منصور احمد ,May 23,2026
راولپنڈی / نیوز اینڈ نیوز
راولپنڈی پولیس نے گھر میں چوری کی بڑی واردات میں ملوث دو گھریلو ملازمین کو گرفتار کر کے ڈیڑھ کروڑ روپے مالیت کا سامان اور نقدی برآمد کر لی۔ پولیس کے مطابق ملزمان نے چند روز قبل گھر والوں کی غیر موجودگی کا فائدہ اٹھاتے ہوئے واردات کی اور قیمتی سامان لے کر فرار ہو گئے تھے۔
پولیس ترجمان کے مطابق ملزمان کی گرفتاری ٹیکنیکل اور ہیومن انٹیلیجنس کی مدد سے عمل میں لائی گئی، جبکہ ان کے قبضے سے طلائی زیورات، غیر ملکی و ملکی کرنسی، قیمتی گھڑیاں اور دیگر سامان برآمد کیا گیا۔
برآمد ہونے والے سامان میں 6 طلائی انگوٹھیاں، 6 کانٹے اور جوڑیاں، 5 کڑے، ہار، بریسلٹ اور دیگر زیورات شامل ہیں۔ اس کے علاوہ 7 ہزار 865 درہم، 5 ہزار 500 امریکی ڈالر، 355 برطانوی پاؤنڈ اور 48 لاکھ 4 ہزار 500 روپے نقدی بھی برآمد کی گئی۔ پولیس نے ملزمان سے 11 قیمتی گھڑیاں بھی تحویل میں لے لی ہیں۔
پولیس حکام کا کہنا ہے کہ ملزمان واردات کے بعد روپوش ہو گئے تھے، تاہم جدید ٹیکنالوجی اور خفیہ معلومات کی بنیاد پر انہیں ٹریس کر کے گرفتار کیا گیا۔ ملزمان سے مزید تفتیش جاری ہے تاکہ ممکنہ طور پر دیگر وارداتوں کے بارے میں بھی معلومات حاصل کی جا سکیں۔
سی پی او راولپنڈی سید خالد محمود ہمدانی نے کامیاب کارروائی پر پولیس ٹیم کو شاباش دیتے ہوئے کہا کہ شہری گھریلو ملازمین کی مکمل تصدیق اور اندراج لازمی کروائیں۔ انہوں نے کہا کہ ملازمین کا ریکارڈ متعلقہ تھانے، خدمت مرکز یا پنجاب پولیس ایپ کے ذریعے درج کروانے سے جرائم کی روک تھام میں مدد مل سکتی ہے۔
پولیس نے شہریوں سے اپیل کی ہے کہ وہ گھروں میں کام کرنے والے ملازمین کی شناختی معلومات اور بائیو ڈیٹا کی تصدیق ضرور کریں تاکہ ایسے ناخوشگوار واقعات سے محفوظ رہا جا سکے۔