Islamabad

کاشف عباسی , August 16,2026

اسلام آباد (نیوز اینڈ نیوز) — 16 اگست 2026ء

سپریم کورٹ آف پاکستان نے قرار دیا ہے کہ سزائے موت کے حساس مقدمات میں انصاف کی فراہمی کے دوران معمول سے بڑھ کر “سپر ڈیو پراسس” کے تمام آئینی اور قانونی تقاضے پورے کرنا انتہائی لازمی ہیں۔ عدالتِ عظمیٰ نے واضح کیا کہ کسی بھی ملزم کو سنے بغیر سزا دینا یا اس کی نظرثانی درخواست مسترد کرنا اصولِ فطری انصاف، منصفانہ ٹرائل اور آئینی ضمانتوں کی صریح خلاف ورزی ہے، جبکہ انتظامی ہدایات یا فل کورٹ کے انتظامی فیصلے آئین اور قانون سے بالاتر نہیں ہو سکتے۔

جسٹس ملک شہزاد احمد خان کی سربراہی میں جسٹس عقیل احمد عباسی اور جسٹس شکیل احمد پر مشتمل تین رکنی بینچ نے ملزم شیر اعظم کی فوجداری نظرثانی درخواست کا تفصیلی تحریری فیصلہ جاری کیا۔ سپریم کورٹ نے 26 اپریل 2012 کا وہ سابقہ حکم کالعدم قرار دے دیا جس کے ذریعے شیر اعظم کی پہلی نظرثانی درخواست ملزم اور اس کے وکیل کا موقف سنے بغیر چیمبر میں مسترد کی گئی تھی۔ عدالت نے قرار دیا کہ رولز میں ایسی کوئی شق موجود نہیں کہ سزائے موت پانے والے کی درخواست سنے بغیر مسترد کی جائے، لہٰذا سابقہ غیر قانونی حکم کے بعد دائر درخواست کو دوسری نظرثانی قرار دے کر ناقابلِ سماعت نہیں ٹھہرایا جا سکتا۔

جسٹس شکیل احمد نے اپنے اضافی نوٹ میں تحریر کیا کہ سزائے موت ایک ناقابلِ واپسی سزا ہے، اس لیے ایسے مقدمات میں آئین کے آرٹیکل 4، 9 اور 10 کے تحت طریقہ کار کی شفافیت محض رسمی معاملہ نہیں بلکہ بنیادی آئینی حق ہے۔ مقدمے کے حقائق کا جائزہ لیتے ہوئے عدالت نے قرار دیا کہ تعزیراتِ پاکستان کی دفعہ 302(ب) کے تحت تھانہ غازی (ہری پور) کے مقدمے میں قتل کا واضح محرک ثابت نہیں ہوا تھا اور نہ ہی کوئی چشم دید گواہ موجود تھا۔ سپریم کورٹ نے نظرثانی درخواست جزوی طور پر منظور کرتے ہوئے شیر اعظم کی سزائے موت کو عمر قید میں تبدیل کر دیا جبکہ دو لاکھ روپے معاوضے اور دیگر سزاؤں کے احکامات برقرار رکھے۔

کاشف عباسی , August 15,2026

مری (نیوز اینڈ نیوز) — 15 اگست 2026ء

وزیرِ اعلیٰ پنجاب مریم نواز شریف نے کہا ہے کہ پاکستان پیپلز پارٹی آزاد کشمیر میں اکثریتی جماعت نہیں ہے، لیکن افسوس کی بات ہے کہ اس کے باوجود مسلم لیگ (ن) پر دھاندلی کے بے بنیاد الزامات عائد کیے گئے۔ مری میں آزاد کشمیر کی پارلیمانی پارٹی کے اہم اجلاس سے خطاب کرتے ہوئے انہوں نے کہا کہ آزاد کشمیر میں دنگا فساد اور منفی سیاست کرنے والوں کو عوام نے اپنے ووٹ کی طاقت سے رد کر دیا ہے۔ شرپسند عناصر پاکستان اور آزاد کشمیر کے عوام کے درمیان دراڑیں ڈالنا چاہتے ہیں، لیکن ایسے عناصر کے لیے صرف شکست فاش ہے۔

وزیرِ اعلیٰ پنجاب کا مزید کہنا تھا کہ کشمیری عوام بخوبی جانتے ہیں کہ وفاق اور پنجاب میں عوامی فلاح و بہبود کے لیے کیا کام ہو رہا ہے۔ انہوں نے تنقید کرتے ہوئے کہا کہ پیپلز پارٹی آزاد کشمیر میں سڑکوں اور بسوں کی سہولیات کا وعدہ تک نہیں کر سکی، کیونکہ جہاں ان کی 17 سال سے حکومت ہے وہاں وہ کچھ نچلا کام نہیں کر سکے۔

سیاسی مخالفت کو دشمنی میں تبدیل نہ کیا جائے: میاں نواز شریف

اجلاس سے خطاب کرتے ہوئے مسلم لیگ (ن) کے قائد میاں محمد نواز شریف نے کہا کہ سیاست میں نظریاتی مخالفت ہوتی ہے، لیکن اس مخالفت کو اتنی حد تک نہیں بڑھنا چاہیے کہ وہ ذاتی دشمنی میں تبدیل ہو جائے۔ انہوں نے کہا کہ مسلم لیگ (ن) نے ہمیشہ اپنے سیاسی مخالفین کے ساتھ اچھا سلوک کیا ہے۔ آزاد کشمیر کا سیاسی ماحول ہمیشہ افہام و تفہیم، رواداری اور باہمی احترام پر مبنی رہا ہے، اور اگر اس کے اندر دشمنی کے جراثیم داخل ہو جائیں تو یہ کسی صورت اچھی بات نہیں ہے۔

نواز شریف نے زور دے کر کہا کہ آزاد کشمیر کی ترقی کے لیے زیادہ سے زیادہ فنڈز فراہم کیے جانے چاہئیں۔ انہوں نے کہا کہ انتخابات کے ابتدائی دو مرحلوں میں ن لیگ کو کامیابی ملی ہے اور عوام نے ایک بار پھر پارٹی کی قیادت اور کارکردگی پر اپنے اعتماد کا اظہار کیا ہے، تاہم ہمیں اپنے اچھے امیدواروں کی شکست کے عوامل کا بھی باریک بینی سے جائزہ لینا ہوگا۔

قائد ن لیگ نے کہا کہ اگر پارٹی نے عوام کی توقعات کے مطابق کام نہ کیا تو یہاں کے لوگ ناراض ہوں گے۔ آزاد کشمیر میں معياری سڑکیں، جدید ہسپتال اور تعلیمی سہولیات فراہم ہونی چاہئیں، کیونکہ آزاد کشمیر کا ہر بچہ بھی چاہتا ہے کہ اس کے ہاتھ میں جدید لیپ ٹاپ ہو۔ انہوں نے کہا کہ وزیراعظم شہباز شریف کی دن رات کی محنت سے ملک معاشی اور انتظامی طور پر آگے بڑھ رہا ہے۔

منصور احمد, August 15,2026

اسلام آباد (نیوز اینڈ نیوز) — 15 اگست 2026ء

چیئرمین سینیٹ سید یوسف رضا گیلانی نے ماہِ ربیع الاول کی آمد کے بابرکت موقع پر پوری امتِ مسلمہ اور بالخصوص پاکستانی قوم کو دلی مبارکباد پیش کرتے ہوئے کہا ہے کہ یہ ماہِ مقدس نبی کریم حضرت محمد مصطفٰے ﷺ کی ولادتِ باسعادت کا مہینہ ہے، جو پوری انسانیت کے لیے ہدایت، رحمت، امن اور رواداری کا پیغام لے کر آیا۔

ہفتے کے روز جاری کردہ اپنے خصوصی پیغام میں چیئرمین سینیٹ نے کہا کہ سیرتِ طیبہ ﷺ زندگی کے ہر شعبے میں کامل رہنمائی کا سرچشمہ ہے۔ آپ ﷺ نے انسانیت کو عدل و انصاف، مساوات، صبر، بھائی چارے اور حقوق العباد کے احترام کا درس دیا۔ انہوں نے زور دیا کہ ربیع الاول کا مہینہ ہمیں اپنی انفرادی اور اجتماعی زندگیوں کو اسوہ حسنہ کے سانچے میں ڈھالنے کے عہد کی تجدید کا موقع فراہم کرتا ہے۔

سید یوسف رضا گیلانی نے کہا کہ امتِ مسلمہ کو درپیش موجودہ چیلنجز کا واحد حل اتحاد، باہمی احترام، اور افہام و تفہیم پر مبنی حکمتِ عملی میں مضمر ہے۔ انہوں نے قوم پر زور دیا کہ اس مبارک مہینے میں غریب، نادار اور مستحق افراد کو اپنی خوشیوں میں شامل کریں۔ چیئرمین سینیٹ نے ملکی دفاع اور سلامتی کے لیے قربانیاں دینے والے شہدائے وطن کو خراجِ عقیدت پیش کرتے ہوئے ان کے درجات کی بلندی کی دعا کی اور التجا کی کہ اللہ تعالیٰ پاکستان کو درپیش بحرانوں سے نجات اور پائیدار امن و خوشحالی عطا فرمائے۔

منصور احمد, August 15,2026

اسلام آباد (نیوز اینڈ نیوز) — 15 اگست 2026ء

وفاقی وزیر برائے پارلیمانی امور ڈاکٹر طارق فضل چوہدری نے کہا ہے کہ موجودہ حکومت کے اقتدار میں آنے کے بعد سے اس کے خلاف مسلسل بلاجواز پروپیگنڈا کیا جا رہا ہے، جو ملکی جمہوریت اور سیاسی ماحول کے لیے کسی طور مناسب نہیں۔

ایک نجی ٹی وی چینل کے پروگرام میں گفتگو کرتے ہوئے وفاقی وزیر نے اپوزیشن جماعت پاکستان تحریک انصاف (پی ٹی آئی) پر زور دیا کہ وہ بے بنیاد اور غلط معلومات پھیلانے کی سیاست ترک کر کے قومی مفاد کے اہم امور پر حکومت کے ساتھ سنجیدہ اور معنی خیز مذاکرات کی راہ اختیار کرے۔ ان کا کہنا تھا کہ منفی طرزِ عمل اور محاذ آرائی سے موجودہ سیاسی ماحول مزید پیچیدہ ہوگا، جبکہ درپیش قومی چیلنجز کے حل کے لیے سنجیدہ بات چیت ہی واحد حل ہے۔

ایک سوال کے جواب میں ڈاکٹر طارق فضل چوہدری نے واضح کیا کہ جمہوری نظام کو غیر مستحکم کرنے یا مفلوج کرنے کی کوششوں سے کسی بھی فریق کا مقصد حاصل نہیں ہو سکتا۔ انہوں نے کہا کہ اسلام آباد ملک کا وفاقی دارالحکومت ہے اور یہاں آئین و قانون کے دائرے میں رہتے ہوئے کسی کو بھی اپنی قانونی و سیاسی سرگرمیاں انجام دینے سے نہیں روکا جاتا۔ تاہم، سیاسی فائدے کے لیے معاشرے میں بے چینی، نفرت اور انارکی پھیلانا بلاشبہ ناقابلِ قبول اور ملک کے لیے نقصان دہ ہے۔

منصور احمد, August 14,2026

اسلام آباد (نیوز اینڈ نیوز) — 14 اگست 2026ء

وفاقی وزیر برائے منصوبہ بندی، ترقی و اصلاحات پروفیسر احسن اقبال نے کہا ہے کہ پاکستان کو فارماسیوٹیکل صنعت کا عالمی مرکز بنانا حکومت کا اہم ہدف ہے، اور فارماسیوٹیکل انڈسٹری کو 2035ء تک ملکی برآمدات کو 100 ارب ڈالر سے زائد تک لے جانے کے قومی ہدف میں اپنا فعال حصہ متعین کرنا ہوگا۔

‘اڑان پاکستان’ کے تحت فارماسیوٹیکل برآمدات میں سہولت سے متعلق منعقدہ ایک اعلیٰ سطح کی گول میز کانفرنس سے خطاب کرتے ہوئے وفاقی وزیر نے کہا کہ پاکستان کی فارما برآمدات 20 سال کی بلند ترین سطح یعنی 457 ملین ڈالر تک پہنچ چکی ہیں، تاہم اب ہمیں معمولی اضافے سے آگے بڑھ کر اس شعبے کو اربوں ڈالر کی صنعت میں تبدیل کرنا ہوگا۔

پروفیسر احسن اقبال نے فارماسیوٹیکل انڈسٹری پر زور دیا کہ وہ تمام متعلقہ فریقین کے ساتھ ایک ماہ کی مشاورت کے بعد سال 2030ء اور اس کے بعد کا جامع روڈ میپ تیار کر کے حکومت کے سامنے پیش کرے۔ انہوں نے یقین دہانی کرائی کہ حکومت پالیسی اور ادارہ جاتی رکاوٹوں کو دور کرنے اور عالمی منڈیوں تک رسائی فراہم کرنے کے لیے مکمل تعاون کرے گی۔

وفاقی وزیر نے اس بات پر تشویش ظاہر کی کہ پاکستان میں فارماسیوٹیکل خام مال کا تقریباً 85 فیصد حصہ باہر سے درآمد کیا جاتا ہے۔ انہوں نے تاکید کی کہ ملک کو درآمدی انحصار کم کر کے مقامی پیداواری صلاحیت کو مضبوط بنانا ہوگا۔ انہوں نے ریسرچ لیبارٹریز کو صرف مقالوں تک محدود رکھنے کے بجائے عملی تحقیق اور جدت پر توجہ دینے کی ہدایت کی تاکہ “میڈ ان پاکستان” کی برانڈنگ کو عالمی سطح پر معیار اور اعتماد کی علامت بنایا جا سکے۔

کاشف عباسی , August 13,2026

اسلام آباد (نیوز اینڈ نیوز) — 13 اگست 2026ء

چیئرمین سینیٹ سید یوسف رضا گیلانی نے کہا ہے کہ پاکستان اور چین کی دوستی ایک دیرپا اور لازوال بھائی چارے کا تعلق ہے، جو باہمی اعتماد، احترام اور غیر متزلزل حمایت پر استوار ہے۔ انہوں نے زور دیا کہ اس تاریخی دوستی کو پاکستان بھر میں تمام سیاسی جماعتوں کی مکمل حمایت حاصل ہے جو کہ ایک مضبوط قومی اتفاقِ رائے کی عکاس ہے۔

اسلام آباد میں منعقدہ ایک اہم سیمینار سے بطور مہمانِ خصوصی خطاب کرتے ہوئے چیئرمین سینیٹ نے ان خیالات کا اظہار کیا۔ اس تقریب میں چین کے سفیر جیانگ زائی ڈونگ، کمیونسٹ پارٹی آف چائنا (CPC) کے مرکزی وفد، پاکستانی سیاسی جماعتوں کے نمائندوں اور ممتاز شخصیات نے شرکت کی۔ سیمینار کے آغاز میں چیئرمین سینیٹ نے صدرِ مملکت آصف علی زرداری کا خصوصی پیغام بھی پڑھ کر سنایا، جس میں صدر نے چینی وفد کو خوش آمدید کہتے ہوئے کہا کہ پاک چین دوستی وقت کی ہر آزمائش پر پورا اتری ہے اور دونوں ممالک کے باہمی مفادات کو فروغ دے رہی ہے۔

اپنے خطاب میں چیئرمین سینیٹ نے کمیونسٹ پارٹی آف چائنا کے قیام کی 105ویں سالگرہ پر چینی قیادت اور عوام کو مبارکباد پیش کی۔ انہوں نے کہا کہ چین کی غیر معمولی ترقی، غربت کے خاتمے اور جدید طرزِ حکمرانی کے تجربات ترقی پذیر ممالک کے لیے ایک روشن مثال ہیں۔ انہوں نے ون چائنا پالیسی کے لیے پاکستان کے غیر متزلزل عزم کا اعادہ کرتے ہوئے کہا کہ چین پاکستان کی خارجہ پالیسی کا بنیادی ستون ہے۔

سیمینار سے قبل مسٹر لیو ڈاشیو کی قیادت میں چینی وفد نے چینی سفیر کے ہمراہ چیئرمین سینیٹ سے خصوصی ملاقات بھی کی، جس میں پارلیمانی، سیاسی اور جماعتی سطح پر روابط اور تعاون کو مزید وسعت دینے پر اتفاق کیا گیا۔

کاشف عباسی , August 12,2026

اسلام آباد (نیوز اینڈ نیوز) — 12 اگست 2026ء

پاکستان تحریک انصاف (پی ٹی آئی) کے بانی عمران خان کی جانب سے جیل سے پارٹی کے بانی رہنما اور دیرینہ ساتھی اکبر ایس بابر کو اہم پیغام بھیجے جانے کا دعویٰ سامنے آیا ہے۔ اکبر ایس بابر نے اس معاملے کی تصدیق کرتے ہوئے بتایا کہ عمران خان کے ایک مشترکہ دوست، جو خود بھی جیل میں ہیں، کے ذریعے یہ پیغام ان تک پہنچایا گیا ہے۔

میڈیا سے گفتگو کرتے ہوئے اکبر ایس بابر نے انکشاف کیا کہ عمران خان نے اپنے پیغام میں کہا ہے کہ وہ جیل سے رہائی کے فوراً بعد سب سے پہلے اکبر ایس بابر کے گھر جائیں گے۔ اس کے علاوہ بانی پی ٹی آئی نے خواہش ظاہر کی ہے کہ پارٹی کے ابتدائی دور سے وابستہ، ناراض رہنماؤں اور کارکنوں کو دوبارہ ایک ہی سیاسی پلیٹ فارم پر اکٹھا کیا جائے۔ عمران خان نے اپنے ابتدائی ساتھیوں کو پارٹی کا حقیقی اثاثہ قرار دیتے ہوئے اعتراف کیا کہ جدوجہد کے دور کے مخلص ارکان کی کمی ہمیشہ محسوس کی گئی اور اب ان تمام لوگوں کو دوبارہ قریب لانے کی شدید ضرورت ہے۔

عمران خان کا پیغام موصول ہونے کے بعد اکبر ایس بابر نے ناراض ارکان اور بانی رہنماؤں کو متحد کرنے کے لیے عملی کاوشیں شروع کر دی ہیں۔ اس سلسلے میں پی ٹی آئی پنجاب کے سابق سینئر نائب صدر رانا سہیل کی سربراہی میں ایک چار رکنی کمیٹی تشکیل دے دی گئی ہے، جس میں امین ذکی، فیصل پیرزادہ اور آصف احمد شامل ہیں۔ کمیٹی نے ان تمام ساتھیوں سے رابطہ مہم کا آغاز کر دیا ہے جو مختلف وجوہات کی بنا پر پارٹی سے دور یا ناراض ہو گئے تھے۔

اکبر ایس بابر کے مطابق عمران خان کے اس پیغام پر ناراض ارکان کا ردعمل انتہائی مثبت رہا ہے۔ انہوں نے کہا کہ عمران خان کے ساتھ ان کے کبھی ذاتی نہیں بلکہ محض سیاسی اختلافات رہے ہیں اور اگر بانی پی ٹی آئی ان کے گھر آئیں گے تو وہ ان کا گرمجوشی سے استقبال کریں گے۔ انہوں نے اعلان کیا کہ تمام بانی ارکان اور کارکنوں کو دوبارہ متحرک کرنے کے بعد اگلے ماہ لاہور میں ایک بڑا کنونشن منعقد کیا جائے گا تاکہ نظریاتی ساتھیوں کو دوبارہ ایک پیج پر لایا جا سکے۔

منصور احمد, August 11,2026

اسلام آباد (نیوز اینڈ نیوز) — 11 اگست 2026ء

فیڈرل انویسٹی گیشن ایجنسی (ایف آئی اے) اسلام آباد زون کے اینٹی ہیومن ٹریفکنگ سرکل نے برازیل سے ڈیپورٹ ہو کر پاکستان پہنچنے والے مسافر کے خلاف قانونی کارروائی کرتے ہوئے مقدمہ درج کر کے اسے گرفتار کر لیا ہے۔

ترجمان ایف آئی اے کے مطابق ڈیپورٹ ہونے والے مسافر علی رضا ولد محمد عارف کے خلاف پاسپورٹ ایکٹ 1974ء کی دفعات 3 اور 4 کے تحت پرچہ درج کیا گیا ہے۔ ملزم 9 اگست 2026ء کو غیر ملکی ایئر لائن کی فلائٹ کے ذریعے اسلام آباد ایئرپورٹ پہنچا تھا، جس کی ڈیپورٹیشن دستاویزات میں وجہ ‘لو پروفائل ایسائلم سیکر’ درج تھی۔ مربوط نظام کے ریکارڈ سے پتہ چلا کہ ملزم روانہ 17 مئی 2026ء کو لاہور ایئرپورٹ سے وزٹ ویزے پر انڈونیشیا گیا تھا۔

ابتدائی تفتیش کے دوران ملزم نے انکشاف کیا کہ اس نے انڈونیشیا سے سعودی عرب اور پھر وہاں سے میکسیکو کا ویزا حاصل کیا، جس کے بعد وہ برازیل پہنچا اور ایک دن کے ٹرانزٹ قیام کی بجائے وہاں غیر قانونی طور پر مقررہ مدت سے زائد مقیم رہا۔ قانون شکنی پر برازیلی حکام نے اسے حراست میں لے کر ایمرجنسی پاسپورٹ پر واپس ڈیپورٹ کر دیا۔ ایف آئی اے حکام کے مطابق ملزم کے پاسپورٹ پر چسپاں میکسیکو کا ویزا بھی مکمل طور پر مشکوک اور جعلی پایا گیا ہے۔

ایف آئی اے اینٹی ہیومن ٹریفکنگ سرکل نے ملزم کو حراست میں لے کر تفتیش شروع کر دی ہے، جبکہ اس انسانی اسمگلنگ نیٹ ورک اور جعلی دستاویزات کی تیاری میں ملوث ایجنٹوں کا سراغ لگایا جا رہا ہے۔

منصور احمد, August 11,2026

اسلام آباد (نیوز اینڈ نیوز) — 11 اگست 2026ء

وفاقی وزیر خزانہ و محصولات سینیٹر محمد اورنگزیب سے پاکستان بزنس کونسل کے نو منتخب چیئرمین زید بشیر اور چیف ایگزیکٹو آفیسر جاوید قریشی نے ملاقات کی۔ ملاقات کے دوران ملک میں غیر ملکی و مقامی سرمایہ کاری کے فروغ، کاروباری مسابقت، ریگولیٹری اصلاحات اور قومی معاشی ترقی میں نجی شعبے کے نقش کو مزید فعال بنانے پر سیر حاصل گفتگو کی گئی۔

وزیر خزانہ نے زید بشیر کو نئی ذمہ داری سنبھالنے پر مبارکباد دیتے ہوئے کہا کہ موجودہ معاشی منظر نامے میں نجی شعبے کی قیادت میں ترقی بے حد ضروری ہے۔ انہوں نے زور دیا کہ عالمی منڈیوں میں مسابقت برقرار رکھنے کے لیے کاروباری اداروں کو ٹیکنالوجی اور ڈیجیٹل تبدیلی کے تقاضوں سے ہم آہنگ ہونا پڑے گا۔ سینیٹر محمد اورنگزیب نے پی بی سی پر زور دیا کہ وہ معاشی چیلنجز کے حل اور بہتر پالیسی سازی کے لیے مختصر، شعبہ جاتی اور عملی تحقیق حکومت کے سامنے پیش کرے تاکہ درپیش مسائل پر فوری اقدامات کیے جا سکیں۔

ملاقات میں بین الاقوامی فنانسنگ اور سرمایہ کاری کے مواقع پر گفتگو کرتے ہوئے امریکی انٹرنیشنل ڈویلپمنٹ فنانس کارپوریشن اور ایکسپورٹ امپورٹ بینک کے ذرائع سے فائدہ اٹھانے پر بھی غور کیا گیا۔ وزیر خزانہ نے کہا کہ ممکنہ عالمی سرمایہ کاروں کے سامنے مکمل طور پر تیار اور تجارتی لحاظ سے منافع بخش منصوبے پیش کیے جانے چاہئیں۔ اس کے علاوہ ملک کے درمیانی مدت کے ٹیکس پالیسی فریم ورک اور اصلاحات کا جائزہ لیتے ہوئے انہوں نے ایک ایسے پائیدار ٹیکس نظام کی تشکیل پر زور دیا جو مسابقت اور سرمایہ کاری کو تحرک فراہم کرے۔

پاکستان بزنس کونسل کے نو منتخب چیئرمین زید بشیر اور سی ای او جاوید قریشی نے حکومت کی مالیاتی اور معاشی سمت پر اعتماد کا اظہار کرتے ہوئے موجودہ وفاقی بجٹ کو حالیہ برسوں کا سب سے امید افزا بجٹ قرار دیا۔ انہوں نے یقین دہانی کرائی کہ بزنس کونسل نجی شعبے کی ترقی، پیداواری صلاحیت میں اضافے اور سرمایہ کاری کے سازگار ماحول کے لیے حکومت کے ساتھ مل کر کام جاری رکھے گی۔

روزینہ اسماعیل, August 11,2026

اسلام آباد (نیوز اینڈ نیوز) — 11 اگست 2026ء

ہیلتھ سروسز اکیڈمی اسلام آباد نے تعلیمی سیشن خزاں 2026ء کے لیے اپنے چار سالہ بی ایس آپٹومیٹری ڈگری پروگرام میں نئے داخلوں کا باقاعدہ اعلان کر دیا ہے۔

ہیلتھ سروسز اکیڈمی انتظامیہ کی جانب سے جاری کی گئی تفصیلات کے مطابق اس پروگرام میں داخلے کے لیے وہ تمام امیدوار اپلائی کرنے کے اہل ہوں گے جنہوں نے ایف ایس سی پری میڈیکل یا اس کے مساوی امتحان میں کم از کم 50 فیصد نمبر حاصل کیے ہوں۔ یہ چار سالہ ڈگری پروگرام ہائر ایجوکیشن کمیشن سے مکمل منظور شدہ ہے، جبکہ ہیلتھ سروسز اکیڈمی ایچ ای سی کی تسلیم شدہ یونیورسٹی کا درجہ رکھتی ہے۔ مزید برآں، یہ کورس الائیڈ ہیلتھ پروفیشنل کونسل کے تحت باقاعدہ رجسٹرڈ اور ریگولیٹڈ ہے، جبکہ اس ڈگری کو ‘ورلڈ کونسل آف آپٹومیٹری’ سے بھی عالمی سطح پر تسلیم کیا گیا ہے۔

اکیڈمی حکام کا کہنا ہے کہ چار سالہ ڈگری کامیابی سے مکمل کرنے والے گریجویٹس کے لیے ملک و بیرونِ ملک روزگار کی وسیع تر مارکیٹ موجود رہے گی۔ فراغت حاصل کرنے والے طلبہ و طالبات سرکاری و نجی ہسپتالوں، آئی کلینکس، طبی تدریس و سائنسی تحقیق کے شعبوں، آپٹیکل انڈسٹری، بزنس مینجمنٹ، اور ماہرینِ امراضِ چشم کے ساتھ کلینیکل پریکٹس سمیت مختلف معتبر شعبوں میں بطور پیشہ ور ماہرِ بصریات اپنی خدمات انجام دے سکیں گے۔

اس ڈگری پروگرام کی فی سمسٹر ٹیوشن فیس 70 ہزار روپے مقرر کی گئی ہے۔ تمام خواہشمند امیدوار اپنی درخواستیں ہیلتھ سروسز اکیڈمی کی سرکاری ویب سائٹ کے ذریعے آن لائن جمع کرا سکتے ہیں۔ داخلہ فارم جمع کرانے کی آخری تاریخ 20 اگست 2026ء مقرر کی گئی ہے۔ ہیلتھ سروسز اکیڈمی کا کیمپس پارک روڈ، پی ایم ہیلتھ کمپلیکس، چک شہزاد اسلام آباد میں واقع ہے۔