روزینہ اسماعیل, September 17,2026
نیویارک (نیوز اینڈ نیوز) — 17 ستمبر 2026ء
اقوام متحدہ کی سلامتی کونسل میں ایران سے متعلق 1737 کمیٹی کے ماہرین کے پینل کے بارے میں پیش کیے گئے مسودۂ قرارداد پر ووٹنگ کے دوران پاکستان نے رائے شماری میں حصہ لینے سے اجتناب (Abstain) کیا ہے۔ اجلاس کے بعد اقوام متحدہ میں پاکستان کے مستقل مندوب سفیر عاصم افتخار احمد نے اپنے بریفنگ بیان میں ووٹ سے اجتناب کی پالیسی کی تفصیلی وضاحت کرتے ہوئے سفارت کاری اور پُرامن مذاکرات کی بحالی پر زور دیا ہے۔
سفیر عاصم افتخار احمد نے سلامتی کونسل میں خطاب کرتے ہوئے اس امر پر گہری تشویش ظاہر کی کہ ایران کے جوہری معاملے پر بالخصوص سلامتی کونسل کے اندر غور و خوض وقت کے ساتھ انتہائی پیچیدہ ہو چکا ہے۔ ان کا کہنا تھا کہ عالمی برادری تعاون کے اس جذبے اور تنازعات کے پُرامن حل کے اصل اصول سے کافی دور نکل آئی ہے جس نے ایک دہائی سے زائد عرصہ قبل قرارداد 2231 کی منظور کی راہ ہموار کی تھی۔ انہوں نے واضح کیا کہ خطے میں جاری کشیدگی، جوہری تنصیبات پر حملوں اور سلامتی کونسل کے مستقل ارکان کے باہمی اختلافات نے اس مسئلے کے سفارتی حل کی کوششوں کو گہرا نقصان پہنچایا ہے۔
پاکستانی مندوب نے یاد دہانی کرائی کہ گزشتہ ستمبر میں کونسل کے پاس معاہدے کے تحت پابندیوں کے خاتمے کا عمل جاری رکھنے یا قرارداد 2231 کی چھ ماہ کی تکنیکی توسیع کا راستہ موجود تھا تا کہ سفارت کاری کو گنجائش فراہم کی جا سکے، مگر اتفاقِ رائے کے بغیر ایک ایسا راستہ منتخب کیا گیا جس کے دور رس منفی اثرات مرتب ہوئے۔ انہوں نے اعادہ کیا کہ پاکستان کا بدستور یہ اصولی مؤقف ہے کہ ایران کے جوہری پروگرام کے حل کے لیے بین الاقوامی جوہری توانائی ایجنسی (IAEA) کا آزادانہ، غیر سیاسی اور اپنے مینڈیٹ کے مطابق کردار نہایت اہم ہے اور تمام مسائل کا حل صرف مذاکرات میں ہی مضمر ہے۔
پاکستانی سفیر نے زور دے کر کہا کہ اسلام آباد مفاہمتی یادداشت (MoU) خطے میں امن و استحکام کے فروغ کے لیے ایک مضبوط بنیاد فراہم کرتی ہے۔ انہوں نے تمام متعلقہ فریقوں پر زور دیا کہ وہ اسلام آباد مفاہمتی یادداشت کے تحت طے پانے والے وعدوں پر فوری عملدرآمد کریں، کشیدگی کے بجائے دوبارہ مذاکرات کی میز پر آئیں اور سفارت کاری کو اپنا مثبت کردار ادا کرنے کا مکمل موقع دیں تاکہ خطے اور عالمی سلامتی کو درپیش خطرات کا خاتمہ ممکن ہو سکے۔
نیوز اینڈ نیوز کی وضاحت:
یہ خبر اقوام متحدہ میں پاکستان کے مستقل مشن کی جانب سے سلامتی کونسل میں جاری کردہ سرکاری ‘ایکسپلینیشن آف ووٹ’ کے باضابطہ متن کے مطابق ایڈٹ کی گئی ہے۔
ماخذ: اقوام متحدہ ڈیسک، نیوز اینڈ نیوز نیویارک۔