٹراپرینیورشپ ٹریننگ میں مہارت رکھتا ہے، جبکہ ‘کاروٹ سسٹمز’ آئی ٹی کنسلٹنگ، ڈیجیٹل ایجوکیشن، اور کمپیوٹر لٹریسی کے میدان میں معروف ادارہ ہے۔ یہ دونوں ادارے مل کر پاکستانی نوجوانوں کی بااختیاری کے لیے وزیراعظم یوتھ پروگرام کے ساتھ مل کر مختلف منصوبے شروع کریں گے۔
اس مشترکہ فریم ورک کے تحت اساتذہ اور طلبہ کی جدید ترین تربیت، کیریئر کونسلنگ، ڈیجیٹل لرننگ، صحت و ماحولیاتی آگاہی اور تعلیم میں جدید ٹیکنالوجی کے مؤثر استعمال کے لیے جدید ترین ٹریننگ سیشنز اور پروگرامز کا انعقاد کیا جائے گا۔
تقریب کے دوران چیئرمین رانا مشہود احمد خان اور کنسورشیم کے عہدیداروں نے اس عزم کا اعادہ کیا کہ تمام فریقین مل کر ایسے بامقصد اور نتیجہ خیز اقدامات کو فروغ دیں گے جو پاکستان کی یوتھ کو ہنرمند، باصلاحیت، ذمہ دار اور روزگار کے قابل بنانے میں کلیدی کردار ادا کریں گے۔