کاشف عباسی ,june 17,2026
واشنگٹن (انٹرنیشنل ڈیسک/نیوز اینڈ نیوز) — 17 جون 2026ء
امریکی صدر ڈونلڈ ٹرمپ نے انکشاف کیا ہے کہ امریکہ اور ایران کے درمیان ہونے والے تاریخی معاہدے پر اسرائیلی وزیراعظم بینجمن نیتن یاہو کو شدید مایوسی ہوئی ہے، جی سیون سمٹ کے موقع پر ایک اہم پریس کانفرنس سے خطاب کرتے ہوئے امریکی صدر نے واضح الفاظ میں کہا کہ اب اسرائیل کو چاہیے کہ وہ لبنانی مزاحمتی تنظیم حزب اللہ کے ساتھ بہتر برتاؤ کرے اور کوئی بھی اگلا فیصلہ کرتے ہوئے انتہائی دانشمندی کا مظاہرہ کرے، انہوں نے عالمی برادری کو مائیک پر بتایا کہ اس خطے میں امن کی بحالی اور اس تاریخی کامیابی کے پیچھے پاکستان اور قطر کا بہت بڑا ہاتھ ہے، پاکستانی وزیراعظم نے انہیں پہلے ہی بتا دیا تھا کہ ایک ایسا بڑا کام ہونے جا رہا ہے جس پر کسی کو یقین نہیں آئے گا، صدر ٹرمپ نے اس عظیم ترین امن مشن اور سفارتی مذاکرات کے کامیاب انعقاد پر پاکستان، قطر اور سعودی عرب کے کلیدی کردار کو سراہتے ہوئے اپنے تمام بین الاقوامی شراکت داروں کا خصوصی شکریہ ادا کیا۔
امریکی صدر ڈونلڈ ٹرمپ نے دنیا کو بڑی خوشخبری سناتے ہوئے اعلان کیا کہ ایران کے ساتھ حتمی اور باقاعدہ معاہدہ رواں اتوار تک مکمل ہو جائے گا جس کے فوراً بعد خطے کے تمام محاذوں پر مکمل جنگ بندی ہو جائے گی اور بند پڑی آبنائے ہرمز کو جہاز رانی کے لیے ہمیشہ کے لیے کھول دیا جائے گا، انہوں نے صاف کہا کہ اگر امریکہ ایران کے ساتھ یہ ڈیل نہ کرتا تو آبنائے ہرمز کا کھلنا ناممکن تھا، صدر ٹرمپ نے مزید کہا کہ ایران اس بات پر مکمل راضی ہو چکا ہے کہ وہ مستقبل میں نہ تو کبھی ایٹم بم بنائے گا اور نہ ہی اسے حاصل کرنے کی کوشش کرے گا جبکہ امریکی سیٹلائٹ کے ذریعے ایران کی تمام جوہری تنصیبات اور یورینیم کے ذخائر کی چوبیس گھنٹے کڑی نگرانی کی جا رہی ہے اور ہم ان کے جوہری مواد کا سراغ لگا لیں گے، انہوں نے ایرانی حکام کو سخت اور زیرک مذاکرات کار قرار دیتے ہوئے کہا کہ اگلے مرحلے میں ایرانی میزائل پروگرام اور اس سے وابستہ دیگر مسلح گروہوں کے معاملے پر بھی تفصیلی بات چیت ہو گی، پریس کانفرنس کے دوران روس یوکرین جنگ پر بات کرتے ہوئے صدر ٹرمپ کا کہنا تھا کہ یوکرین سے زیادہ اس وقت روس اپنے فوجیوں سے محروم ہو رہا ہے اور حقیقت یہ ہے کہ یوکرین اور روس دونوں ہی یہ نہیں جانتے کہ آپس میں امن ڈیل کیسے کی جاتی ہے۔