روزینہ اسماعیل, August 24,2026
اسلام آباد (نیوز اینڈ نیوز) — 24 اگست 2026ء
پاکستان میڈیکل اینڈ ڈینٹل کونسل (پی ایم ڈی سی) نے ملک بھر کے تمام میڈیکل اور ڈینٹل پریکٹیشنرز سمیت سپیشلسٹس کو ہدایت کی ہے کہ وہ پی ایم ڈی سی ایکٹ 2022ء اور متعلقہ قواعد و ضوابط کے تحت اپنے رجسٹریشن سرٹیفکیٹس کی باقاعدہ تجدید کرائیں۔ پی ایم ڈی سی کے جاری کردہ اہم اعلان کے مطابق تمام ڈاکٹرز کو اپنے لائسنس کی تجدید کے لیے چھ ماہ کی مہلت دی گئی ہے تاکہ قانونی، اخلاقی اور پیشہ ورانہ تقاضوں کی مسلسل پابندی کو یقینی بنایا جا سکے۔
پی ایم ڈی سی حکام کے مطابق اس اقدام کا بنیادی مقصد ملک بھر میں لائسنس یافتہ ڈاکٹروں کے قومی رجسٹر کو اپ ڈیٹ اور قابلِ تصدیق بنانا ہے تاکہ جعلی پریکٹس، اتائی پن ، اور رجسٹریشن سرٹیفکیٹس کے فراڈ پر مبنی استعمال کا خاتمہ کیا جا سکے۔ ایک جدید اور مستند ڈیٹا بیس کے ذریعے مرحوم یا غیر فعال ڈاکٹروں کی پیشہ ورانہ اسناد کے غلط استعمال کو روکا جا سکے گا، جس سے صحت عامہ کے نظام پر عوام کے اعتماد کو مزید تقویت ملے گی۔
کونسل نے اس بات پر بھی زور دیا کہ بروقت تجدید نہ صرف پاکستان میں قانونی پریکٹس کے لیے ضروری ہے بلکہ بیرونِ ملک ملازمت، پوسٹ گریجویٹ ٹریننگ اور عالمی لائسنسنگ کے لیے بھی بنیادی حیثیت رکھتی ہے۔ پی ایم ڈی سی نے تمام ڈاکٹروں اور ڈینٹسٹس سے اپیل کی ہے کہ وہ چھ ماہ کی درکار مدت ختم ہونے کا انتظار کیے بغیر جلد از جلد اپنی رجسٹریشن کی تجدید کا عمل مکمل کریں۔