روزینہ اسماعیل, September 15,2026
اسلام آباد (نیوز اینڈ نیوز) — 15 ستمبر 2026ء
پاکستان میں اعلیٰ تعلیم کے نگران ادارے ہائر ایجوکیشن کمیشن (HEC) اور عالمی شہرت یافتہ ایمرلڈ پبلشنگ کے باہمی اشتراک سے علمی و تحقیقی میدان میں جدید ٹیکنالوجی کے شفاف استعمال سے متعلق ایک اہم آن لائن ویبینار کا انعقاد 17 ستمبر کو کیا جا رہا ہے۔ ویبینار کا مرکزی عنوان ’’تحقیق و اشاعت میں مصنوعی ذہانت کا ذمہ دارانہ استعمال‘‘ مقرر کیا گیا ہے۔
ایچ ای سی حکام کے مطابق اس نشست کا بنیادی مقصد اس بات کا جائزہ لینا ہے کہ مصنوعی ذہانت علمی و تحقیقی اشاعت کے شعبے کو کس طرح تبدیل کر رہی ہے، جس میں اداریاتی امور، تحقیقی مقالوں کی جانچ، تصنیف، تحقیق کی تشہیر اور اشاعتی پالیسیاں شامل ہیں۔
ایک گھنٹے پر محیط اس آن لائن ویبینار کے دوران علمی و تحقیقی شعبے میں مصنوعی ذہانت کے بڑھتے ہوئے کردار، تعصب، رازداری اور شفافیت سے متعلق اخلاقی چیلنجز، بدلتی ہوئی اشاعتی پالیسیوں اور علمی دیانت کے تحفظ پر تفصیلی گفتگو کی جائے گی۔ اس کے علاوہ مصنوعی ذہانت کی مدد سے تیار کردہ تحقیق میں مناسب حوالہ جات اور انتساب، مصنفیت و جواب دہی، اور AI کے تیار کردہ مواد سے متعلق ابھرتے ہوئے رجحانات و اعداد و شمار بھی زیر بحث آئیں گے۔
ایچ ای سی کے مطابق یہ آن لائن ویبینار جمعرات 17 ستمبر 2026ء کو پاکستانی وقت کے مطابق دوپہر 12:00 بجے سے 1:00 بجے تک جاری رہے گا، جس میں ملک بھر کی یونیورسٹیوں کے اساتذہ، محققین اور اسکالرز آن لائن شرکت کر سکیں گے۔
نیوز اینڈ نیوز کی وضاحت:
یہ علمی خبر ایسوسی ایٹڈ پریس آف پاکستان (APP) اور ہائر ایجوکیشن کمیشن (HEC) کے باضابطہ جاری کردہ مواد کی روشنی میں مرتب کی گئی ہے۔
ماخذ: اے پی پی (APP) اسلام آباد، پریس ریلیز ایچ ای سی پاکستان۔