محمود احمد, August 23,2026
نئی دہلی (نیوز اینڈ نیوز) — 23 اگست 2026ء
انڈیا کی سیاست میں ڈیجیٹل مواصلات کا انداز تیزی سے بدل رہا ہے۔ 75 سالہ انڈین وزیراعظم نریندر مودی، جو طویل عرصے سے سکرپٹڈ تقاریر اور رسمی نشریات کے ذریعے اپنی ایک سخت گیر اور بااثر سیاسی رہنما کی شبیہ قائم رکھے ہوئے تھے، اب ملک کی نئی نسل بالخصوص ’جن زی‘ سے پیار اور بے تکلفانہ انداز میں رابطہ استوار کرنے کی کوشش کر رہے ہیں۔
حالیہ ہفتوں کے دوران مودی کے انسٹاگرام اکاؤنٹ میں ایک واضح اور نمایاں تبدیلی دیکھی گئی ہے۔ وہ ٹائم لائن جو ماضی میں صرف سرکاری و محتاط انداز میں تیار کی گئی تصاویر تک محدود تھی، اب اس میں انسٹاگرام ٹرینڈز جیسے ’گیٹ ریڈی وِد می‘ طرز کی ویڈیوز، موبائل سے خود بنائی گئی سیلفی ویڈیوز اور نوجوانوں سے براہِ راست ‘دوست’ کہہ کر مخاطب ہونے کے کلپس شامل ہیں۔ حال ہی میں نئی دہلی میں طلبہ کی ایک گریجویشن تقریب سے خطاب کرتے ہوئے مودی نے جن زی کے مقبول عام مکالموں کا سہارا لیا اور کہا کہ آج کا انڈین نوجوان اپنے خاندان کی پہلی نسل ہے جو راکٹ، ڈرون اور جدید کمپیوٹر چپس بنانے کے شعبے میں آگے بڑھ رہی ہے۔
واضح رہے کہ انسٹاگرام پر نریندر مودی کے 10 کروڑ 60 لاکھ (106 ملین) سے زیادہ فالوورز ہیں، جس کی بدولت وہ دنیا میں اس پلیٹ فارم پر سب سے زیادہ فالو کیے جانے والے بین الاقوامی سیاسی رہنماؤں میں شمار ہوتے ہیں۔ اگرچہ بھارتی جنتا پارٹی (بی جے پی) کو سنہ 2014ء کے عام انتخابات کے بعد سے ڈیجیٹل سیاست اور سوشل میڈیا میڈیا مہمات میں مہارت حاصل رہی ہے، لیکن مودی کا یہ نیا ‘غیر رسمی انداز’ بی جے پی کی روایتی ڈیجیٹل پالیسی کا حصہ نہیں تھا، بلکہ رواں سال ملک بھر میں نوجوانوں اور طلبہ کی جانب سے مختلف مسائل پر کیے گئے احتجاجی مظاہروں کے بعد مودی کی سوشل میڈیا ٹیم نے اس نئی حکمتِ عملی کو تیزی سے اپنایا ہے۔