محمود احمد, JULY 22,2026
اقوام متحدہ/اسلام آباد (نیوز اینڈ نیوز) — 23 جولائی 2026ء
پاکستان نے اقوام متحدہ کی سلامتی کونسل میں بھارت کی جانب سے سندھ طاس معاہدے کو یکطرفہ اور غیر قانونی طور پر معطل کرنے کی کوشش کو دوٹوک انداز میں مسترد کر دیا ہے۔
جمہوریہ کانگو کی صدارت میں منعقدہ اعلیٰ سطحی مباحثے “قدرتی وسائل کی حکمرانی: امن، سلامتی اور خوشحالی کی بنیاد” میں پاکستان کا قومی بیان دیتے ہوئے اقوام متحدہ میں پاکستان کے مستقل مندوب سفیر عاصم افتخار احمد نے خبردار کیا کہ مشترکہ آبی وسائل کو بطورِ سیاسی ہتھیار استعمال کرنا علاقائی و عالمی امن اور 24 کروڑ سے زائد پاکستانیوں کی زندگیوں کے لیے شدید خطرہ ہے، بالخصوص جب یہ اقدامات جموں و کشمیر کے متنازع پس منظر میں کیے جا رہے ہوں۔
انہوں نے واضح کیا کہ اگست 2025ء میں ثالثی عدالت ) کے فیصلے کی روشنی میں سندھ طاس معاہدہ بدستور مکمل طور پر فعال، قانونی اور دونوں فریقین پر نافذ العمل ہے۔ سفیر عاصم افتخار احمد نے سلامتی کونسل پر زور دیا کہ وہ قدرتی وسائل پر اقوام کی خودمختاری کے احترام، تحفظ اور مشترکہ وسائل کو ہتھیار بنانے کی کوششوں پر کڑی نظر رکھے اور پیشگی سفارت کاری کے ذریعے تنازعات کے پرامن حل کے لیے اپنے اختیارات بروئے کار لائے۔
پاکستان کے مندوب نے افریقی ممالک اور بالخصوص جمہوریہ کانگو میں قدرتی وسائل کی غیر قانونی لوٹ مار پر تشویش کا اظہار کرتے ہوئے کہا کہ ترقی پذیر ممالک کو عالمی سپلائی چینز میں محض خام مال کا فراہم کنندہ بنانے کے بجائے مقامی سطح پر ویلیو ایڈیشن، ٹیکنالوجی کی منتقلی اور منصفانہ آمدنی میں برابر کا حصہ دار بنایا جانا چاہیے۔