محمود احمد, August 24,2026
پیرس (نیوز اینڈ نیوز) — 24 اگست 2026ء
سعودی عرب اور فرانس نے کھیل اور ایتھلیٹکس کے شعبے میں باہمی تعلقات کو فروغ دینے، تجربات کا تبادلہ کرنے اور مشترکہ پروگراموں کو وسعت دینے کے لیے ایک اہم مفاہمتی یادداشت پر باضابطہ دستخط کر دیے ہیں۔ یہ دستخط فرانسیسی دارالحکومت پیرس میں منعقدہ ’ای سپورٹس ورلڈ کپ 2026‘ کی پروقار اختتامی تقریب کے موقع پر کیے گئے۔
سعودی عرب کی جانب سے وزیرِ کھیل شہزادہ عبدالعزیز بن ترکی الفیصل اور فرانس کی جانب سے فرانسیسی وزیرِ کھیل مارینا فیری نے اس معاہدے پر دستخط کیے۔ اس مفاہمتی یادداشت کا بنیادی مقصد دونوں ممالک کے درمیان سپورٹس انڈسٹری میں تعاون کے ایک جامع اور عمومی فریم ورک کی تشکیل کرنا ہے، جس کے تحت دونوں ممالک کی میزبانی میں ہونے والی بین الاقوامی کانفرنسوں، سیمینارز اور کھیلوں کے بڑے عالمی ایونٹس میں مشترکہ شرکت کو یقینی بنایا جائے گا۔
اس معاہدے کے تحت دونوں ممالک کے کھیل سے وابستہ اداروں اور تنظیموں کے درمیان ایکسپرٹیز کا تبادلہ کیا جائے گا۔ اس میں خصوصی طور پر ایلیٹ سپورٹس، ای سپورٹس ، گراس روٹس سپورٹس، سپورٹس سائنس، سپورٹس میڈیسن اور سپورٹس لا (کھیلوں کے قوانین) جیسے اہم شعبوں کو شامل کیا گیا ہے۔ اس کے علاوہ دونوں ممالک کے کوچز، ماہرین اور محققین کے درمیان جدید تکنیکوں اور صلاحیتوں کی بہتری کے لیے باقاعدہ تبادلے کی راہ ہموار ہوگی، جو سعودی عرب کے ‘ویژن 2030’ کے تحت کھیل کے شعبے کی ترقی کی عکاسی کرتا ہے۔