کاشف عباسی ,May 20,2026
رپورٹ: نیوز اینڈ نیوز
کوئٹہ: وزیراعظم شہباز شریف اور چیف آف ڈیفنس فورسز و آرمی چیف فیلڈ مارشل سید عاصم منیر نے پاکستان کی خودمختاری کے تحفظ، دہشتگردی کے مکمل خاتمے اور بلوچستان میں پائیدار امن و استحکام کے عزم کا اعادہ کرتے ہوئے کہا ہے کہ دشمن قوتیں پراپیگنڈا، جعلی خبروں اور پراکسیز کے ذریعے پاکستان کی ترقی کا راستہ نہیں روک سکتیں۔
کوئٹہ کے دورے کے دوران وزیراعظم اور فیلڈ مارشل عاصم منیر نے کمانڈ اینڈ اسٹاف کالج میں افسران اور فیکلٹی سے خطاب کیا۔ اس موقع پر فیلڈ مارشل عاصم منیر نے کہا کہ بیرونی سرپرستی میں ہونے والی دہشتگردی، جھوٹے بیانیے اور منفی پروپیگنڈا پاکستان کی ترقی کو نقصان نہیں پہنچا سکتے۔ انہوں نے کہا کہ ریاست کی مضبوطی، عوام کے اتحاد اور مسلح افواج کی پیشہ ورانہ صلاحیت کے باعث دشمن کے تمام عزائم ناکام ہوں گے۔
فیلڈ مارشل عاصم منیر نے افسران اور جوانوں کے بلند حوصلے، آپریشنل تیاری اور پیشہ ورانہ عزم کو سراہتے ہوئے کہا کہ پاکستانی عوام کی ثابت قدم حمایت سے دہشتگردی کے مکمل خاتمے کے لیے کارروائیاں جاری رہیں گی۔
انہوں نے بلوچستان میں دیرپا امن کے لیے عوام دوست حکمتِ عملی، جامع ترقی، بہتر طرزِ حکمرانی اور ریاست و عوام کے درمیان مضبوط تعلق کو ناگزیر قرار دیا۔ آرمی چیف نے بلوچستان حکومت کی عوامی فلاح، سماجی و معاشی ترقی اور صوبے میں استحکام کے لیے جاری اقدامات کو بھی سراہا۔
وزیراعظم شہباز شریف نے خطاب کرتے ہوئے پاکستان کو خطے میں “امن اور استحکام کے ضامن” ملک قرار دیا اور کہا کہ پاکستان نہ صرف اپنی سرحدوں بلکہ پورے خطے کے امن و استحکام کے لیے مثبت کردار ادا کر رہا ہے۔
انہوں نے واضح کیا کہ پاکستان اپنی علاقائی سالمیت اور قومی خودمختاری کے دفاع کے لیے ہر ممکن اقدام کرے گا اور کسی بھی مہم جوئی کا بھرپور جواب دیا جائے گا۔
بعد ازاں وزیراعظم اور فیلڈ مارشل عاصم منیر نے بلوچستان میں امن و امان، ترقیاتی منصوبوں، گورننس اصلاحات اور انسدادِ دہشتگردی اقدامات سے متعلق صوبائی ایپکس کمیٹی کے اجلاس میں شرکت کی۔ اجلاس میں قومی ایکشن پلان پر پیش رفت کا تفصیلی جائزہ لیا گیا۔
وزیراعظم شہباز شریف نے بلوچستان کے معدنیاتی خطے کے لیے خصوصی سیکیورٹی کوریڈور قائم کرنے کی ہدایت بھی جاری کی تاکہ سرمایہ کاری، ترقیاتی منصوبوں اور معاشی سرگرمیوں کو محفوظ ماحول فراہم کیا جا سکے۔