روزینہ اسماعیل, JULY 23,2026
گلگت (نیوز اینڈ نیوز) — 23 جولائی 2026ء
وزیراعلیٰ گلگت بلتستان امجد حسین نے خطے میں جاری شدید بارشوں، گلیشیئرز کے پگھلنے اور سیلابی ریلوں کے باعث متاثرہ علاقوں میں ہنگامی امدادی اور بحالی کی سرگرمیوں کو مزید تیز کرنے کی سخت ہدایت جاری کی ہے۔
اپنے ایک اہم بیان میں وزیراعلیٰ نے تمام متعلقہ محکموں، جی بی ڈی ایم اے اور ضلعی انتظامیہ کو چوبیس گھنٹے ہائی الرٹ پر رہنے کا حکم دیا تاکہ شہریوں کے جان و مال کا مؤثر تحفظ یقینی بنایا جا سکے۔
وزیراعلیٰ امجد حسین نے محکمہ خوراک اور صحت کو خصوصی ہدایات دیں کہ متاثرہ اضلاع میں راشن، پینے کے صاف پانی، خیموں، ادویات اور دیگر اشیائے ضروریہ کی فوری و بلا تعطل فراہمی ممکن بنائی جائے۔ اس کے علاوہ، سیلابی ریلوں سے متاثر ہونے والے بنیادی ڈھانچے، پلوں، مرکزی شاہراہوں اور ذیلی رابطہ سڑکوں کی ہنگامی بنیادوں پر مرمت اور آمد و رفت کی بحالی کے لیے بھاری مشینری کو فیلڈ میں متحرک کرنے کے احکامات جاری کیے گئے ہیں۔
انہوں نے گلگت بلتستان ڈیزاسٹر مینجمنٹ اتھارٹی (جی بی ڈی ایم اے) کو نیشنل ڈیزاسٹر مینجمنٹ اتھارٹی (این ڈی ایم اے) کے ساتھ مسلسل اور مکمل رابطے میں رہنے کی تاکید کی ہے۔ وزیراعلیٰ نے عزم ظاہر کیا کہ حکومت اس مشکل گھڑی میں عوام کو تنہا نہیں چھوڑے گی اور تمام دستیاب وسائل متاثرین کی بحالی پر صرف کیے جائیں گے۔ تمام کمشنرز اور ڈپٹی کمشنرز کو خود فیلڈ میں جا کر امدادی کاموں کی نگرانی کرنے اور روزانہ کی بنیاد پر رپورٹ چیف منسٹر سیکرٹریٹ کو ارسال کرنے کا پابند کیا گیا ہے۔