محمود احمد, August 16,2026
بوداپیسٹ (نیوز اینڈ نیوز) — 16 اگست 2026ء
ہنگری میں پولینڈ کے سیاحوں سے بھری ایک مسافر بس کے کھائی میں گرنے سے بارہ افراد ہلاک اور درجنوں شدید زخمی ہو گئے۔ مقامی پولیس کے مطابق یہ دلخراش حادثہ اتوار کے روز اس وقت پیش آیا جب مسافر بس دارالحکومت بوداپیسٹ کو شمال مشرقی شہر نیریگ ہازا سے ملانے والی ایم تھری موٹروے پر جا رہی تھی کہ اچانک سڑک سے اتر کر گہری کھائی میں جا گری۔ بس میں سوار تمام مسافروں کا تعلق پولینڈ سے تھا۔
حکام کا کہنا ہے کہ ابتدائی تحقیقات کے مطابق حادثہ ڈرائیور کو دورانِ ڈرائیونگ نیند کا جھونکا آنے کے باعث پیش آیا، تاہم پولیس نے کارروائی کرتے ہوئے بس ڈرائیور کو حراست میں لے کر باقاعدہ تحریری تفتیش کا آغاز کر دیا ہے۔ سرکاری نشریاتی ادارے کے مطابق ستائیس ٹن وزنی بس میں ستاؤن مسافر اور دو ڈرائیور سوار تھے۔ حادثے کے فوراً بعد امدادی ٹیموں نے کرینوں کی مدد سے بس کو اٹھا کر نیچے دبے افراد کو نکالا اور پینتیس مسافروں کو بحفاظت باہر نکال لیا۔
ہنگری کی ایمبولینس سروس کے مطابق دس شدید زخمی افراد کو فوری طبی امداد دیتے ہوئے قریب ترین ہسپتالوں کے ایمرجنسی وارڈز میں منتقل کیا گیا، جبکہ مزید سڑتیس افراد کو معمولی چوٹیں آئیں۔ ہنگری کے وزیراعظم پیٹر میگیار نے اس دردناک حادثے میں جاں بحق ہونے والے افراد کے لواحقین سے دلی تعزیت کا اظہار کیا اور زخمی مسافروں کی جلد صحت یابی کے لیے نیک تمناؤں کا اظہار کیا ہے۔