محمود احمد, August 21,2026
اسلام آباد (نیوز اینڈ نیوز) — 21 اگست 2026ء
پاکستان، ترکیہ، سعودی عرب، قطر، انڈونیشیا اور ملائیشیا سمیت 12 مسلم ممالک کے وزرائے خارجہ نے شمال مغربی شام میں ابو الظہور فوجی اڈے پر اسرائیلی فضائی حملوں کی شدید ترین الفاظ میں مذمت کی ہے اور اسے شام کی خودمختاری و علاقائی سالمیت پر براہِ راست حملہ قرار دیا ہے۔
دفترِ خارجہ کی جانب سے جاری کردہ مشترکہ اعلامیے کے مطابق، پاکستان، ترکیہ، الجزائر، انڈونیشیا، اردن، لبنان، ملائیشیا، موریطانیہ، فلسطین، قطر، سعودی عرب اور صومالیہ کے وزرائے خارجہ نے شام کے بنیادی ڈھانچے کو مسلسل نشانہ بنانے پر گہری تشویش کا اظہار کیا۔ وزرائے خارجہ نے واضح کیا کہ اسرائیل کا یہ عمل خطے میں امن و استحکام کو تباہ کرنے، بین الاقوامی قوانین کی دھجیاں اڑانے اور شام میں انسانی بحران سے نمٹنے کی کوششوں کو نقصان پہنچانے کا باعث بن رہا ہے۔
مشترکہ اعلامیے میں عالمی برادری اور اقوامِ متحدہ پر زور دیا گیا ہے کہ وہ اسرائیلی جارحیت کے خلاف فوری اور مضبوط موقف اپنائیں۔ تمام وزرائے خارجہ نے 1974ء کے معاہدے کے مکمل احترام اور مقبوضہ علاقوں سے اسرائیلی افواج کے فوری انخلا کا مطالبہ کرتے ہوئے شام کی سیاسی وحدت اور آزادی کا ہر قیمت پر تحفظ کرنے پر زور دیا۔
