کاشف عباسی , August 08,2026
اسلام آباد (نیوز اینڈ نیوز) — 08 اگست 2026ء
وفاقی دارالحکومت میں ڈینگی کے پھیلاؤ پر قابو پانے کے لیے ضلعی انتظامیہ کی جانب سے اٹھائے گئے مؤثر اقدامات اور لاروا کنٹرول آپریشنز کے مثبت نتائج سامنے آنا شروع ہو گئے ہیں۔ رواں سال یکم جنوری سے 6 اگست تک اسلام آباد بھر میں ڈینگی کے صرف 3 کیسز سامنے آئے ہیں۔
یہ پیش رفت ڈپٹی کمشنر اسلام آباد عرفان نواز میمن کی زیرِ صدارت منعقدہ اعلیٰ سطحی جائزہ اجلاس میں سامنے آئی۔ اجلاس میں وفاقی دارالحکومت سمیت لاہور، فیصل آباد، ملتان اور راولپنڈی میں ڈینگی کی موجودہ صورتحال اور سال 2024، 2025 اور 2026 کے اعداد و شمار کا تفصیلی تقابلی جائزہ لیا گیا۔
اجلاس کو بریفنگ دیتے ہوئے بتایا گیا کہ گزشتہ 15 دنوں کے دوران ڈینگی ایس او پیز کی خلاف ورزی اور لاروا کی افزائش کا سبب بننے والے عناصر کے خلاف بلاامتیاز قانونی کارروائیاں کی گئی ہیں۔ اس دوران 170 افراد کو گرفتار، 35 مقامات کو سیل، 70 مقدمات درج اور 21 لاکھ روپے سے زائد کے بھاری جرمانے عائد کیے گئے ہیں۔
بریفنگ میں مزید انکشاف کیا گیا کہ گزشتہ پندرہ روز کے دوران مختلف ہاٹ سپاٹس سے 7,066 مثبت اور 499 منفی لاروا پوائنٹس رپورٹ ہوئے، جبکہ ‘انڈور ویکٹر سرویلنس’ مہم کے تحت اسلام آباد کے 1 لاکھ سے زائد گھروں کی تفصیلی انسپکشن مکمل کر لی گئی ہے۔
اجلاس میں سی ڈی اے، لوکل گورنمنٹ اور دیگر متعلقہ اداروں کی کارکردگی پر اطمینان کا اظہار کیا گیا۔ اس موقع پر ڈپٹی کمشنر عرفان نواز میمن نے تمام اداروں کو ہدایات جاری کرتے ہوئے کہا کہ شہریوں کی صحت کی حفاظت پر کوئی سمجھوتہ نہیں کیا جائے گا اور ڈینگی کی روک تھام کے لیے تمام تر وسائل کا استعمال جاری رہے گا۔