کاشف عباسی , JULY 22,026
کراچی (نیوز اینڈ نیوز) — 22 جولائی 2026ء
وزیراعلیٰ سندھ سید مراد علی شاہ نے صوبے میں بنیادی ڈھانچے اور سرمایاکاری کی پیش رفت کو نئے مرحلے میں داخل کرنے کے لیے ‘پبلک پرائیویٹ پارٹنرشپ’یونٹ کو باقاعدہ طور پر ایک تجارتی اور خود مختار ‘پرائیویٹ لمیٹڈ کمپنی’ میں تبدیل کرنے کا فیصلہ کیا ہے۔
یہ اہم فیصلہ وزیراعلیٰ ہاؤس میں منعقدہ ایک اعلیٰ سطحی اجلاس کے دوران کیا گیا، جس میں معاونِ خصوصی برائے سرمایہ کاری سید قاسم نوید، چیف سیکرٹری آصف حیدر شاہ، پرنسپل سیکرٹری آغا واصف، چیئرمین پی اینڈ ڈی بورڈ نجم شاہ، سیکرٹری خزانہ فیاض جتوئی، سیکرٹری ٹرانسپورٹ اسد زمین اور دیگر سینیئر حکام نے شرکت کی۔
اجلاس میں بریفنگ کے دوران بتایا گیا کہ سندھ کا پی پی پی پروگرام ملک بھر میں ذیلی قومی سطح پر سب سے نمایاں پلیٹ فارم بن چکا ہے، جس کے تحت ٹرانسپورٹ، سڑکیں، اقتصادی زونز، آئی ٹی، صحت، تعلیم اور ماحولیات کے متعدد عالمی معیار کے منصوبے جاری ہیں۔ ‘دی اکانومسٹ’ کی رپورٹ کے مطابق سندھ کا پی پی پی ماڈل ایشیا میں چھٹے نمبر پر رہ چکا ہے۔ تاہم ماہر عملے کو برقرار رکھنے اور تجارتی لچک حاصل کرنے کے لیے اس ادارے کی پرائیویٹ لمیٹڈ کمپنی کے طور پر تنظیمِ نو انتہائی ضروری تھی۔
وزیراعلیٰ سندھ سید مراد علی شاہ نے ہدایت کی کہ مجوزہ ادارہ جاتی تبدیلی کے ذریعے آپریشنل رکاوٹیں دور کی جائیں اور ماہرین کی خدمات سے استفادہ یقینی بنایا جائے۔ انہوں نے کہا کہ اس تبدیلی سے کمپنی کو مالیاتی ذرائع حاصل کرنے، ضرورت کے مطابق ایکویٹی سرمایہ کاری کرنے اور آزادانہ تجارتی فیصلے کرنے کی لچک میسر آئے گی۔
وزیراعلیٰ نے واضح کیا کہ احتساب پر سمجھوتہ کیے بغیر مضبوط طرزِ حکمرانی، شفافیت اور واضح قانونی نگرانی کو ہر صورت یقینی بنایا جائے تاکہ سرمایاکاروں کا اعتماد مزید مستحکم ہو اور صوبے میں عمومی و سماجی ترقی کا عمل مزید تیز ہو سکے۔