Pakistan

Pakistan ki siyasi, samaji aur hukoomati khabrein, taaza updates aur aham waqiat.

خیبر پختونخوا میں امن و امان کے قیام کے لیے پولیس کی قربانیاں ناقابلِ فراموش ہیں؛ شہدا کے اہل خانہ کی فلاح و بہبود اور فورس کی استعداد کار کے لیے ہر ممکن تعاون جاری رہے گا

by

کاشف عباسی , August 04,2026

سوات (نیوز اینڈ نیوز) — 4 اگست 2026ء

وفاقی وزیر برائے امورِ کشمیر و گلگت بلتستان اور پاکستان مسلم لیگ (ن) خیبر پختونخوا کے صدر انجینئر امیر مقام نے یومِ شہدائے پولیس کے موقع پر پولیس لائن سوات میں واقع یادگارِ شہدا کا خاص دورہ کیا، جہاں انہوں نے وطنِ عزیز کی خاطر اپنی جانوں کا نذرانہ پیش کرنے والے شجاع شہدا کو زبردست خراجِ عقیدت پیش کیا، یادگار پر پھولوں کی چادر چڑھائی اور ان کے بلندیِ درجات کے لیے فاتحہ خوانی کی۔

اس موقع پر ڈسٹرکٹ پولیس آفیسر (ڈی پی او) سوات سمیت پولیس کے دیگر اعلیٰ و سینئر افسران بھی موجود تھے۔ ڈی پی او سوات نے وفاقی وزیر کو ضلع سوات میں امن و امان کی مجموعی صورتحال، سیکیورٹی انتظامات اور پولیس فورس کی پیشہ ورانہ ذمہ داریوں کے حوالے سے تفصیلی بریفنگ دی۔

وفاقی وزیر انجینئر امیر مقام نے پولیس کے شہدا کی بے مثال قربانیوں کو سراہتے ہوئے کہا کہ ملک میں امن و استحکام اور قانون کی حاکمیت کے قیام کے لیے پولیس فورس کی خدمات اور عظیم قربانیاں تاریخ میں سنہری حروف سے لکھی جائیں گی اور انہیں کبھی فراموش نہیں کیا جا سکتا۔ انہوں نے اس عزم کا اعادہ کیا کہ حکومت شہدا کے غمیزدہ اہل خانہ کی فلاح و بہبود اور پولیس فورس کی پیشہ ورانہ استعداد کار میں اضافے کے لیے ہر ممکن تعاون اور وسائل کی فراہمی جاری رکھے گی۔

تقریب میں سابق صوبائی وزیر و ن لیگ سوات ڈویژن کے صدر واجد علی خان، سابق صوبائی وزیر و سیکرٹری جنرل محمد علی شاہ خان، ضلعی صدر قوی خان، سٹی مینگورہ صدر حاجی عمران خان، سیکرٹری جنرل نور خان، وزیراعظم یوتھ کوآرڈینیٹر سید صادق عزیز باچا، سابق رکن صوبائی اسمبلی فضل اللہ خان سمیت مسلم لیگ (ن) کے متعدد مرکزی و مقامی عہدیداران اور ذمہ داران بھی بڑی تعداد میں موجود تھے۔

ہائر ایجوکیشن کمیشن نے لاء ایڈمیشن ٹیسٹ کے نتائج کا اعلان کر دیا

by

روزینہ اسماعیل, August 04,2026

اسلام آباد (نیوز اینڈ نیوز) — 4 اگست 2026ء

ہائر ایجوکیشن کمیشن (ایچ ای سی) نے لاء ایڈمیشن ٹیسٹ کے نتائج کا باضابطہ طور پر اعلان کر دیا ہے۔ ملک بھر سے ٹیسٹ میں شریک ہونے والے امیدوار اب ایچ ای سی کی ایجوکیشن ٹیسٹنگ کونسل (ای ٹی سی) کے آن لائن پورٹل کے ذریعے اپنے نتائج کا جائزہ لے سکتے ہیں۔

ایچ ای سی کی جانب سے جاری کردہ ہدایات کے مطابق تمام امیدوار اپنے رجسٹرڈ اکاؤنٹ کے ذریعے ای ٹی سی پورٹل پر لاگ ان کر کے اپنا نتیجہ اور اسکور کارڈ حاصل کر سکتے ہیں۔ ہائر ایجوکیشن کمیشن نے تمام متعلقہ امیدواروں کو ہدایت کی ہے کہ وہ نتائج اور دیگر تمام ضروری تفصیلات کے لیے محض ای ٹی سی کے آفیشل پورٹل پر رجوع کریں اور وہاں فراہم کردہ ہدایات کے مطابق اگلا مرحلہ مکمل کریں۔

پی ایس ڈی پی کے تحت پاکستان ٹیلی ویژن کی ری ویمپنگ اور ماسٹر کنٹرول رومز کو جدید بنانے پر اتفاق؛ گلگت بلتستان میں عالمی کھیلوں کے مقابلوں کی لائیو کوریج کے لیے مقامی براڈکاسٹنگ انفراسٹرکچر قائم کیا جائے گا

by

محمود احمد, August 04,2026

اسلام آباد (نیوز اینڈ نیوز) — 4 اگست 2026ء

وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال اور وفاقی وزیر اطلاعات و نشریات عطاء اللہ تارڑ کے درمیان ایک اہم ملاقات ہوئی، جس میں پبلک سیکٹر ڈویلپمنٹ پروگرام (پی ایس ڈی پی) کے تحت پاکستان ٹیلی ویژن (پی ٹی وی) کی ری ویمپنگ اور اسے جدید تکنیکی تقاضوں سے ہم آہنگ کرنے کے منصوبے پر تفصیلی تبادلہ خیال کیا گیا۔

ملاقات کے دوران وفاقی وزیر اطلاعات عطاء اللہ تارڑ نے کہا کہ پی ٹی وی کی اصلاحات اور ری ویمپنگ کے اس اہم منصوبے کی بروقت تکمیل کے لیے پی ایس ڈی پی کے تحت وزارتِ منصوبہ بندی کے مکمل تعاون کی ضرورت ہے۔ انہوں نے اس بات کی نشاندہی کی کہ گلگت بلتستان جیسے اہمیت کے حامل خطے میں بین الاقوامی کھیلوں کے مقابلوں کی براہِ راست (لائیو) نشریات کے لیے مقامی براڈکاسٹنگ انفراسٹرکچر کی اشد ضرورت ہے۔ اس وقت وہاں او بی وینز اسلام آباد سے بھیجنا پڑتی ہیں، جس کے باعث نہ صرف مالی اخراجات بڑھتے ہیں بلکہ شدید انتظامی مشکلات کا بھی سامنا کرنا پڑتا ہے۔ وفاقی وزیر اطلاعات نے مزید کہا کہ پی ٹی وی کے ماسٹر کنٹرول رومز کو جدید ترین ٹیکنالوجی پر منتقل کرنا وقت کا تقاضا ہے تاکہ ہمارا قومی نشریاتی ادارہ عالمی معیار کے مطابق براڈکاسٹنگ کی سہولیات مہیا کر سکے۔

اس موقع پر وفاقی وزیر برائے منصوبہ بندی پروفیسر احسن اقبال نے اپنے مکمل تعاون کا یقین دلاتے ہوئے کہا کہ پاکستان ٹیلی وژن ہمارا عظیم قومی اثاثہ ہے اور وفاقی حکومت اس ادارے کی بحالی اور اسے جدید سہولتوں سے آراستہ کرنے کے لیے تمام ممکنہ وسائل فراہم کرے گی۔ انہوں نے کہا کہ پی ٹی وی نے ہمیشہ قومی شناخت، ثقافتی اقدار اور قومی وحدت و یکجہتی کے فروغ میں تاریخی اور کلیدی کردار ادا کیا ہے، لہٰذا اس ادارے کو جدید خطوط پر استوار کرنا وقت کی اہم ضرورت ہے۔

ملاقات کے اختتام پر پی ٹی وی کی مجموعی استعداد کار بڑھانے، براڈکاسٹنگ انفراسٹرکچر کی ڈرامائی بہتری اور قومی نشریاتی نظام کو جدید ٹیکنالوجی پر منتقل کرنے کے لیے وزارتِ منصوبہ بندی اور وزارتِ اطلاعات کے درمیان قریبی باہمی تعاون کو مزید فروغ دینے پر کامل اتفاق کیا گیا۔

وفاقی وزیر توانائی اویس لغاری کا بڑا انکشاف: پاکستان میں سولر پاور کی استعداد 38 ہزار میگاواٹ کے قریب پہنچ گئی

by

منصور احمد, August 04,2026

اسلام آباد (نیوز اینڈ نیوز) — 4 اگست 2026ء

وفاقی وزیر برائے توانائی سردار اویس احمد خان لغاری نے انکشاف کیا ہے کہ پاکستان اس وقت توانائی کے شعبے میں ایک تاریخی اور انقلابی تبدیلی کے دور سے گزر رہا ہے، جہاں ملک میں سولر پاور کی مجموعی پیداواری استعداد 38 ہزار میگاواٹ کے قریب جا پہنچی ہے۔

سولر، اسٹوریج اینڈ فلیکسیبلٹی کانفرنس سے کلیدی خطاب کرتے ہوئے وفاقی وزیر توانائی نے واضح کیا کہ پاکستان میں اب بجلی کی پیداوار کی کمی کا مسئلہ نہیں رہا بلکہ سب سے بڑا چیلنج پیدا ہونے والی بجلی کا مؤثر استعمال اور اسے ذخیرہ (اسٹوریج) کرنا ہے۔ انہوں نے بتایاک ہ دن کے اوقات میں سولر کی وجہ سے بجلی کی اضافی پیداوار میسر ہوتی ہے جبکہ شام ہوتے ہی طلب میں یکدم نمایاں اضافہ ہو جاتا ہے جس سے گرڈ پر دباؤ بڑھتا ہے۔

اویس لغاری نے اپنے خطاب میں اس بات پر زور دیا کہ بیٹری انرجی اسٹوریج سسٹمز بجلی کی ترسیل کے نظام کی بہتری اور گرڈ کے استحکام کے لیے انتہائی ناگزیر ہو چکے ہیں۔ انہوں نے کہا کہ مقامی وسائل سے پیدا ہونے والی بجلی ملکی توانائی کی خودمختاری کو مضبوط بناتی ہے، جبکہ درآمدی ایندھن پر مسلسل انحصار پاکستان کی معیشت اور توانائی کی سلامتی کے لیے ایک بڑا خطرہ ہے۔ حال ہی میں قطر سے آر ایل این جی کی ترسیل متاثر ہونے پر ملک کو رات کے اوقات میں مجبورا ًلوڈشیڈنگ کا سامنا کرنا پڑا، جبکہ دن کے وقت سولر کی وافر دستیابی کی وجہ سے صورتحال نسبتاً بہتر اور قابو میں رہی۔

وزیر توانائی نے اہم اعداد و شمار پیش کرتے ہوئے بتایا کہ اس وقت پاکستان کی کل بجلی کی پیداوار میں صاف ستھری توانائی (کلین انرجی) کا حصہ 55 فیصد تک پہنچ چکا ہے، جبکہ حکومت نے سال 2035ء تک اس حصے کو 90 فیصد تک لے جانے کا بڑا ہدف مقرر کیا ہے۔ انہوں نے واضح کیا کہ صرف سولر اور ونڈ پاور کے ذریعے یہ 90 فیصد کا ہدف حاصل نہیں کیا جا سکتا جب تک کہ جدید بیٹری اسٹوریج کا نظام موجود نہ ہو۔

حکومتی ترجیحات کا ذکر کرتے ہوئے اویس لغاری نے اعلان کیا کہ پاکستان میں باہر سے بیٹریوں کی صرف درآمد پر انحصار نہیں کیا جائے گا بلکہ مقامی سطح پر مینوفیکچرنگ اور انڈسٹری کو فروغ دیا جائے گا۔ انہوں نے بتایا کہ ڈسٹری بیوشن کمپنیوں (ڈسکوز) میں بیٹری انرجی اسٹوریج کے پائلٹ منصوبوں کی باقاعدہ منظوری دے دی گئی ہے، اور ان پائلٹ پروجیکٹس سے حاصل ہونے والا ڈیٹا اور نتائج مستقبل کی قومی ریگولیٹری پالیسی کی بنیادی بنیاد بنیں گے۔

تقریب کے اختتام پر وفاقی وزیر توانائی نے عالمی سرمایہ کاروں اور بین الاقوامی ٹیکنالوجی کمپنیوں کو پاکستان کے توانائی کے شعبے میں سرمایہ کاری کی کھلی دعوت دی اور یقین دہانی کرائی کہ اس کانفرنس سے سامنے آنے والی تمام عملی سفارشات کو براہِ راست حکومتی پالیسی سازی کا حصہ بنایا جائے گا۔

بھارت میں اقلیتوں کی صورتحال پر تشویش: انتہا پسندانہ اقدامات اور مذہبی آزادی پر سوالات

by

منصور احمد, August 04,2026

اسلام آباد (نیوز اینڈ نیوز) — 4 اگست 2026ء

بھارت میں اقلیتوں، بالخصوص مسلمانوں کے خلاف بڑھتے ہوئے انتہا پسندانہ اقدامات اور مذہبی آزادی کی مجموعی صورتحال پر ایک بار پھر عالمی و علاقائی سطح پر شدید سوالات اٹھنا شروع ہو گئے ہیں۔ ہندوتوا نظریے کو فروغ دینے والے متعدد عناصر کی جانب سے مسلمانوں کے مذہبی تشخص، تاریخی عبادت گاہوں اور مقدسات کو مسلسل نشانہ بنانے کے واقعات میں تشویشناک حد تک اضافہ دیکھا جا رہا ہے۔

سوشل میڈیا پر وائرل ہونے والی متعدد ویڈیوز اور بین الاقوامی انسانی حقوق کی رپورٹس میں انکشاف کیا گیا ہے کہ بھارتی ریاست اتراکھنڈ میں انتہا پسند ہندو تنظیم ‘بجرنگ دل’ کے کارکنوں نے مسلمانوں کی قدیم قبروں اور ایک تاریخی مزار کو شدید نقصان پہنچایا۔ اس کارروائی کے بعد متعدد انتہا پسندوں کی جانب سے جشن منانے کی مناظر بھی سامنے آئے، جبکہ اس مجرمانہ اقدام کو مبینہ طور پر ‘لینڈ جہاد’ کا بے بنیاد نام دے کر جواز فراہم کرنے کی کوشش کی گئی۔

اسی طرح کا ایک اور افسوسناک واقعہ بھارت کے دارالحکومت نئی دہلی کے علاقے منڈاولی میں بھی سامنے آیا، جہاں سوشل میڈیا پر گردش کرنے والی ویڈیوز کے مطابق ایک انتہا پسند گروپ کے سواروں نے مقامی مسلمانوں کو ان کی باقاعدہ نمازِ باجماعت کی ادائیگی سے زبردستی روکنے کی کوشش کی اور اشتعال انگیزی پھیلائی۔

تجزیہ کاروں اور معاشی و سیاسی مبصرین کے مطابق بھارت میں اقلیتوں، بالخصوص مسلم برادری کے خلاف تواتر کے ساتھ رونما ہونے والے یہ واقعات خود کو دنیا کی سب سے بڑی جمہوریت اور سیکولر ریاست قرار دینے والے بھارتی دعوؤں اور بنیادی مذہبی آزادی کے اصولوں کا پول کھول رہے ہیں۔ انسانی حقوق کے عالمی و مقامی فعال کارکنوں کا اس حوالے سے کہنا ہے کہ تمام اقلیتوں کے مذہبی مقامات، عبادت کے بنیادی حق اور جان و مال کا تحفظ ہر مہذب ریاست کی آئینی و قانونی ذمہ داری ہے، جس میں بھارتی حکومت مکمل طور پر ناکام دکھائی دے رہی ہے۔

الیکشن کمیشن کی تمام سیاسی جماعتوں کو ہدایت: مالی سال 26-2025ء کے مالیاتی گوشوارے 29 اگست تک جمع کروانے کا حکم

by

محمود احمد, August 03,2026

اسلام آباد (نیوز اینڈ نیوز) — 3 اگست 2026ء

الیکشن کمیشن آف پاکستان (ای سی پی) نے ملک کی تمام رجسٹرڈ سیاسی جماعتوں کے سربراہان کو آئینی و قانونی ذمہ داریوں کی یاد دہانی کراتے ہوئے ہدایت کی ہے کہ وہ الیکشن ایکٹ 2017 کی دفعہ 204 اور 210 اور الیکشن رولز 2017 کے قاعدہ 159 اور 160 کے تحت مالی سال 26-2025ء کے اپنے تمام مالیاتی و حسابی گوشوارے 29 اگست 2026ء تک یا اس سے قبل الیکشن کمیشن میں لازمی جمع کروائیں۔

الیکشن کمیشن کے ترجمان کی جانب سے جاری کیے گئے باضابطہ بیان میں واضح کیا گیا ہے کہ الیکشن ایکٹ 2017 کی دفعہ 210 کے تحت تمام سیاسی جماعتوں پر فرض ہے کہ وہ مالی سال کے اختتام کے 60 دنوں کے اندر اندر اپنے تمام اکاؤنٹس کا مربوط گوشوارہ مخصوص ‘فارم-ڈی’ پر تیار کر کے کمیشن میں پیش کریں۔ اس میں سیاسی جماعت کے تمام اثاثوں، واجبات، آمدن کے ذرائع اور اخراجات کی مکمل و شفاف تفصیلات کا ہونا قانونی طور پر لازمی ہے۔

ترجمان نے مزید وضاحت کی کہ الیکشن کمیشن کو جمع کروائی جانے والی اس آڈٹ رپورٹ کی تیاری اور منظوری کسی مستند چارٹرڈ اکاؤنٹنٹ سے ہونی چاہیے، جبکہ اس دائر کردہ رپورٹ پر پارٹی کے سربراہ یا ان کے مجاز نمائندے کے باضابطہ دستخط ہونا ضروری ہیں۔ اس کے علاوہ، پارٹی سربراہ کی جانب سے ایک تصدیقی بیان یا حلف نامہ بھی منسلک کیا جائے گا جس میں اس بات کی باضابطہ گواہی دی جائے گی کہ پارٹی کو الیکشن ایکٹ 2017 کے احکامات کے برعکس کسی بھی ممنوعہ یا غیر قانونی ذریعہ سے فنڈز حاصل نہیں ہوئے اور پیش کردہ گوشواروں میں پارٹی کے مالی امور کی بالکل درست اور حقیقی تصویر پیش کی گئی ہے۔

الیکشن کمیشن نے تمام سیاسی جماعتوں پر زور دیا ہے کہ وہ قانونی کارروائی سے بچنے کے لیے مقررہ وقت کے اندر تمام تر کاغذی کارروائی مکمل کر کے رپورٹ ای سی پی کے دفتر میں جمع کروائیں، تاکہ شفافیت اور گڈ گورننس کا معیار برقرار رکھا جا سکے۔

آزاد کشمیر انتخابات: میرپور کے بعد مظفرآباد اور پنجاب کی تمام مہاجرین نشستوں پر ن لیگ کی فتح، مریم اورنگزیب کا کشمیری عوام کا شکریہ

by

منصور احمد, August 03,2026

لاہور (نیوز اینڈ نیوز) — 3 اگست 2026ء

پاکستان مسلم لیگ (ن) کی مرکزی سیکرٹری اطلاعات اور پنجاب کی سینئر وزیر مریم اورنگزیب نے آزاد کشمیر قانون ساز اسمبلی کے انتخابات میں میرپور ڈویژن کے بعد مظفرآباد ڈویژن اور پنجاب میں مقیم مہاجرین کی نشستوں پر پارٹی کی شاندار کامیابی پر کشمیری عوام کا تہِ دل سے شکریہ ادا کیا ہے۔ اپنے ایک خصصی بیان میں انہوں نے کہا کہ عوام نے ووٹ کی طاقت کے ذریعے قائد مسلم لیگ (ن) محمد نواز شریف کے بیانیے اور جماعت کی بے مثال کارکردگی پر اپنے کامل اعتماد کا اظہار کر دیا ہے۔

مریم اورنگزیب نے کہا کہ وہ میرپور کے بعد مظفرآباد ڈویژن کے عوام کی بے حد شکر گزار ہیں جنہوں نے کسی قسم کے دباؤ، دھمکی یا جھوٹے پروپیگنڈے میں آئے بغیر اپنے ووٹ کے آئینی اور جمہوری حق کو استعمال کرتے ہوئے مسلم لیگ (ن) کے حق میں اپنا فیصلہ سنایا ہے۔ انہوں نے بالخصوص نشاندہی کی کہ پنجاب میں آزاد کشمیر کے مہاجرین کی تمام کی تمام 10 نشستوں پر مسلم لیگ (ن) کی تاریخی کامیابی وزیراعلیٰ پنجاب مریم نواز شریف کی انتھک محنت، بہترین کارکردگی اور روز مرہ عوامی خدمت کے مشن پر کشمیری ووٹرز کے غیر متزلزل اعتماد کا منہ بولتا ثبوت ہے۔ پنجاب میں مقیم کشمیریوں نے اپنے ووٹ کے ذریعے مریم نواز کی قیادت اور ان کے ترقیاتی ماڈل کے حق میں اپنا واضح فیصلہ دیا ہے۔

سیکرٹری اطلاعات نے ان تمام کشمیری مہاجرین اور کارکنان کا شکریہ ادا کیا جنہوں نے قائد مسلم لیگ (ن) محمد نواز شریف، وزیراعظم پاکستان محمد شہباز شریف اور وزیراعلیٰ پنجاب مریم نواز شریف پر اپنے مکمل اعتماد کا اظہار کیا۔ انہوں نے عزم ظاہر کیا کہ آزاد کشمیر میں مسلم لیگ (ن) کی اکثریت سے حکومت قائم ہوتے ہی وہاں بھی پاکستان اور پنجاب کی طرز پر ترقی، خوشحالی اور حقیقی عوامی خدمت کے ایک نئے اور مثالی دور کا آغاز کیا جائے گا۔

مریم اورنگزیب نے آئندہ مرحلے کا ذکر کرتے ہوئے امید ظاہر کی کہ اللہ تعالیٰ کے فضل و کرم سے پونچھ ڈویژن میں بھی مسلم لیگ (ن) ایسی ہی شاندار کامیابی حاصل کرے گی۔ انہوں نے واضح کیا کہ پارٹی پونچھ ڈویژن میں ہونے والے انتخابات کے لیے مکمل طور پر فعال اور تیار ہے اور انہیں پورا یقین ہے کہ وہاں کے غیور عوام بھی ترقی کے نشان شیر پر مہر لگا کر مسلم لیگ (ن) کو ہی اپنا نمائندہ منتخب کریں گے۔

گورنر خیبر پختونخوا فیصل کریم کنڈی سے سابق برطانوی مشیر کبیر صابر کی ملاقات: تجارت اور سرمایہ کاری پر تبادلہ خیال

by

کاشف عباسی , August 03,2026

اسلام آباد (نیوز اینڈ نیوز) — 3 اگست 2026ء

گورنر خیبر پختونخوا فیصل کریم کنڈی سے برطانیہ کے سابق مشیر اور لندن سے پارلیمانی امیدوار کبیر صابر نے ایک اہم ملاقات کی، جس میں باہمی تعاون، تجارت اور سرمایہ کاری کے فروغ سے متعلق تفصیلی گفتگو کی گئی۔

گورنر آفس کی جانب سے جاری کردہ بیان کے مطابق دونوں رہنماؤں کی اس ملاقات کے دوران خیبر پختونخوا میں تجارتی سرگرمیوں، غیر ملکی و مقامی سرمایہ کاری کے مواقع، انسانی وسائل کی جدید انداز میں تربیت اور صلاحیتوں کی فروغ پر تبادلہ خیال کیا گیا۔

ملاقات کے دوران گفتگو کرتے ہوئے گورنر فیصل کریم کنڈی نے کہا کہ صوبہ خیبر پختونخوا بے پناہ قدرتی وسائل، صلاحیتوں سے مالا مال نڈر اور باصلاحیت نوجوان افرادی قوت اور وسیع تجارتی و معاشی مواقع سے لیس ہے۔ انہوں نے زور دے کر کہا کہ دنیا بھر میں مقیم تارکینِ وطن (اوورسیز پاکستانی) اور بین الاقوامی سرمایہ کار خیبر پختونخوا کے بنیادی ڈھانچے اور معاشی بہتری میں کلیدی اور تاریخی کردار ادا کر سکتے ہیں۔

اس موقع پر کبیر صابر نے بھی صوبے کی معاشی و انسانی ترقی کے لیے تجاویز پیش کیں اور بین الاقوامی سطح پر تعاون کے نئے راستے ہموار کرنے کی یقین دہانی کرائی۔

آزاد کشمیر انتخابات میں ن لیگ کو سادہ اکثریت حاصل: رانا ثناء اللہ اور امیر مقام کی مشترکہ پریس کانفرنس

by

منصور احمد, August 03,2026

اسلام آباد (نیوز اینڈ نیوز) — 3 اگست 2026ء

وزیراعظم کے مشیر رانا ثناء اللہ اور وفاقی وزیر امورِ کشمیر و گلگت بلتستان انجینئر امیر مقام نے کہا ہے کہ آزاد کشمیر میں دو مراحل کے تحت الیکشن کا پرامن، شفاف اور منصفانہ انعقاد دراصل جمہوریت، کشمیری عوام اور ریاست کی عملداری کی بڑی کامیابی ہے۔

اسلام آباد میں پریس کانفرنس سے خطاب کرتے ہوئے رانا ثناء اللہ نے بتایا کہ دوسرے مرحلے کے دوران آزاد کشمیر اور مہاجرین کے 20 حلقوں میں انتخابی عمل کامیابی کے ساتھ مکمل ہوا، جس میں مسلم لیگ (ن) نے 23 نشستوں پر کامیابی حاصل کر کے آزاد کشمیر میں سادہ اکثریت حاصل کر لی ہے۔ میرپور ڈویژن کی 9 اور مظفرآباد ڈویژن کی 7 میں سے 4 نشستوں پر مسلم لیگ (ن) جبکہ 3 پر پیپلز پارٹی کامیا ب ہوئی، جبکہ مہاجرین کی 12 میں سے 10 نشستیں ن لیگ کے حصے میں آئیں۔

رانا ثناء اللہ نے پیپلز پارٹی کے رویے پر شدید تنقید کرتے ہوئے کہا کہ “پیپلز پارٹی نے شکست سامنے دیکھ کر گزشتہ روز سے ہی دھاندلی کا بیانیہ بنانا شروع کر دیا تھا۔ ابتدا میں 13 حلقوں میں دھاندلی کا الزام لگایا گیا جو شواہد مانگنے پر پہلے 4 اور پھر 2 حلقوں تک محدود ہو گیا۔” انہوں نے بلاول بھٹو زرداری سے مطالبہ کیا کہ وہ اس کا نوٹس لیں کیونکہ عوامی مینڈیٹ کو تسلیم نہ کرنا میثاقِ جمہوریت کی روح کے منافی ہے۔ انہوں نے الزام عائد کیا کہ سندھ سے آئے ہوئے ایک ایم این اے پولیس اہلکاروں کی معیت میں گاڑیوں کے قافلے لے کر پولنگ اسٹیشنوں پر خوف و ہراس پھیلاتے رہے۔

وفاقی وزیر امورِ کشمیر انجینئر امیر مقام نے گفتگو کرتے ہوئے کہا کہ آزاد کشمیر کی تاریخ کے اس انتہائی شفاف اور منصفانہ الیکشن کے انعقاد پر الیکشن کمیشن، مقامی انتظامیہ، پولیس اور سیکیورٹی ادارے مبارکباد کے مستحق ہیں۔ انہوں نے کہا کہ مسلم لیگ (ن) نے گزشتہ دو سال سے انتخابی میدان میں مسلسل محنت کی ہے، اور پیپلز پارٹی کے مقامی رہنماؤں نے اپنی اعلیٰ قیادت کو غلط گائیڈ کیا۔

پریس کانفرنس کے دوران دونوں رہنماؤں نے دھرنا دینے والی تنظیموں اور کشمیری رہنماؤں کو ایک بار پھر مذاکرات کی دعوت دی اور کہا کہ احتجاج اور دھرنوں سے مسائل حل نہیں ہوتے، چند ہزار افراد لاکھوں ووٹرز کے مقدر کا فیصلہ نہیں کر سکتے۔ انہوں نے واضح کیا کہ آزاد کشمیر انتخابات کا آخری مرحلہ مکمل ہوتے ہی پارلیمانی پارٹی کا اجلاس بلا کر حکومت سازی کا عمل مکمل کیا جائے گا اور قائد میاں محمد نواز شریف کے وعدوں کے مطابق آزاد کشمیر میں تعمیر و ترقی کا نیا دور شروع ہوگا۔

وفاقی حکومت کی بڑی پیش رفت: چار آکوپیشنل گروپس کے 75 فیصد سول سرونٹس کا سروس ریکارڈ ڈیجیٹلائز کر دیا گیا

by

کاشف عباسی , August 03,2026

اسلام آباد (نیوز اینڈ نیوز) — 3 اگست 2026ء

وفاقی حکومت نے سول سروس میں انسانی وسائل کے انتظام کو جدید تقاضوں سے ہم آہنگ کرنے اور کاغذی ریکارڈ پر انحصار ختم کرنے کے لیے چار اہم آکوپیشنل گروپس سے تعلق رکھنے والے وفاقی سرکاری افسران کا تقریباً 75 فیصد سروس ریکارڈ ڈیجیٹلائز کر دیا ہے۔

ویلتھ پاکستان کو دستیاب ہونے والی اور سینیٹ کی قائمہ کمیٹی برائے کابینہ سیکریٹریٹ میں پیش کی گئی سرکاری دستاویزات کے مطابق اسٹیبلشمنٹ ڈویژن نے ہیومن ریسورس مینجمنٹ انفارمیشن سسٹم کے نفاذ کے ذریعے اس پروسیس میں غیر معمولی اور نمایاں پیش رفت کی ہے۔ ایچ آر ایم آئی ایس ایک ویب بیسڈ اور مرکزی ڈیجیٹل پلیٹ فارم ہے، جس پر پاکستان ایڈمنسٹریٹو سروس ، پولیس سروس آف پاکستان ، آفس مینجمنٹ گروپ اور سیکریٹریٹ گروپ کے افسران کے تمام سروس ریکارڈز کو محفوظ کیا جا رہا ہے۔

سینیٹ کی قائمہ کمیٹی کو دی جانے والی بریفنگ کے مطابق، 75 فیصد ڈیٹا کی کامیاب انٹری کے بعد باقی ماندہ ریکارڈ کو بھی ہنگامی بنیادوں پر منتقل کیا جا رہا ہے۔ اس دوران اسٹیبلشمنٹ ڈویژن ریکارڈ کی سخت جانچ، تصدیق اور درستگی کے مرحلے کو بھی جاری رکھے ہوئے ہے تاکہ سسٹم میں شامل تمام تر معلومات سو فیصد مستند اور بلا غلطی رہیں۔ اس جدید پلیٹ فارم میں افسران کے ذاتی ڈیٹا، تقرریوں، ترجیحی سنیارٹی، تعلیمی اسناد، تربیت، رخصت کی تفصیلات، پرفارمنس ایویلیوایشن رپورٹس اور سروس ہسٹری کا مکمل ڈیٹا مرتب کیا گیا ہے۔

افسران کو یہ سہولت بھی دی گئی ہے کہ وہ اپنے لاگ ان کے ذریعے اپنے پورٹل کا خود جائزہ لے سکیں اور اگر کہیں غلطی ہو تو تصحیح کی درخواستیں جمع کروا سکیں، جنہیں چھان بین کے بعد نفاذ کا حصہ بنایا جاتا ہے۔ اسٹیبلشمنٹ ڈویژن نے سینیٹ کمیٹی کو یقین دہانی کرائی کہ پرانے ریکارڈ کی وجہ سے کام میں کوئی التوا نہیں آ رہا اور تمام تر توجہ ڈیٹا کی مکمل اور مستند انٹری پر مرکوز کی گئی ہے۔

مکمل طور پر فعال ہونے کے بعد ایچ آر ایم آئی ایس وفاقی افسران کی سروس سے متعلق تمام امور بشمول ترقیوں، تبادلوں اور تربیتی مراحل کے لیے واحد مستند اور مرکزی ذریعہ ثابت ہوگا، جس سے گڈ گورننس، شفافیت اور میرٹ کی بالادستی کو یقینی بنانے میں مدد ملے گی۔

گرین لیگیسی انیشیٹو: ایتھوپین سفارتخانے کا اسلام آباد میں شجرکاری مہم کا انعقاد، پاکستانی شہریوں کی بھرپور شرکت

by

منصور احمد, August 03,2026

اسلام آباد (نیوز اینڈ نیوز) — 3 اگست 2026ء

ایتھوپیا کے وزیراعظم ڈاکٹر ابی احمد کے تاریخی ‘گرین لیگیسی انیشیٹو’ کے تحت ایک ہی دن میں شجرکاری کی عالمی مہم میں پاکستانی شہریوں نے بھی روایتی جوش و جذبے کے ساتھ شرکت کی ہے۔

اسلام آباد میں قائم ایتھوپین سفارتخانے نے کیپیٹل ڈیولپمنٹ اتھارٹی (سی ڈی اے) کے تعاون سے ایک خصوصی شجرکاری مہم کا اہتمام کیا، جس میں سفارتی برادری، تاجر برادری، میڈیا نمائندگان اور سول سوسائٹی کے افراد نے بڑی تعداد میں شرکت کی۔

پاکستان میں اس تقریب کا بنیادی مقصد ایتھوپیا کے اس عظیم الشان قومی ہدف کے ساتھ مکمل یکجہتی کا اظہار تھا جس کے تحت ایک ہی دن میں 80 کروڑ پودے لگائے جا رہے ہیں۔

تقریب سے خطاب کرتے ہوئے اسلام آباد میں ایتھوپین سفارتخانے کے چارج ڈی افیئرز مسٹر میلاؤ گیٹاچو نے گرین لیگیسی انیشیٹو کے ماحولیاتی اثرات پر روشنی ڈالی۔ انہوں نے بتایا کہ اس فلیگ شپ پروگرام کے تحت ایتھوپیا اب تک 48 ارب سے زائد پودے لگا چکا ہے۔

انہوں نے کہا کہ “آج کی اس مہم کا مقصد ایتھوپیا میں اپنے بھائیوں اور بہنوں کے شانہ بشانہ کھڑے ہونا اور 80 کروڑ پودے لگانے کے ان کے عظیم ہدف کی حمایت کرنا ہے۔” انہوں نے موسمیاتی تبدیلیوں کے خلاف جنگ میں ایتھوپیا کی عالمی قیادت پر بھی زور دیا اور بتایا کہ ادیس ابابا جلد ہی بین الاقوامی کلائمیٹ سمٹ کی میزبانی بھی کرے گا۔

اس موقع پر کلین اینڈ گرین موومنٹ اسلام آباد کے چیئرمین اور اسلام آباد چیمبر آف کامرس کے سابق صدر ظفر بختاوری نے جنگلات کی بحالی کے لیے ایتھوپیا کی ان شاندار کاوشوں کو زبردست الفاظ میں سراہا۔

انہوں نے کہا کہ “گرین لیگیسی انیشیٹو کا وژن اسلام آباد کی ہماری ‘کلین اینڈ گرین موومنٹ’ کے اہداف سے مکمل طور پر مطابقت رکھتا ہے۔” انہوں نے زور دیا کہ گلوبل وارمنگ اور موسمیاتی تبدیلیوں سے نمٹنے کے لیے عالمی سطح پر متحد ہو کر مشترکہ اقدامات کرنا وقت کا سب سے بڑا تقاضا ہے۔

این ڈی ایم اے کی جانب سے ملک کے بڑے دریاؤں اور ندی نالوں میں طغیانی کے حوالے سے نیا الرٹ جاری: 2 تا 4 اگست کے دوران پانی کے بہاؤ میں نمایاں اضافے کا امکان

by

کاشف عباسی , August 02,2026

اسلام آباد (نیوز اینڈ نیوز) — 2 اگست 2026ء

قومی ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر (این ای او سی) نے ملک بھر میں 2 سے 4 اگست کے دوران تمام بڑے دریاؤں، ندی نالوں اور آبی ذخائر میں پانی کے بہاؤ میں نمایاں اور غیر معمولی اضافے کا امکان ظاہر کرتے ہوئے نیا ہنگامی الرٹ جاری کر دیا ہے۔

این ڈی ایم اے کے میڈیا ونگ کی جانب سے فراہم کردہ تفصیلات کے مطابق اس وقت دریائے لہڑی میں ہیڈ گوگی کے مقام پر اونچے درجے کا سیلاب جبکہ وزیر آباد کے قریب نالہ پلکھو میں درمیانے درجے کا سیلاب ریکارڈ کیا گیا ہے۔ اسی طرح دریائے سندھ میں کالاباغ، چشمہ، گدو اور سکھر کے مقامات پر نچلے درجے کی طغیانی جاری ہے، جبکہ دریائے ناری میں ہیڈ ناری پر بھی نچلے درجے کا سیلاب ہے۔

این ای او سی کی تازہ پیشگوئی کے مطابق دریائے چناب میں مرالہ کے مقام پر اونچے درجے جبکہ خانکی اور قادر آباد کے مقامات پر نچلے سے درمیانے درجے کا بہاؤ متوقع ہے۔ اس کے علاوہ دریائے جہلم، راوی، کابل اور ان کے معاون ندی نالوں میں نچلے سے درمیانے درجے کے پانی کے بہاؤ میں مزید اضافے کا خدشہ ہے۔ اتھارٹی نے واضح کیا کہ راوی، جہلم اور چناب سے منسلک ندی نالوں میں شدید طغیانی آ سکتی ہے، جبکہ راوی اور ستلج میں مجموعی صورتحال کا انحصار بھارتی آبی ذخائر سے پانی کے متوقع اخراج پر ہوگا۔

این ڈی ایم اے نے مزید خبردار کیا ہے کہ ڈی جی خان اور راجن پور کے پہاڑی نالوں، وسطی و جنوبی خیبر پختونخوا اور شمالی بلوچستان کے ندی نالوں میں اچانک طوفانی سیلاب (فلیش فلڈنگ) کا شدید خطرہ موجود ہے۔ مزید برآں راولپنڈی، جہلم، گوجرانوالہ، لاہور، فیصل آباد، پشاور، مردان، نوشہرہ، حیدرآباد، بدین، ٹھٹھہ اور سندھ کے دیگر نشیبی شہری علاقوں میں شدید بارشوں کے باعث اربن فلڈنگ کا خدشہ ظاہر کیا گیا ہے۔

عوام کو ہدایت کی گئی ہے کہ وہ مون سون کے اس خطرناک اسپیل کے دوران غیر ضروری سفر اور پہاڑی علاقوں میں سیاحتی سرگرمیوں سے مکمل گریز کریں۔ پہاڑی علاقوں میں لینڈ سلائیڈنگ اور ملبے کے ریلوں کا خطرہ بڑھ جاتا ہے۔ این ڈی ایم اے نے شہریوں کو خبردار کیا ہے کہ تیز بہاؤ والے سیلابی پانی کو پیدل یا گاڑی کے ذریعے عبور کرنے کی کوشش ہرگز نہ کریں کیونکہ کم گہرا پانی بھی شدید خطرے کا باعث بن سکتا ہے۔ سفر کے دوران خشک خوراک، پینے کا پانی، پاور بینک اور ابتدائی طبی امداد کا سامان ساتھ رکھیں اور باخبر رہنے کے لیے ‘پاک این ڈی ایم اے ڈیزاسٹر الرٹ’ ایپ استعمال کریں۔

جائے وقوعہ سے خودکش حملہ آور کا سر برآمد؛ پولیس اور ریسکیو 1122 کی جانب سے ایمرجنسی آپریشن جاری، علاقہ ناکابندی کے بعد سیل،

by

منصور احمد, August 02,2026

سوات (نیوز اینڈ نیوز) — 2 اگست 2026ء

صوبہ خیبر پختونخوا کے ضلع سوات کے علاقے کبل میں پولیس اسٹیشن کے مرکزی گیٹ کے قریب ایک شدید اور زور دار دھماکہ ہوا ہے، جس کے نتیجے میں پولیس اہلکاروں اور عام شہریوں سمیت متعدد افراد شدید زخمی ہو گئے ہیں جبکہ کئی ہلاکتوں کا خدشہ بھی ظاہر کیا جا رہا ہے۔

ابتدائی اطلاعات اور عینی شاہدین کے مطابق دھماکے کے وقت پولیس اسٹیشن کے قریب مقامی نوجوانوں کا امن و امان کے حوالے سے ‘امن پاسون’ کا احتجاجی مظاہرہ جاری تھا، جس کے باعث موقع پر شہریوں، مظاہرین اور پولیس اہلکاروں کی بڑی تعداد موجود تھی۔ اچانک ہونے والے اس خوفناک دھماکے کے بعد علاقے میں شدید خوف و ہراس اور بھگدڑ مچ گئی۔

ڈسٹرکٹ پولیس آفیسر (ڈی پی او) سوات نے واقعے کے حوالے سے بتایا کہ ابتدائی تحقیقات اور شواہد کی روشنی میں دھماکہ مبینہ طور پر خودکش حملہ معلوم ہوتا ہے۔ پولیس حکام کے مطابق جائے وقوعہ سے ایک انسانی سر بھی برآمد ہوا ہے، جو ممکنہ طور پر خودکش حملہ آور کا ہو سکتا ہے۔ سیکیورٹی فورسز اور کرائم سین انویسٹی گیشن ٹیموں نے فرانزک شواہد اکٹھے کرنے کا عمل شروع کر دیا ہے اور واقعے کی تمام تر پہلوؤں سے تحقیقات جاری ہیں۔

ریسکیو 1122 کے ذرائع کے مطابق واقعے کی اطلاع ملتے ہی میڈیکل ٹیمیں اور متعدد ایمبولینسز فوری طور پر جائے وقوعہ کی طرف روانہ کر دی گئیں۔ امدادی اہلکاروں نے زخمیوں کو ابتدائی طبی امداد فراہم کرتے ہوئے فوری طور پر قریبی تحصیل ہیڈکوارٹر ہسپتال اور سیدو شریف ہسپتال منتقل کر دیا ہے۔ ریسکیو ذرائع کا کہنا ہے کہ ابتدائی طور پر 10 سے زائد افراد کے زخمی ہونے کی تصدیق ہوئی ہے، جبکہ حتمی جانی و مالی نقصانات کا اندازہ ریسکیو آپریشن مکمل ہونے کے بعد لگایا جائے گا۔

واقعے کے فوراً بعد سیکیورٹی فورسز، پولیس اور قانون نافذ کرنے والے اداروں کے سنگین ترین دستوں نے کبل اور اس کے گردونواح کے تمام راستوں کو سیل کر کے علاقے کا محاصرہ کر لیا ہے اور سرچ آپریشن شروع کر دیا گیا ہے۔

فواد چوہدری کا داؤ: “موجودہ نظام بالکل ناکام ہو چکا، سیاسی جماعتوں اور اسٹیبلشمنٹ میں عمران خان کے بغیر مذاکرات ممکن نہیں”

by

منصور احمد, August 02,2026

لاہور (نیوز اینڈ نیوز) — 2 اگست 2026ء

سابق وفاقی وزیر فواد چوہدری نے دعویٰ کیا ہے کہ موجودہ حکومتی نظام مکمل طور پر ناکام ہو چکا ہے اور حکومت عملی طور پر فارغ ہو چکی ہے۔ ان کا کہنا تھا کہ ملک میں پائیدار سیاسی و معاشی استحکام کے لیے سیاسی جماعتوں اور اسٹیبلشمنٹ کے درمیان ڈائیلاگ کا آغاز ہونا ضروری ہے، تاہم تحریکِ انصاف کے بانی چیئرمین عمران خان کے بغیر ایسا کوئی بھی مذاکراتی عمل ہرگز مکمل نہیں ہو سکتا۔

لاہور میں گفتگو کرتے ہوئے فواد چوہدری نے حکومت کو آڑھے ہاتھوں لیا اور کہا کہ تین وفاقی وزراء خود وزیراعظم کی حیثیت پر سوالات اٹھا رہے ہیں۔ انہوں نے کہا کہ بیانیے اور عدم اعتماد کی تحریک کے وقت ہم نے پہلے ہی واضح کر دیا تھا کہ موجودہ سیٹ اپ ملک نہیں چلا سکتا۔

پنجاب کی ممکنہ تقسیم کے موضوع پر بات کرتے ہوئے انہوں نے کہا کہ اصلاحات صرف پنجاب تک محدود نہیں ہونی چاہئیں کیونکہ اصل مسائل دیگر صوبوں میں ہیں۔ پاکستان چند بلوچ اور سندھی وڈیروں کی منشا کے مطابق نہیں چلایا جا سکتا اور بلوچستان کو 1970ء سے پہلے والی اصل سیاسی و انتظامی بنیادوں پر بحال کرنے کی ضرورت ہے۔

فواد چوہدری نے زور دے کر کہا کہ موجودہ نظام اپنی افادیت پوری طرح کھو چکا ہے اور اب اس میں متبادل اصلاحات پر بات ہونا وقت کا سب سے بڑا تقاضا ہے۔ نئے صوبے، بلدیاتی نظام اور ذیلی انتظامی حدود جیسے موضوعات پر سنجیدہ بحث ہونی چاہیے کیونکہ پرانے طرزِ حکمرانی کو زبردستی جاری رکھنا اب ممکن نہیں رہا۔

حکومتی اخراجات اور وزیرِاعلیٰ پنجاب مریم نواز شریف کو تنقید کا نشانہ بناتے ہوئے انہوں نے کہا کہ شاہانہ اخراجات کی ایسی مثالیں ماضی میں بھی نہیں ملتی۔ اربوں روپے کے جہاز کی خریداری، مختلف تقاریب کے بے دریغ اخراجات، وکلاء و صحافیوں میں مبینہ فنڈز کی تقسیم اور بیوروکریسی کے لیے اربوں روپے جاری کرنا اس بات کا ثبوت ہے کہ عوامی وسائل کا بے دردی سے زیاں کیا جا رہا ہے۔

علیمہ خان کا کوہاٹ میں کارکنوں سے خطاب: “ریاست 24 کروڑ عوام ہیں، تصادم نہیں اتحاد کی ضرورت ہے”

by

کاشف عباسی , August 02,2026

کوہاٹ (نیوز اینڈ نیوز) — 2 اگست 2026ء

پاکستان تحریک انصاف (پی ٹی آئی) کے بانی چیئرمین عمران خان کی ہمشیرہ علیمہ خان نے کہا ہے کہ اب نہ کسی نے گولیاں کھانی ہیں اور نہ ہی کسی نے گولیاں مارنی ہیں کیونکہ سپاہی اور فوجی بھی ہمارے اپنے ہی بچے ہیں، اور شہادتیں عوام و سپاہیوں دونوں کی ہو رہی ہیں، اس لیے وقت کا تقاضا تصادم کے بجائے اتحاد اور امن ہے۔

کوہاٹ میں پی ٹی آئی کارکنوں کے ایک بڑے اجتماع سے خطاب کرتے ہوئے علیمہ خان نے ڈی جی آئی ایس پی آر کی حالیہ گفتگو کے تناظر میں کہا کہ عوام کے ٹیکسوں سے چلنے والے ادارے خود کو ریاست قرار دیتے ہیں، حالانکہ ریاست تنخواہ دار ادارے نہیں بلکہ وہ 24 کروڑ عوام ہیں جو اپنی جیب سے ٹیکس ادا کر کے ان اداروں کو چلاتے ہیں۔ ملک کے مختلف علاقوں کے غیور عوام کو غدار یا دہشت گرد قرار دینا انتہائی غیر مناسب طرزِ عمل ہے۔

عمران خان کی صحت پر تشویش کا اظہار کرتے ہوئے علیمہ خان نے بتایا کہ گردش کرنے والی خبروں میں کہا جا رہا ہے کہ عمران خان کو بلڈ پریشر کا مسئلہ درپیش ہے، حالانکہ انہیں پہلے ایسا کوئی عارضہ لاحق نہیں تھا۔ انہوں نے مطالبہ کیا کہ عمران خان کا فوری طور پر ہسپتال میں مکمل طبی معائنہ کرایا جائے، مناسب علاج فراہم کیا جائے اور ان کی آنکھ میں خون کا لوتھڑا آنے کی مکمل تحقیقات کی جائیں۔

علیمہ خان نے پی ٹی آئی کے بنیادی مطالبات دہراتے ہوئے کہا کہ عدالتی احکامات کے مطابق ہر ہفتے 18 افراد کو عمران خان سے جیل میں ملاقات کی اجازت دی جائے کیونکہ ملاقاتیں بند کر کے انہیں قیدِ تنہائی میں رکھا گیا ہے جس کا خاتمہ ناگزیر ہے۔ مزید برآں، عمران خان کے تمام مقدمات جلد سماعت کے لیے مقرر کیے جائیں تاکہ انہیں قانون کے مطابق انصاف مل سکے۔ انہوں نے کارکنوں پر زور دیا کہ وہ اپنے حقوق کے لیے پرامن انداز میں آواز بلند کریں اور متحد رہیں۔

خطاب کے اختتام پر انہوں نے کہا کہ ملک میں جاری سیاسی عدم استحکام اور بدامنی کا خاتمہ صرف اور صرف عمران خان کی رہائی سے ہی ممکن ہے۔ عمران خان کے دورِ حکومت میں معیشت بہتر تھی اور جی ڈی پی کی شرح نمو 6 فیصد پر تھی، جبکہ کورونا وبا کے باوجود ملک کو کامیابی سے چلایا گیا، تاہم بعد میں ایک سازش کے تحت حکومت ختم کر کے ملک کو سنگین بحرانوں میں دھکیلا گیا۔

خیبرپختونخوا میں ‘آپریشن گرج 11’ کے تحت سیکیورٹی فورسز کی انٹیلی جنس بیسڈ کارروائیاں جاری: متعدد خوارج ہلاک، ٹھکانے تباہ

by

منصور احمد, August 02,2026

باجوڑ (نیوز اینڈ نیوز) — 2 اگست 2026ء

خیبرپختونخوا میں گزشتہ دو ماہ کے دوران سیکیورٹی فورسز کی جانب سے “آپریشن گرج 11” کے تحت موثر انٹیلی جنس بیسڈ آپریشنز مسلسل جاری ہیں۔ ان کارروائیوں کے دوران فورسز نے متعدد خوارج کو جہنم واصل کرتے ہوئے ان کے خفیہ ٹھکانے کامیابی سے تباہ کر دیے ہیں۔

سیکیورٹی ذرائع کے مطابق آپریشنز کے دوران سیکیورٹی فورسز نے دہشت گردوں کے متعدد سہولت کاروں کو حراست میں لیا ہے جبکہ ان کے قبضے سے بھاری مقدار میں جدید اسلحہ اور گولہ بارود بھی برآمد کیا گیا ہے۔ باجوڑ کے علاقے شاکرو میں کی گئی ایک مخصوص انٹیلی جنس بیسڈ کارروائی کے دوران سیکیورٹی فورسز نے خوارج کے ٹھکانوں کو انتہائی موثر اور نشانہ انداز میں تباہ کیا۔

باجوڑ میں کی جانے والی ان کامیاب پیش قدمیوں کے دوران متعدد خوارج کے ہلاک اور زخمی ہونے کی اطلاعات ہیں۔ سیکیورٹی فورسز نے “آپریشن گرج 11” کے دوران خوارجین کے زیرِ استعمال دیسی ساختہ دھماکہ خیز مواد اور بموں کو بھی موقع پر ہی ناکارہ بنا کر تباہ کر دیا ہے۔

سیکیورٹی ذرائع کا کہنا ہے کہ زمینی افواج اور کواڈ کاپٹر ٹیکنالوجی کے امتزاج سے کی جانے والی ان سرجیکل کارروائیوں کے ذریعے دہشت گردوں کو مقامی آبادی سے فرار ہونے پر مجبور کیا جا رہا ہے۔ تمام عملیات میں اس بات کو خاص طور پر یقینی بنایا جا رہا ہے کہ عام شہریوں کے جان و مال کا مکمل تحفظ رہے اور مقامی آبادی کو کسی قسم کا نقصان نہ پہنچے۔ سیکیورٹی فورسز نے اس عزم کا اعادہ کیا ہے کہ دہشت گردی کے مکمل خاتمے اور خیبرپختونخوا میں دیرپا امن کے قیام تک یہ کارروائیاں بلا تعطل جاری رہیں گی۔

آزاد کشمیر قانون ساز اسمبلی کے عام انتخابات 2026ء: لاہور اور گردونواح میں مہاجرین کی 2 نشستوں پر پولنگ کا عمل جاری

by

کاشف عباسی , August 02,2026

لاہور (نیوز اینڈ نیوز) — 2 اگست 2026ء

آزاد کشمیر قانون ساز اسمبلی کے جنرل انتخابات 2026ء کے دوسرے مرحلے میں مہاجرین کی دو اہم نشستوں ایل اے-34 جموں-I اور ایل اے-41 ویلی کے لیے لاہور اور اس کے گردونواح میں مقیم کشمیری مہاجرین اپنا آئینی و جمہوری حقِ رائے دہی استعمال کر رہے ہیں۔

حلقہ ایل اے-34 جموں-I کے لیے لاہور میں مجموعی طور پر 15 پولنگ اسٹیشن قائم کیے گئے ہیں، جن میں 1 مردانہ، 1 زنانہ اور 13 مشترکہ پولنگ اسٹیشن شامل ہیں۔ اس حلقے میں رجسٹرڈ ووٹرز کی کل تعداد 5 ہزار 965 ہے، جن میں 3 ہزار 175 مرد اور 2 ہزار 790 خواتین ووٹرز شامل ہیں۔ شفاف اور بلا تعطل ووٹنگ کے لیے مجموعی طور پر 30 پولنگ بوتھ قائم کیے گئے ہیں۔ اس نشست پر 17 امیدوار مدِ مقابل ہیں، جن میں استحکام پاکستان پارٹی کے بلال مختار بٹ، پاکستان پیپلز پارٹی کے چوہدری عبدالقادر چوہان، جماعت اسلامی کے راجہ محمد سہیل اور مسلم لیگ (ن) کے ناصر حسین ڈار کے درمیان سخت مقابلہ متوقع ہے۔

دوسری جانب، ایل اے-41 ویلی کی نشست کے لیے مجموعی طور پر 6 ہزار 410 رجسٹرڈ ووٹرز اپنا حقِ رائے دہی استعمال کر رہے ہیں۔ ان میں سے لاہور کے 5 ہزار 708، شیخوپورہ کے 583، ننکانہ صاحب کے 117 اور قصور کے 2 ووٹرز شامل ہیں۔ اس حلقے کے لیے مجموعی طور پر 19 پولنگ اسٹیشن بنائے گئے ہیں جن میں سے 13 لاہور، 4 شیخوپورہ جبکہ ننکانہ صاحب اور قصور میں 1، 1 پولنگ اسٹیشن شامل ہے۔ قصور کی ضلع میں صرف دو رجسٹرڈ ووٹرز کی سہولت کے لیے بھی مکمل پولنگ اسٹیشن قائم کر کے مثال قائم کی گئی ہے۔ ایل اے-41 میں 9 امیدوار انتخابی میدان میں ہیں، جن میں مسلم لیگ (ن) کے محمد عامر شاہ، تحریک انصاف کی حمایت یافتہ آزاد امیدوار صبا دیوان، پاکستان پیپلز پارٹی کے غلام عباس میر اور استحکام پاکستان پارٹی کے سعید احمد دار نمایاں ہیں۔

واضح رہے کہ 1947ء میں تقسیمِ برصغیر اور قیامِ پاکستان کے وقت آزاد کشمیر سے ہجرت کر کے پاکستان کے مختلف شہروں میں آباد ہونے والے کشمیری مہاجرین کی نمائندگی کے لیے قانون ساز اسمبلی میں خصوصی اور مخصوص نشستوں پر باقاعدگی سے انتخابات منعقد کیے جاتے ہیں۔

حضرت داتا گنج بخشؒ کے 983ویں سالانہ عرس مبارک کی تین روزہ تقریبات کل سے لاہور میں شروع ہوں گی

by

کاشف عباسی , August 01,2026

لاہور (نیوز اینڈ نیوز) — 1 اگست 2026ء

برصغیر کے عظیم صوفی بزرگ اور روحانی پیشوا حضرت علی بن عثمان ہجویری المعروف حضرت داتا گنج بخش رحمتہ اللہ علیہ کے 983ویں سالانہ عرس مبارک کی تین روزہ تقاریب کا باقاعدہ آغاز کل بروز اتوار 2 اگست سے ہو رہا ہے۔ اس عالمی روحانی اجتماع میں شرکت کے لیے اندرون و بیرونِ ملک سے لاکھوں عقیدت مند لاہور پہنچنا شروع ہو گئے ہیں۔

محکمہ اوقاف و مذہبی امور پنجاب کے ترجمان کے مطابق 2 تا 4 اگست 2026ء تک جاری رہنے والے اس عرس مبارک کے تمام تر سیکیورٹی، انتظامی اور عمرانی انتظامات کو حتمی شکل دے دی گئی ہے تاکہ ملک بھر اور بیرونِ ملک سے آنے والے تمام زائرین کو پرسکون اور محفوظ ماحول میسر آ سکے۔

دربار شریف کے آدھے سے زائد حصے، بھاٹی گیٹ صحن اور گیٹ نمبر 1 اور 2 پر جاری تعمیراتی کام کے پیشِ نظر جامع ٹریفک و داخلہ پلان جاری کیا گیا ہے۔ اس پلان کے مطابق گلبرگ، ماڈل ٹاؤن، مال روڈ، گلشنِ راوی، یتیم خانہ اور چوبرجی سے آنے والے زائرین بلال گنج کے راستے گیٹ نمبر 5 اور 5-A سے داخل ہوں گے۔ شاہدرہ، بادامی باغ، لاری اڈہ، بتی چوک، آزادی چوک اور اندرون لاہور سے آنے والے زائرین ذیلدار روڈ بھاٹی چوک کے ذریعے گیٹ نمبر 3 استعمال کریں گے، جبکہ خواتین کے لیے افتتاحی تقریب سے قبل گیٹ نمبر 4-A اور تقریب کے بعد گیٹ نمبر 4 مختص رہے گا۔

زائرین کی گاڑیوں کی پارکنگ، وضو اور استنجا خانوں کی سہولیات مینارِ پاکستان، اسلامیہ ہائی اسکول موہنی روڈ، یونیورسٹی آف ویٹرنری اینڈ اینیمل سائنسز، سینٹرل ماڈل اسکول ریٹی گن روڈ، اسلامیہ کالج ہال سول لائنز اور یونیورسٹی آف ایجوکیشن بلال گنج روڈ پر دستیاب ہوں گی، جبکہ محفلِ سماع رشید ایئر لائنز کمپلیکس بلال گنج میں منعقد کی جائے گی۔

عام لنگر کی تقسیم فرنٹ پیازہ بالمقابل بھاٹی گیٹ، لنگر خانہ اور گیٹ نمبر 3 کے برآمدے میں کی جائے گی، جبکہ گھروں سے لنگر لانے والے عقیدت مندوں کی سہولت کے لیے ٹیکسالی گیٹ، ٹبہ بابا فرید اور یونیورسٹی آف ویٹرنری اینڈ اینیمل سائنسز پر شٹل سروس اور نمائندگان بھی موجود ہوں گے۔ مزید برآں بزرگ شہریوں کی سہولت کے لیے گڑھی شاہو، بادامی باغ، سمن آباد اور چوبرجی چوک سے چار مفت شٹل سروس روٹس فعال رہیں گے، جبکہ اختتامی دعا میں شرکت کے لیے دربار شریف کے اطراف میں ایس ایم ڈی اسکرینز بھی نصب کر دی گئی ہیں۔

بلوچستان کے ضلع نوشکی میں سیکیورٹی فورسز کا انٹیلی جنس بیسڈ آپریشن: خودکش بمبار سمیت ‘فتنہ الہندوستان’ کے 7 دہشت گرد جہنم واصل

by

منصور احمد, August 01,2026

راولپنڈی (نیوز اینڈ نیوز) — 1 اگست 2026ء

سیکیورٹی فورسز نے بلوچستان کے ضلع نوشکی میں انڈین پراکسی ‘فتنہ الہندوستان’ سے تعلق رکھنے والے دہشت گردوں کی موجودگی کی خفیہ اطلاع پر ایک کامیاب انٹیلی جنس بیسڈ آپریشن کرتے ہوئے خودکش بمبار سمیت 7 انڈین سپانسرڈ دہشت گردوں کو جہنم واصل کر دیا ہے۔

ہفتہ کے روز پاک فوج کے شعبہ تعلقات عامہ (آئی ایس پی آر) کی جانب سے جاری کردہ باضابطہ پریس ریلیز کے مطابق، 30 اور 31 جولائی 2026ء کی درمیانی شب انتہائی مہارت سے کیے گئے اس آپریشن کے دوران سیکیورٹی فورسز نے دہشت گردوں کی خفیہ جائے پناہ کی درست نشاندہی کی۔ فورسز کی بروقت اور موثر سرجیکل کارروائی کے نتیجے میں خودکش بمبار سمیت تمام 7 انڈین سپانسرڈ دہشت گرد موقع پر ہی ہلاک ہو گئے۔ کارروائی کے دوران دہشت گردوں کا بھاری مقدار میں گولہ بارود اور دستی ساختہ دھماکہ خیز مواد کا ذخیرہ بھی تباہ کر دیا گیا۔

ترجمان آئی ایس پی آر کے مطابق علاقے میں موجود کسی بھی دیگر انڈین سپانسرڈ دہشت گرد کے مکمل خاتمے کے لیے سرچ اور کلیئرنس آپریشن مسلسل جاری ہے۔

آئی ایس پی آر نے اپنے بیانیے میں اس عزم کا دہرایا کہ سیکیورٹی فورسز اور پاکستان کی تمام قانون نافذ کرنے والی ایجنسیاں وفاقی اپیکس کمیٹی برائے نیشنل ایکشن پلان کی منظوری سے “عزمِ استحکام” کے ویژن کے تحت بیرونی امداد و مالی معاونت سے چلنے والی دہشت گردی کے اس ناسور کو ملک سے جڑ سے اکھاڑ پھینکنے کے لیے اپنی بلاامتیاز انسدادِ دہشت گردی مہم پوری قوت اور تسلسل کے ساتھ جاری رکھیں گی۔

وزیراعظم شہباز شریف ملکی معیشت کے استحکام اور ترقی کے لیے دن رات کوشاں ہیں: چیئرمین وزیراعظم یوتھ پروگرام رانا مشہود احمد خان

by

کاشف عباسی , August 01,2026

لاہور (نیوز اینڈ نیوز) — 1 اگست 2026ء

چیئرمین وزیراعظم یوتھ پروگرام رانا مشہود احمد خان نے کہا ہے کہ وزیراعظم محمد شہباز شریف کی قیادت میں پاکستان کی معاشی ترقی اور خوشحالی کے سفر کا باقاعدہ آغاز ہو چکا ہے، حکومت اپنی آئینی مدت پوری کرے گی اور مسلم لیگ (ن) اپنی شاندار کارکردگی کی بنیاد پر آئندہ عام انتخابات میں بھی کامیابی حاصل کرے گی۔

ہفتہ کے روز لاہور کے حلقہ پی پی 172 میں منعقدہ ایک بڑے ورکرز کنونشن سے خطاب کرتے ہوئے رانا مشہود احمد خان نے کہا کہ کشمیر پاکستان کا اٹوٹ انگ ہے اور پوری قوم سبز ہلالی پرچم تلے مکمل طور پر متحد و یکجان ہے۔ انہوں نے کہا کہ بھارت معرکہ حق میں عبرتناک شکست کا بدلہ پاکستان میں انارکی اور انتشار پھیلا کر لینے کی ناکام کوششیں کر رہا ہے، تاہم ملک خلاف ہونے والی ہر اندرونی و بیرونی سازش کو ناکام بنایا جائے گا۔ انہوں نے کہا کہ آج پوری قوم وزیراعظم محمد شہباز شریف اور فیلڈ مارشل سید عاصم منیر کی قیادت میں متحد ہے۔

انہوں نے کہا کہ قائد محمد نواز شریف نے پنجاب میں ترقی کا جو سفر شروع کیا تھا، اسے وزیراعظم محمد شہباز شریف، حمزہ شہباز اور وزیراعلیٰ پنجاب مریم نواز شریف کامیابی سے آگے بڑھا رہے ہیں۔ نوجوانوں کے کردار پر بات کرتے ہوئے ان کا کہنا تھا کہ نوجوان ہمارا روشن مستقبل اور قیمتی اثاثہ ہیں، اور مسلم لیگ (ن) نے ہمیشہ نوجوانوں کو ملک کی تعمیر و ترقی میں اول دستے کا کردار ادا کرنے کے مواقع فراہم کیے ہیں۔

رانا مشہود احمد خان نے مزید کہا کہ حکومت نے دن رات محنت کر کے ملک کو دیوالیے کے خدشات سے نکالا ہے اور معیشت کے مثبت اشاریے اور عالمی کریڈٹ ریٹنگ میں بہتری اس بات کا ثبوت ہیں کہ پاکستان درست سمت میں آگے بڑھ رہا ہے۔ کنونشن میں جاوید سرور بھٹی، میاں عدنان ثنا اللہ، ملک زیشان، سید عمران علی شاہ اور دیگر رہنماؤں نے شرکت کی۔ تقریب کے اختتام پر آزاد کشمیر کے انتخابات کے حوالے سے پارٹی ورکرز کو مختلف پولنگ اسٹیشنز پر ذمہ داریاں بھی تفویض کی گئیں۔