روزینہ اسماعیل, JULY 25,2026
اسلام آباد (نیوز اینڈ نیوز) — 25 جولائی 2026ء
نیشنل ڈیزاسٹر مینجمنٹ اتھارٹی (این ڈی ایم اے) نے مسلسل مون سون بارشوں کے باعث ملک کے مختلف حصوں میں سیلاب اور طغیانی کے شدید خطرات کا انتباہ جاری کیا ہے۔ نیشنل ایمرجنسیز آپریشن سنٹر کے مطابق دریائے چناب کے مختلف مقامات بشمول خانکی، قادر آباد اور چنیوٹ پل پر درمیانے درجے کا سیلاب ریکارڈ کیا گیا ہے جبکہ آئندہ 24 گھنٹوں کے دوران مرالہ، خانکی اور ترمو بیراج میں پانی کے بہاؤ میں مزید اضافے کی توقع ہے۔ اتھارٹی نے خبردار کیا ہے کہ اگلے 24 سے 48 گھنٹوں کے دوران ڈیرہ غازی خان کے پہاڑی نالوں، خیبر پختونخوا کے موسمی ندی نالوں اور شمالی بلوچستان میں شدید فلیش فلڈنگ (اچانک سیلاب) کا خطرہ ہے، جبکہ گوجرانوالہ، سیالکوٹ، نارووال، منڈی بہاؤالدین، فیصل آباد، سرگودھا، جھنگ، حافظ آباد، ملتان اور لاہور میں اربن فلڈنگ (شہری سیلاب) کی پیش گوئی کی گئی ہے۔ این ڈی ایم اے نے مسافروں اور شہریوں کو سیلابی علاقوں اور پہاڑی راستوں پر غیر ضروری سفر سے گریز کرنے، ندی نالوں کو عبور نہ کرنے اور لینڈ سلائیڈنگ والے حصوں سے دور رہنے کی اپیل کی ہے، جبکہ تمام ضلعی انتظامیہ اور ایمرجنسی ٹیموں کو ہائی الرٹ پر رہنے کی ہدایت دی ہے۔
