کاشف عباسی ,May 30 ,2026

اسلام آباد: (نیوز اینڈ نیوز۔ 30 مئی 2026ء)

آئندہ مالی سال 2026-27 کے وفاقی بجٹ کی تیاریوں کے دوران مختلف شعبوں پر نئے ٹیکسوں کی تجاویز زیر غور ہیں، جن کے باعث سولر پینلز، برقی گاڑیوں اور ہائبرڈ گاڑیوں کی قیمتوں میں نمایاں اضافے کا خدشہ پیدا ہو گیا ہے۔ ذرائع کے مطابق عالمی مالیاتی فنڈ (آئی ایم ایف) کی جانب سے ٹیکس استثنیٰ ختم کرنے پر زور دیے جانے کے بعد حکومت مختلف شعبوں میں ٹیکس شرحوں پر نظرثانی کر رہی ہے۔

اطلاعات کے مطابق بجٹ تجاویز میں ماحول دوست ٹیکنالوجی اور متبادل توانائی کے شعبے بھی متاثر ہو سکتے ہیں۔ مجوزہ منصوبے کے تحت برقی گاڑیوں پر عائد کم شرح کے ٹیکس میں اضافہ جبکہ ہائبرڈ گاڑیوں پر موجودہ ٹیکس شرح کو مزید بڑھانے کی تجویز زیر غور ہے۔ اگر ان تجاویز کی منظوری دی گئی تو برقی کاروں، موٹر سائیکلوں، رکشوں، بسوں، ٹرکوں اور دیگر گاڑیوں کی قیمتوں میں خاطر خواہ اضافہ متوقع ہے۔

اسی طرح سولر پینلز پر بھی ٹیکس کی شرح بڑھانے کی تجویز سامنے آئی ہے، جس سے متبادل توانائی کے منصوبوں کی لاگت میں اضافہ ہو سکتا ہے۔ ماہرین کے مطابق ملک میں بڑھتی ہوئی گرمی، بجلی کی بلند قیمتوں اور لوڈ مینجمنٹ کے مسائل کے باعث بڑی تعداد میں شہری شمسی توانائی کی جانب راغب ہو رہے ہیں، تاہم نئے ٹیکس نافذ ہونے کی صورت میں سولر نظام کی تنصیب مزید مہنگی ہو جائے گی۔

اقتصادی ماہرین کا کہنا ہے کہ اگرچہ حکومت محصولات میں اضافے کے لیے اقدامات کر رہی ہے، تاہم ماحول دوست توانائی اور جدید ٹرانسپورٹ کے شعبوں پر اضافی بوجھ سے ان شعبوں کی ترقی متاثر ہونے کا خدشہ ہے۔ ان کا مؤقف ہے کہ برقی اور ہائبرڈ گاڑیوں کے فروغ کے ساتھ ساتھ شمسی توانائی کی حوصلہ افزائی ماحولیاتی آلودگی میں کمی اور توانائی کے بحران سے نمٹنے میں مددگار ثابت ہو سکتی ہے۔

ذرائع کے مطابق بجٹ کی حتمی منظوری اور ٹیکس شرحوں کا اعلان وفاقی بجٹ پیش کیے جانے کے بعد ہی سامنے آئے گا، تاہم مجوزہ اقدامات نے عوام اور کاروباری حلقوں میں تشویش پیدا کر دی ہے۔ ماہرین کا کہنا ہے کہ عوامی ریلیف اور محصولات کے اہداف کے درمیان توازن برقرار رکھنا حکومت کے لیے ایک بڑا چیلنج ہوگا۔

محمود احمد May30,2026

لاہور (نیوز اینڈ نیوز۔ 30 مئی 2026ء)

وزیر اطلاعات پنجاب عظمیٰ بخاری نے کہا ہے کہ وزیراعلیٰ پنجاب مریم نواز شریف نے عیدالاضحیٰ کے دوران شاندار کارکردگی کا مظاہرہ کرنے والے ستھرا پنجاب پروگرام کے کارکنوں کے لیے فی کس 10 ہزار روپے انعام دینے کا اعلان کیا ہے۔

اپنے بیان میں عظمیٰ بخاری نے کہا کہ پنجاب بھر میں عیدالاضحیٰ کے موقع پر صفائی کا خصوصی آپریشن کامیابی سے مکمل کیا گیا، جس کے دوران ستھرا پنجاب کے کارکنوں نے دن رات محنت کرتے ہوئے قربانی کے جانوروں کی 3 لاکھ 60 ہزار ٹن سے زائد آلائشیں محفوظ طریقے سے ٹھکانے لگائیں۔

انہوں نے بتایا کہ صوبہ بھر میں جاری صفائی مہم میں ایک لاکھ 84 ہزار سے زائد کارکنوں نے حصہ لیا جبکہ 60 ہزار گاڑیاں اور مشینری آپریشن میں مصروف رہیں۔ قربانی کی آلائشیں اٹھانے والی گاڑیوں نے مجموعی طور پر 60 لاکھ کلومیٹر سے زائد فاصلہ طے کیا۔

وزیر اطلاعات کے مطابق لاہور سے اٹک، ملتان، رحیم یار خان اور صادق آباد سمیت پنجاب کے تمام بڑے اور چھوٹے شہروں میں بلا تعطل صفائی آپریشن جاری رکھا گیا۔ شہریوں کو تعفن اور ماحولیاتی آلودگی سے محفوظ رکھنے کے لیے عرقِ گلاب، فینائل اور چونے کا وسیع پیمانے پر استعمال کیا گیا جبکہ پنجاب کی چار ہزار سے زائد سڑکوں کو عرقِ گلاب سے دھویا گیا۔

عظمیٰ بخاری کا کہنا تھا کہ وزیراعلیٰ پنجاب مریم نواز شریف نے صفائی آپریشن کی لمحہ بہ لمحہ نگرانی کی اور بہترین کارکردگی پر ستھرا پنجاب کے کارکنوں کی خدمات کو سراہتے ہوئے خصوصی نقد انعامات کا اعلان کیا۔

انہوں نے مزید بتایا کہ ستھرا پنجاب کی ٹیموں نے عید کے موقع پر 60 ہزار سے زائد مساجد، امام بارگاہوں اور عید گاہوں کی صفائی بھی یقینی بنائی، جبکہ ہیلپ لائن پر موصول ہونے والی تمام شکایات کا بروقت ازالہ کیا گیا۔

وزیر اطلاعات نے کہا کہ صفائی آپریشن کی کامیابی پر پنجاب کے شہریوں نے بھی اطمینان اور خوشی کا اظہار کیا ہے، جبکہ حکومت صوبے کو صاف، سرسبز اور صحت مند بنانے کے مشن پر پوری سنجیدگی سے عمل پیرا ہے۔

کاشف عباسی ,May 29 ,2026

اسلام آباد (نیوز اینڈ نیوز۔ 29 مئی 2026ء)

وزیراعظم آفس کے میڈیا ونگ کی جانب سے جاری بیان کے مطابق وزیراعظم شہباز شریف نے عید کے تیسرے روز عوام کے لیے اہم ریلیف پیکیج کا اعلان کرتے ہوئے پٹرول اور ڈیزل کی قیمتوں میں نمایاں کمی کی منظوری دی۔ حکومت کے اس فیصلے سے لاکھوں گاڑی مالکان، موٹر سائیکل سواروں، ٹرانسپورٹ سیکٹر اور عام صارفین کو براہ راست فائدہ پہنچے گا۔

وزیراعظم شہباز شریف نے اپنے بیان میں کہا کہ حکومت نے عوام سے وعدہ کیا تھا کہ جیسے ہی مالی گنجائش پیدا ہوگی، پٹرولیم مصنوعات کی قیمتوں میں کمی کرکے اس کا فائدہ براہ راست عوام تک پہنچایا جائے گا۔ آج حکومت نے اپنے اسی وعدے پر مکمل عمل کرتے ہوئے عوام کو عید کا تحفہ دیا ہے۔

انہوں نے کہا کہ عوام کو ریلیف دینا حکومت کی بنیادی ترجیحات میں شامل ہے اور یہی وجہ ہے کہ گزشتہ ہفتے بھی پٹرولیم مصنوعات کی قیمتوں میں کمی کی گئی تھی۔ حکومت مستقبل میں بھی عوامی مفاد کو مدنظر رکھتے ہوئے ایسے اقدامات جاری رکھے گی۔

بیان میں کہا گیا ہے کہ حکومت نے مشکل معاشی حالات کے باوجود عوام کو ریلیف فراہم کرنے کی پالیسی برقرار رکھی۔ پبلک ٹرانسپورٹ، مال بردار گاڑیوں، موٹر سائیکل اور رکشہ استعمال کرنے والے شہریوں کے لیے ایندھن پر خصوصی سبسڈی بھی فراہم کی گئی تاکہ مہنگائی کے اثرات کو کم کیا جا سکے۔

وزیراعظم نے کہا کہ دنیا کے مختلف ممالک میں تیل کے بحران کے دوران عوام کو ایندھن کے حصول میں مشکلات کا سامنا کرنا پڑا، تاہم پاکستان میں بروقت حکومتی اقدامات کے باعث پٹرول اور ڈیزل کی مسلسل فراہمی یقینی بنائی گئی۔ انہوں نے یاد دلایا کہ عالمی منڈی میں تیل کی قیمتوں میں غیر معمولی اضافے کے باوجود حکومت نے عوام پر اضافی بوجھ منتقل کرنے کے بجائے 130 روپے فی لیٹر سے زائد سبسڈی برداشت کی اور قیمتوں کو کنٹرول میں رکھا۔

حکومت کے اس تازہ فیصلے کو عوامی ریلیف کے حوالے سے ایک اہم قدم قرار دیا جا رہا ہے، جس سے نہ صرف ٹرانسپورٹ کے اخراجات میں کمی آئے گی بلکہ اشیائے ضروریہ کی ترسیل پر پڑنے والے اخراجات بھی کم ہونے کی توقع ہے، جس کا مثبت اثر عام صارفین تک پہنچ سکتا ہے۔

ذرائع کے مطابق پٹرول اور ڈیزل کی قیمتوں میں حالیہ کمی کو عیدالاضحیٰ کے موقع پر عوام کے لیے ایک اہم معاشی ریلیف قرار دیا جا رہا ہے، جبکہ حکومت نے آئندہ بھی عوامی سہولت کے لیے ایسے اقدامات جاری رکھنے کے عزم کا اظہار کیا ہے۔

کاشف عباسی ,May 29 ,2026

راولپنڈی (نیوز اینڈ نیوز۔ 29 مئی 2026ء)

عیدالاضحیٰ کی تعطیلات کے دوران مری میں سیاحوں کے غیر معمولی رش کے پیش نظر پنجاب فوڈ اتھارٹی نے سیاحتی مقامات پر خوراک کے معیار اور صفائی کی صورتحال چیک کرنے کیلئے خصوصی آپریشن کرتے ہوئے 98 فوڈ پوائنٹس کی تفصیلی انسپکشن کی، جبکہ متعدد ہوٹلوں اور فوڈ پوائنٹس کے خلاف سخت کارروائی بھی عمل میں لائی گئی۔

ترجمان پنجاب فوڈ اتھارٹی کے مطابق مری، نیو مری، پتریاٹہ، مال روڈ اور مری ایکسپریس وے سمیت مختلف اہم سیاحتی علاقوں میں خصوصی مانیٹرنگ ٹیموں نے کارروائیاں کیں۔ معائنوں کے دوران صفائی کے ناقص انتظامات، غیر معیاری خوراک، زائد المعیاد اشیاء کے استعمال اور حفظانِ صحت کے اصولوں کی خلاف ورزیوں پر 11 فوڈ پوائنٹس کو مجموعی طور پر ایک لاکھ 53 ہزار روپے جرمانہ عائد کیا گیا۔

حکام کے مطابق انتہائی ناقص صفائی اور غیر تسلی بخش صورتحال پر 2 فوڈ پوائنٹس کو عارضی طور پر بند بھی کر دیا گیا، جبکہ بڑی مقدار میں ایکسپائرڈ کولڈ ڈرنکس، مضر صحت مصالحہ جات اور دیگر غیر معیاری اشیائے خورونوش تلف کر دی گئیں تاکہ سیاحوں کی صحت کو ہر ممکن تحفظ فراہم کیا جا سکے۔

پنجاب فوڈ اتھارٹی کا کہنا ہے کہ عید کی تعطیلات میں مری آنے والے سیاحوں کی تعداد میں نمایاں اضافے کے باعث خصوصی انسپکشن ٹیمیں تشکیل دی گئی ہیں، جو مختلف علاقوں میں مسلسل نگرانی اور چیکنگ کر رہی ہیں تاکہ عوام کو معیاری اور محفوظ خوراک کی فراہمی یقینی بنائی جا سکے۔

اتھارٹی حکام نے فوڈ بزنس مالکان کو سختی سے ہدایت جاری کی ہے کہ وہ صفائی، معیاری خوراک اور حفظان صحت کے اصولوں پر مکمل عملدرآمد یقینی بنائیں، بصورت دیگر قانون کے مطابق سخت کارروائی کی جائے گی۔

ترجمان نے شہریوں اور سیاحوں سے اپیل کی کہ اگر کہیں ناقص خوراک، گندگی یا غیر معیاری اشیاء فروخت ہوتی نظر آئیں تو فوری طور پر پنجاب فوڈ اتھارٹی کی ہیلپ لائن 1223 پر شکایت درج کروائیں تاکہ بروقت کارروائی ممکن بنائی جا سکے۔

منصور احمد ,May 29,2026

راولپنڈی (نیوز اینڈ نیوز۔ 29 مئی 2026ء)

عیدالاضحیٰ 2026ء کے موقع پر ستھرا پنجاب ایجنسی راولپنڈی نے ضلع بھر میں صفائی کا بڑا اور کامیاب آپریشن مکمل کرتے ہوئے 12 ہزار ٹن سے زائد آلائشیں ٹھکانے لگا دیں، جبکہ شہریوں کی جانب سے موصول ہونے والی تمام 1500 شکایات کا فوری ازالہ بھی یقینی بنایا گیا۔

عید سے ایک رات قبل شروع ہونے والا یہ خصوصی صفائی آپریشن مسلسل چار روز تک جاری رہا، جس میں شہر بھر کے مختلف علاقوں، گلی محلوں، ٹرانسفر اسٹیشنز اور ڈمپنگ پوائنٹس پر آلائشیں اٹھانے، صفائی اور جراثیم کش اسپرے کا عمل بلا تعطل جاری رکھا گیا۔ آپریشن مکمل ہونے کے بعد تمام عارضی ٹرانسفر اسٹیشنز کو عرقِ گلاب سے دھویا گیا جبکہ تعفن اور جراثیم کے خاتمے کیلئے بھاری مقدار میں چونے کا چھڑکاؤ بھی کیا گیا۔

ستھرا پنجاب ایجنسی کے مطابق ڈمپنگ سائٹس پر کھودے گئے گڑھوں کو دوبارہ مٹی سے بھر کر وہاں بھی جراثیم کش اقدامات کیے گئے تاکہ ماحول کو آلودگی اور بدبو سے محفوظ رکھا جا سکے۔

عید کے تیسرے روز ایم ڈی ستھرا پنجاب ایجنسی راولپنڈی رانا ساجد صفدر نے شہر کے مختلف علاقوں کا دورہ کیا اور صفائی ورکرز سے ملاقات کرکے ان میں مٹھائی تقسیم کی۔ اس موقع پر رکن قومی اسمبلی طاہرہ اورنگزیب نے عید صفائی آپریشن کو وزیراعلیٰ پنجاب مریم نواز شریف کے “ستھرا پنجاب وژن” کا عملی نمونہ قرار دیتے ہوئے پوری ٹیم کی کارکردگی کو سراہا۔

کمشنر راولپنڈی ڈویژن عامر خٹک نے کہا کہ موثر مانیٹرنگ، فوری رسپانس اور جدید ویسٹ مینجمنٹ حکمتِ عملی کے ذریعے شہریوں کو صاف ستھرا ماحول فراہم کیا گیا۔
ڈی سی راولپنڈی و چیئرمین ستھرا پنجاب ایجنسی ڈاکٹر حسن وقار چیمہ نے کہا کہ کسی بھی علاقے میں آلائشیں موجود نہیں رہنے دی گئیں اور ہر شکایت کا بروقت ازالہ کیا گیا۔

ایم ڈی ستھرا پنجاب ایجنسی رانا ساجد صفدر کے مطابق اس بڑے صفائی پلان میں 6 ہزار 340 سے زائد ورکرز اور 1066 گاڑیاں و مشینری حصہ لیتی رہیں، جبکہ تمام عملے کی چھٹیاں منسوخ کرکے ہنگامی بنیادوں پر صفائی مہم جاری رکھی گئی۔

انہوں نے کہا کہ ادارے کے افسران، فیلڈ ٹیموں اور ورکرز نے دن رات محنت کرکے راولپنڈی کو عید کے دنوں میں صاف ستھرا رکھنے میں اہم کردار ادا کیا، جس پر پوری ٹیم مبارکباد کی مستحق ہے۔

منصور احمد ,May 282026

راولپنڈی (نیوز اینڈ نیوز۔ 28 مئی 2026ء)

پاکستان کی مسلح افواج نے یومِ تکبیر کی 28ویں سالگرہ کے موقع پر پوری قوم کو مبارکباد پیش کرتے ہوئے پاکستان کے ایٹمی عزم، قومی سلامتی اور دفاع کے تحفظ کیلئے اپنے غیر متزلزل عزم کا اعادہ کیا ہے۔

پاک فوج کے شعبہ تعلقاتِ عامہ (آئی ایس پی آر) کی جانب سے جاری پریس ریلیز کے مطابق آرمی چیف اور چیف آف ڈیفنس فورسز فیلڈ مارشل سید عاصم منیر نشانِ امتیاز (ملٹری) ہلالِ جرات، نیول چیف ایڈمرل نوید اشرف نشانِ امتیاز (ملٹری) تمغۂ بسالت اور پاک فضائیہ کے سربراہ ایئر چیف مارشل ظہیر احمد بابر سدھو نشانِ امتیاز (ملٹری) ہلالِ جرات نے یومِ تکبیر کے موقع پر پاکستانی قوم کو دلی مبارکباد پیش کی۔

آئی ایس پی آر کے مطابق یومِ تکبیر 28 مئی 1998ء کے اس تاریخی دن کی یاد میں منایا جاتا ہے جب پاکستان ایٹمی قوت بن کر ابھرا اور جنوبی ایشیا میں طاقت کا تزویراتی توازن بحال ہوا۔ بیان میں کہا گیا کہ یہ تاریخی سنگِ میل پاکستانی قوم کے اتحاد، عزم، قربانی اور اپنی خودمختاری، علاقائی سالمیت اور قومی وقار کے دفاع کیلئے غیر متزلزل ارادے کی علامت ہے۔

مسلح افواج کے سربراہان نے اس موقع پر پاکستان کے سائنسدانوں، انجینئرز، دفاعی ماہرین اور افواجِ پاکستان کی خدمات کو زبردست خراجِ تحسین پیش کرتے ہوئے کہا کہ پاکستان کی ایٹمی صلاحیت قوم کی ایک مقدس امانت ہے، جو خطے میں امن، استحکام اور قابلِ اعتماد دفاعی توازن کی ضامن ہے۔

آئی ایس پی آر نے کہا کہ یہ عظیم کامیابی دور اندیش قیادت، قومی یکجہتی، سائنسدانوں کی شبانہ روز محنت اور پاکستانی عوام و مسلح افواج کی بے مثال قربانیوں کا عملی ثبوت ہے۔ پاکستان کی دفاعی صلاحیت ہر قسم کے خطرات کے خلاف قومی سلامتی کو یقینی بنانے کیلئے مکمل طور پر تیار اور مضبوط ہے۔

بیان میں مزید کہا گیا کہ پاکستان کی مسلح افواج مادرِ وطن کے دفاع، قومی سلامتی، استحکام اور خوشحالی کیلئے اپنے عزم پر قائم ہیں اور ہر قسم کے چیلنج کا مقابلہ کرنے کی بھرپور صلاحیت رکھتی ہیں۔

آئی ایس پی آر کے مطابق یومِ تکبیر کے موقع پر پوری قوم اللہ تعالیٰ کے حضور شکر گزار ہے اور ایک مضبوط، متحد، مستحکم اور خوشحال پاکستان کیلئے اپنے اتحاد، چوکسی، قربانی اور قومی خدمت کے عہد کی تجدید کرتی ہے۔

پاکستان مسلح افواج زندہ باد، پاکستان پائندہ باد۔

محمود احمد May28,2026

اسلام آباد (نیوز اینڈ نیوز۔ 28 مئی 2026ء)

وزیراعظم محمد شہباز شریف نے کہا ہے کہ 28 مئی 1998ء پاکستان کی قومی تاریخ کا ایک فیصلہ کن اور تاریخی لمحہ تھا، جب پاکستان نے پوری دنیا پر واضح کر دیا کہ وہ اپنی خودمختاری، سلامتی، وقار اور دفاع کے حق پر کبھی کوئی سمجھوتہ نہیں کرے گا۔

یومِ تکبیر کے موقع پر سماجی رابطے کی ویب سائٹ ایکس پر اپنے خصوصی پیغام میں وزیراعظم شہباز شریف نے کہا کہ آج قوم یومِ تکبیر منا رہی ہے تو اس موقع پر شہید ذوالفقار علی بھٹو کو زبردست خراجِ عقیدت پیش کیا جاتا ہے، جنہوں نے پاکستان کے ایٹمی پروگرام کی بنیاد رکھی اور ملک کے دفاع کو ناقابلِ تسخیر بنانے کا خواب دیکھا۔

وزیراعظم نے سابق وزیراعظم میاں محمد نواز شریف کو بھی خراجِ تحسین پیش کرتے ہوئے کہا کہ ان کی جراتمندانہ، دلیرانہ اور پُرعزم قیادت نے مئی 1998ء میں شدید عالمی دباؤ کے باوجود قومی مفاد کو ترجیح دیتے ہوئے پاکستان کو ایٹمی قوت بنانے کا تاریخی فیصلہ کیا، جس نے ملک کے دفاع کو ہمیشہ کیلئے مضبوط بنیادیں فراہم کیں۔

محمد شہباز شریف نے پاکستان کے ممتاز ایٹمی سائنسدان ڈاکٹر عبدالقدیر خان، ڈاکٹر ثمر مبارک مند، انجینئرز، سائنسدانوں، افواجِ پاکستان کے افسران و جوانوں اور ایٹمی پروگرام سے وابستہ تمام افراد کی خدمات کو بھی زبردست خراجِ تحسین پیش کیا۔ انہوں نے کہا کہ ان عظیم شخصیات کی محنت، قربانی، لگن اور غیر متزلزل عزم نے پاکستان کے دفاع کو ناقابلِ تسخیر بنا دیا۔

وزیراعظم کا کہنا تھا کہ یومِ تکبیر قومی اتحاد، غیر متزلزل عزم اور اجتماعی قومی طاقت کی علامت ہے، جو نہ صرف پاکستان کی آزادی اور خودمختاری کے تحفظ کی عکاسی کرتا ہے بلکہ خطے میں امن اور تزویراتی استحکام کے قیام کے عزم کا بھی مظہر ہے۔

انہوں نے قوم پر زور دیا کہ اس تاریخی دن کے موقع پر ایک مضبوط، خوشحال، متحد اور خودانحصار پاکستان کی تعمیر کے عہد کی تجدید کی جائے، ایسا پاکستان جو قائداعظم محمد علی جناح کے سنہری اصولوں ایمان، اتحاد اور نظم و ضبط پر قائم ہو۔

کاشف عباسی ,May 27 ,2026

کوئٹہ / نیوز اینڈ نیوز

وزیراعلیٰ بلوچستان میر سرفراز بگٹی نے کہا ہے کہ عیدالاضحیٰ ہمیں قربانی، ایثار، بھائی چارے اور قومی یکجہتی کا درس دیتی ہے، موجودہ حالات میں ان اقدار کو مزید مضبوط بنانے کی ضرورت ہے تاکہ بلوچستان کو امن، ترقی اور خوشحالی کی راہ پر گامزن کیا جا سکے۔

تفصیلات کے مطابق عیدالاضحیٰ کے پرمسرت موقع پر وزیراعلیٰ بلوچستان میر سرفراز بگٹی سے اراکینِ صوبائی اسمبلی، اعلیٰ سرکاری حکام، قبائلی عمائدین، سیاسی و سماجی شخصیات اور مختلف شعبہ ہائے زندگی سے تعلق رکھنے والے افراد نے ملاقات کی اور انہیں عید کی مبارکباد پیش کی۔

ملاقاتوں کے دوران شرکاء نے وزیراعلیٰ بلوچستان کی قیادت پر اعتماد کا اظہار کرتے ہوئے صوبے میں امن و امان، ترقیاتی منصوبوں اور عوامی فلاح و بہبود کیلئے حکومت کی کوششوں کو سراہا۔ اس موقع پر بلوچستان کی مجموعی صورتحال، سکیورٹی، جاری ترقیاتی منصوبوں اور عوامی مسائل کے حل سے متعلق تفصیلی تبادلہ خیال بھی کیا گیا۔

وزیراعلیٰ بلوچستان میر سرفراز بگٹی نے گفتگو کرتے ہوئے کہا کہ حکومت بلوچستان عوامی خدمت، شفاف طرزِ حکمرانی، پائیدار امن اور صوبے کی ہمہ جہت ترقی کیلئے تمام دستیاب وسائل بروئے کار لا رہی ہے۔ انہوں نے کہا کہ بلوچستان کے عوام نے ہر مشکل وقت میں صبر، حوصلے اور استقامت کی روشن مثال قائم کی ہے اور حکومت عوام کے اعتماد پر پورا اترنے کیلئے عملی اور نتیجہ خیز اقدامات جاری رکھے ہوئے ہے۔

انہوں نے اس عزم کا اعادہ کیا کہ صوبے میں امن و امان کے قیام، ترقیاتی منصوبوں کی بروقت تکمیل اور عوامی مسائل کے مستقل حل کیلئے تمام ادارے بھرپور انداز میں متحرک ہیں۔ وزیراعلیٰ بلوچستان کا کہنا تھا کہ حکومت کا وژن ایک پُرامن، خوشحال اور ترقی یافتہ بلوچستان ہے، جس کے حصول کیلئے اجتماعی کوششیں ناگزیر ہیں۔

میر سرفراز بگٹی نے عوام پر زور دیا کہ وہ عیدالاضحیٰ کے اس بابرکت موقع پر محبت، رواداری، بھائی چارے اور قومی اتحاد کے فروغ میں اپنا کردار ادا کریں تاکہ معاشرے میں ہم آہنگی اور استحکام کو مزید تقویت مل سکے