محمود احمد, August 10,2026
اسلام آباد (نیوز اینڈ نیوز) — 10 اگست 2026ء
پاکستان اور سوئٹزرلینڈ نے توانائی کے شعبے میں باہمی تعاون کو مزید فروغ دینے اور نئی سرمایہ کاری کے مواقع تلاش کرنے کے لیے رابطے جاری رکھنے پر اتفاق کیا ہے۔ یہ پیش رفت سوئس عالمی توانائی تجارتی کمپنی ‘گنور گروپ’ کے وفد کی وفاقی وزیر برائے پٹرولیم علی پرویز ملک سے ملاقات کے دوران سامنے آئی۔
ملاقات میں گنور گروپ کے وفد نے پاکستان کی انرجی مارکیٹ میں ڈی ریگولیشن اور نئی ریفائنری پالیسی کے حکومتی اقدامات کو سراہتے ہوئے کہا کہ ڈاؤن سٹریم مارکیٹ کو کھولنے سے بین الاقوامی سرمایہ کاروں کی حوصلہ افزائی ہوگی۔ وفد نے مجوزہ ‘بانڈڈ سٹوریج پالیسی’ اور ایل پی جی کے شعبے میں سرمایہ کاری کے امکانات میں گہری دلچسپی کا اظہار کیا اور پاکستان کو سرمایہ کاری کے لیے ایک موزوں و پرکشش مارکیٹ قرار دیا۔
وفاقی وزیر پٹرولیم علی پرویز ملک نے وفد کو بتایا کہ حکومت توانائی کے شعبے میں شفاف، مسابقتی اور سرمایہ کار دوست ماحول فراہم کرنے کے لیے پرعزم ہے۔ انہوں نے گنور گروپ کو ایل پی جی اور دیگر جاری اصلاحاتی منصوبوں میں موجود نئے مواقع سے بھرپور فائدہ اٹھانے کی دعوت دی۔